Genesis 28 - Maayong Balita nga Biblia (2012)

¹ Gintawag ni Isaac si Jacob, kag sang matamyaw niya sia, ginsugo niya sia nga nagasiling, “Indi ka magpangasawa sang isa ka babayi nga taga-Canaan.

² Maghimos ka kag magkadto sa Mesopotamia, sa balay ni lolo mo Betuel, ang amay sang imo iloy. Magpangasawa ka didto sang isa sang mga bata nga babayi sang imo tiyo nga si Laban.

³ Kabay nga ang Dios nga Makagagahom magbendisyon sang inyo pag-asawahay kag magahatag sa inyo sing madamo nga mga kabataan, agod mangin-amay ka sang madamo nga mga pungsod.

⁴ Kabay pakamaayuhon niya ikaw kag ang imo mga kaliwat subong sang iya pagpakamaayo kay Abraham, kag kabay nga magapanag-iya ka sini nga duta nga imo ginaestaran nga ginhatag sang Dios kay Abraham!”

⁵ Ginpalakat ni Isaac si Jacob sa Mesopotamia, didto kay Laban, ang anak ni Betuel nga Aramnon. Si Laban utod ni Rebeca, ang iloy ni Jacob kag ni Esau.

Si Esau Nagpangasawa Liwat

⁶ Nahibaluan ni Esau nga ginbendisyunan ni Isaac si Jacob kag ginpakadto niya sia sa Mesopotamia sa pagpangasawa didto. Nahibaluan man ni Esau nga sang pagbendisyon ni Isaac kay Jacob, ginsingganan niya sia nga indi magpangasawa sang isa ka babayi nga taga-Canaan.

⁷ Nahibaluan niya nga si Jacob nagtuman sa iya amay kag iloy, kag nagkadto sa Mesopotamia.

⁸ Didto nasat-uman ni Esau nga indi gali luyag sang iya amay ang mga babayi nga taga-Canaan.

⁹ Gani nagkadto sia kay Ismael nga anak ni Abraham, kag ginpangasawa niya si Mahalat nga anak ni Ismael kag utod ni Nebayot.

Ang Damgo ni Jacob sa Betel

¹⁰ Naghalin si Jacob sa Beerseba kag nagpakadto sa Haran.

¹¹ Sa pagtunod sang adlaw nag-abot sia sa isa ka balaan nga lugar kag nagdulog didto. Naghigda sia sa pagtulog kag nag-ulon sa isa ka bato.

¹² Nagdamgo sia nga nakita niya ang isa ka hagdan nga nagalambot sa langit halin sa duta. Ang mga anghel sang Dios nagasaka kag nagapanaog sa sini nga hagdan.

¹³ Dayon nakita niya ang Ginoo nga nagatindog sa tupad niya kag nagsiling, “Ako amo ang Ginoo, ang Dios ni Abraham kag ni Isaac. Pagaihatag ko sa imo kag sa imo mga kaliwat ining duta nga imo ginahigdaan.

¹⁴ Ang imo mga kaliwat manginsubong kadamo sang yab-ok sa duta. Magalapad ang ila mga kadutaan pa aminhan, pa bagatnan, pa sidlangan kag pa nakatundan. Ang tanan nga mga kapungsoran sa duta magapangayo sa akon nga bendisyunan ko man sila subong sang akon pagbendisyon sa imo kag sa imo mga kaliwat.

¹⁵ Dumdoma nga magaupod ako sa imo kag magabantay sa imo bisan diin ikaw makadto, kag pabalikon ko ikaw sa sini nga duta. Indi ko ikaw pagbayaan tubtob mahimo ko ang tanan nga ginsaad ko sa imo.”

¹⁶ Si Jacob nagmata kag nagsiling, “Matuod gid, ang Ginoo yari diri! Yari sia sa sini nga lugar, kag wala ko ini mahibaloi!”

¹⁷ Hinadlukan sia kag nagsiling, “Daw ano ka makahaladlok ini nga lugar! Sa walay duhaduha balay ini sang Dios kag pwertahan ini pakadto sa langit.”

¹⁸ Si Jacob nagbangon sing aga pa gid. Ginkuha niya ang bato nga iya gin-unlan kag ginpatindog subong isa ka haligi nga handumanan. Dayon ginbuboan niya ini sang lana sang olivo kag ginhalad ini sa Dios.

¹⁹ Ginhingalanan niya ang lugar Betel. Luz ang ngalan sina nga banwa sang una.

²⁰ Dayon si Jacob naghimo sing panaad sa Ginoo: “Kon mag-upod ka sa akon kag magbantay sa akon pagpanglakaton, kag maghatag sa akon sing pagkaon kag mga bayu,

²¹ kag kon makabalik ako nga indi maano sa balay sang akon amay, dayon ikaw mangin-akon Dios.

²² Ining bato nga akon ginpatindog subong isa ka haligi nga handumanan, manginlugar sa diin ikaw pagasimbahon kag pagaihatag ko sa imo ang ikapulo sang tanan nga igahatag mo sa akon.”