Genesis 27 - Maayong Balita nga Biblia (2012)

Ginbendisyunan ni Isaac si Jacob

¹ Karon si Isaac tigulang na kag indi na makakita. Ginpatawag niya ang iya magulang nga anak nga si Esau kag nagsiling sia sa iya, “Anak!” Nagsabat sia, “Ano ina, tay?”

² Si Isaac nagsiling, “Nakita mo nga tigulang na ako kag ayhan sa indi madugay mapatay na ako.

³ Karon, kon mahimo kuhaa ang imo mga hinganiban, ang imo pana kag mga baslay, magkadto ka sa latagon kag magpangayam ka para sa akon.

⁴ Lutoi ako sing manamit nga pagkaon nga akon naluyagan, kag dalha diri sa akon. Sa tapos ako sini makakaon ihatag ko sa imo ang akon katapusan nga pagpakamaayo sa wala pa ako mapatay.”

⁵ Si Rebeca nagapamati sang nagahambal si Isaac sa iya anak nga si Esau. Gani sang makalakat si Esau sa latagon sa pagpangayam para sa iya amay,

⁶ si Rebeca nagsiling kay Jacob, “Bag-o ko lang mabatian ang imo amay nga nagsiling kay Esau,

⁷ ‘Dalhi ako sing sapat, kag lutoi ako sing pagkaon. Sa tapos ako makakaon ihatag ko sa imo ang akon pagpakamaayo sa atubang sang Ginoo sa wala pa ako mapatay.’

⁸ Karon, anak, pamatii ako kag tumana ang isiling ko.

⁹ Kadto ka sa aton mga hayop kag magpili ka sing duha ka mga kanding nga matambok, agod maluto ko ini kag maaman ako sing pagkaon nga naluyagan gid sang imo amay.

¹⁰ Dalhon mo ang pagkaon sa imo amay agod kaunon niya, kag ihatag niya sa imo ang iya pagpakamaayo sa wala pa sia mapatay.”

¹¹ Pero si Jacob nagsiling sa iya iloy, “Nakahibalo ikaw nga si Esau bulbolon, pero ako akon wala sing bulbol.

¹² Basi hikapon ako ni tatay kag mahibaluan niya nga ginadayaan ko sia kag sa baylo nga pakamaayuhon niya ako iya pa ako pakamalauton.”

¹³ Ang iya iloy nagsabat, “Anak, ako ang manabat sang bisan ano nga pagpakamalaut sa imo. Himua lang ang ginasiling ko, kag lakat ka kag kuhai ako sing mga kanding.”

¹⁴ Gani naglakat si Jacob sa pagkuha sang mga kanding, gindala niya ini sa iya iloy, kag ginluto sang iya iloy ang pagkaon suno sa naluyagan gid sang iya amay.

¹⁵ Dayon ginkuha ni Rebeca ang labing maayo nga mga bayu ni Esau nga iya gintago sa balay, kag ginpasuksok niya ini kay Jacob.

¹⁶ Ginbutang ni Rebeca ang mga panit sang mga kanding sa mga butkon ni Jacob kag sa iya liog nga wala sing bulbol.

¹⁷ Kag ginhatag niya kay Jacob ang manamit nga pagkaon, upod ang tinapay nga iya ginluto.

¹⁸ Dayon si Jacob nagkadto sa iya amay kag nagsiling, “Tay!” Nagsabat sia, “Ano? Sin-o ka bala anak ko?”

¹⁹ Si Jacob nagsabat, “Si Esau ako, ang panganay mo nga anak. Ginhimo ko ang ginsiling mo sa akon. Kon mahimo magpungko ka kag magkaon sang pagkaon nga gindala ko sa imo, agod mabendisyunan mo ako.”

²⁰ Si Isaac nagsiling, “Paano mo nakuha ini sing madali, toto?” Si Jacob nagsabat, “Ang Ginoo nga imo Dios nagbulig sa akon sa pagpangita sini.”

²¹ Si Isaac nagsiling kay Jacob, “Palapit ka sa akon agod mahikap ko ikaw, kon bala ikaw gid matuod ang akon anak nga si Esau.”

²² Si Jacob nagpalapit sa iya amay kag ginhikap sia sang iya amay kag nagsiling, “Ang imo tingog daw tingog ni Jacob, pero ang imo mga butkon daw iya ni Esau.”

²³ Wala niya makilala si Jacob, kay ang iya sini mga butkon bulbolon pareho sang iya ni Esau. Bendisyunan na niya kuntani si Jacob,

²⁴ pero nagpamangkot sia liwat, “Ikaw gid bala ang anak ko nga si Esau?” Nagsabat sia, “Huo.”

²⁵ Nagsiling si Isaac, “Dalhi ako sang imo linuto. Sa tapos ako makakaon sini pagapakamaayuhon ko ikaw.” Gindalhan sia ni Jacob sing linuto, kag subong man bino nga ilimnon.

²⁶ Dayon ang iya amay nagsiling sa iya, “Toto, palapit ka kag haluki ako.”

