Genesis 12 - Maayong Balita nga Biblia (2012)

Ang Pagtawag sang Dios kay Abram

¹ Karon ang Ginoo nagsiling kay Abram, “Halin ka sa imo kaugalingon nga duta, sa imo mga pariente, kag sa panimalay sang imo amay, kag magkadto ka sa isa ka duta nga igapakita ko sa imo.

² Hatagan ko ikaw sing madamo nga mga kaliwat kag mangin-isa sila ka daku nga pungsod. Bendisyunan ko ikaw kag himuon ko nga manginbantog ang imo ngalan, agod nga paagi sa imo madamo ang makabaton sing mga kaayuhan.

³ Pakamaayuhon ko ang mga nagapakamaayo sa imo, pero pakamalauton ko ang mga nagapakamalaut sa imo. Ang tanan nga mga pungsod sa duta magapangayo sa akon nga pakamaayuhon ko subong sang akon pagpakamaayo sa imo.”

⁴ Sang si Abram nagaedad sing setentay singko ka tuig, naghalin sia sa Haran, suno sa ginsiling sang Ginoo sa iya, kag si Lot nag-upod sa iya.

⁵ Gindala ni Abram ang iya asawa nga si Sarai, ang iya hinablos nga si Lot, ang tanan nga manggad kag ang tanan nga mga ulipon nga ila nakuha sa Haran, kag naglakat sila pakadto sa duta sang Canaan. Sang pag-abot nila sa Canaan,

⁶ si Abram naglatas sa duta tubtob nakalambot sia sa balaan nga kahoy sang More sa balaan nga lugar sa Siquem. Sa sadto nga panahon ang mga Canaanhon nagaestar pa sa sadto nga duta.

⁷ Ang Ginoo nagpakita kay Abram kag nagsiling sa iya, “Amo ining duta nga ihatag ko sa imo mga kaliwat.” Dayon si Abram nagpatindog didto sing altar para sa Ginoo nga nagpakita sa iya.

⁸ Sa tapos sini, nagsaylo sia sa bagatnan didto sa bukid sa sidlangan sang siudad sang Betel kag didto nagpatindog sia sang iya tolda sa gintung-an sang Betel kag Ay. Ang Betel sa nakatundan kag ang Ay sa sidlangan. Didto naghimo man sia sang altar kag nagsimba sa Ginoo.

⁹ Sang ulihi si Abram nagpadayon sa pagpanglakaton pakadto sa bagatnan sang Canaan.

Si Abram sa Ehipto

¹⁰ Karon may tiggulotom sa Canaan. Tungod kay tama gid ang tiggulotom, si Abram nagpabagatnan pa gid tubtob sa Ehipto, sa pag-estar didto sa malip-ot nga tion.

¹¹ Sang nagahinampot na sila sa dulonan pakadto sa Ehipto, nagsiling si Abram sa iya asawa, “Sarai, matahom ikaw nga babayi.

¹² Kon makita ikaw sang mga Ehiptohanon magasiling sila, ‘Asawa sia ni Abram,’ kag pagapatyon nila ako kag tugotan ka nga mabuhi.

¹³ Maayo pa nga singganon mo sila nga utod ko ikaw. Dayon tungod sa imo indi nila ako pagpatyon kag ayuhan nila ako.”

¹⁴ Sang makaabot na sila sa Ehipto, nakita matuod sang mga Ehiptohanon nga ang iya asawa matahom.

¹⁵ May mga opisyales sang hari nga nakakita sa iya kag ginsugiran nila ang hari kon daw ano katahom sa iya, gani gindala sia sa palasyo sang hari.

¹⁶ Tungod kay Sarai, gin-ayuhan sang hari si Abram kag ginhatagan sia sing mga karnero kag mga kanding, mga baka, mga asno, mga ulipon kag mga kamelyo.

¹⁷ Pero tungod kay ginkuha sang hari si Sarai, ang Ginoo nagpadala sing mga makangilidlis nga mga balatian sa hari kag sa iya mga ginsakpan sa palasyo.

¹⁸ Gani ginpatawag sang hari si Abram kag ginpamangkot, “Ano ining ginhimo mo sa akon? Ngaa wala ka magsiling sa akon nga asawa mo sia?

¹⁹ Ngaa nagsiling ka nga utod mo sia kag gintugotan mo nga kuhaon ko sia subong akon asawa? Yari ang imo asawa! Kuhaa sia kag maghalin kamo diri!”

²⁰ Ang hari nagmando sa iya mga tinawo nga kuhaon si Abram, gani ginkuha nila si Abram kag ginpahalin sia sa sadto nga duta upod sang iya asawa kag sang tanan nila nga mga pagkabutang.