²⁷ Sang pagpalapit niya sa paghalok sa iya amay nasimhutan ni Isaac ang iya mga bayu, gani ginbendisyunan niya sia nga nagasiling, “Ining kahamot sang akon anak kaangay sang kahamot sang latagon nga ginbendisyunan sang Ginoo.

²⁸ Kabay nga ang Dios maghatag sa imo sang tun-og halin sa langit, kag maghimo sang imo mga kaumhan nga mapatubason! Kabay nga hatagan niya ikaw sang madamo nga mga kalan-on kag bino!

²⁹ Kabay nga ang mga kapungsoran mangin-imo mga alagad, kag ang mga katawhan magsaludo sa atubang mo. Kabay nga maggahom ka sa imo mga pariente, kag kabay nga ang mga kaliwat sang imo iloy magsaludo sa imo atubang. Kabay nga ang nagapakamalaut sa imo pagapakamalauton, kag ang nagapakamaayo sa imo pagapakamaayuhon.”

Nagpakitluoy si Esau nga Bendisyunan ni Isaac

³⁰ Si Isaac nakatapos sang iya pagpakamaayo, kag sang nakahalin gid lang si Jacob, nag-abot si Esau halin sa iya pagpangayam.

³¹ Nagluto man sia sing manamit nga pagkaon kag iya ini gindala sa iya amay. Nagsiling sia, “Tay, kon mahimo magpungko ka kag magkaon sang linuto nga gindala ko sa imo, agod mabendisyunan mo ako.”

³² Si Isaac nagpamangkot sa iya, “Sin-o ka?” Nagsabat sia, “Si Esau, ang imo panganay nga anak.”

³³ Nagpalangurog ang bug-os nga lawas ni Isaac kag nagpamangkot sia, “Karon, sin-o yadtong nag-ihaw sing sapat kag nagdala sadto sa akon? Bag-o lang gid ko makatapos kaon kag mag-abot ka. Ginhatag ko sa iya ang akon katapusan nga bendisyon, kag mangin-iya ini sa wala sing katubtoban.”

³⁴ Sang pagkabati ni Esau sini, naghibi sia sing tudo gid nga nagahibubon-ot kag nagsiling, “Tay, bendisyuni man ako!”

³⁵ Si Isaac nagsabat, “Ang imo utod nag-abot kag nagdaya sa akon. Nakuha na niya ang bendisyon nga para sa imo.”

³⁶ Si Esau nagsiling, “Ikaduha na ini nga tion sang pagdaya niya sa akon. Gai ko man nga ang iya ngalan si Jacob. Ginkuha niya ang akon mga kinamatarong subong panganay, kag karon ginkuha man niya ang bendisyon nga para sa akon. Wala ka na gid bala sing may nabilin nga bendisyon para sa akon?”

³⁷ Si Isaac nagsabat kay Esau, “Ginhimo ko na sia nga agalon mo, kag ginhimo ko ang iya mga pariente nga iya mga ulipon. Ginhatagan ko sia sing kalan-on kag bino. Karon toto, wala na gid ako sing may mahimo pa para sa imo!”

³⁸ Si Esau nagpadayon sa pagpakitluoy sa iya amay: “Tay, isa gid lang bala ang imo bendisyon? Bendisyuni man ako, tay.” Kag naghibi sia sing tudo gid.

³⁹ Dayon si Isaac nagsiling sa iya, “Wala sing maayo nga duta para sa imo, wala sing tun-og gikan sa langit para sa imo mga uma.

⁴⁰ Magakabuhi ka paagi sa imo espada, kag mangin-ulipon ka sang imo utod. Pero kon magpamatok ka, makapanginpadlos ka sa iya gahom.”

⁴¹ Si Esau nagdumot kay Jacob, tungod kay ang bendisyon nga para sa iya ginhatag sang iya amay kay Jacob, kag si Esau nagsiling sa iya kaugalingon, “Ang paglalaw sa kamatayon sang akon amay madali na lang. Kon matapos ini, patyon ko si Jacob.”

⁴² Pero si Rebeca nakabati nahanungod sang plano ni Esau, gani ginpatawag niya si Jacob kag ginsingganan, “Pamati ka, si Esau nga imo utod nagadumot sa imo kag nagaplano sa pagpatay sa imo.

⁴³ Karon, nonoy, tumana ang ginasiling ko sa imo. Manghimos ka kag magkadto gilayon sa akon utod nga si Laban sa Haran.

⁴⁴ Didto ka lang anay sa iya tubtob magbugnaw ang kaakig sang imo utod,

⁴⁵ kag malipatan niya ang ginhimo nimo sa iya. Ipasugat ko ugaling ikaw didto. Ngaa duha gid ka mga anak ko ang madula sa akon sa isa ka adlaw?”

Ginpakadto ni Isaac si Jacob kay Laban

⁴⁶ Si Rebeca nagsiling kay Isaac, “Natak-an ako kag nagamuhan sang mga asawa ni Esau nga mga dumoluong. Kon mapangasawa ni Jacob ang isa pa sining mga babayi nga Hethanon, maayo pa nga mapatay na lang ako.”