Amos 5 - Maayong Balita nga Biblia (2012)

Pagpanawag sa Paghinulsol

¹ Mga pumoluyo sang Israel, magpamati kamo sa sining akon panalambiton:

² Ang pinalangga nga Israel napukan, kag indi na gid sia makabangon liwat! Yara sia nagahamyangon nga binayaan sa duta kag wala na gid sing may mabulig sa pagpabangon sa iya.

³ Ang Ginoo nga Gamhanan nagasiling, “Ang isa ka siudad sang Israel nagapadala sa inaway sing 1,000 ka mga soldado, pero 100 lamang ang makabalik. Ang isa na man ka siudad nagapadala sa inaway sing 100, pero napulo lamang ang makabalik.”

⁴ Ang Ginoo nagasiling sa mga pumoluyo sang Israel, “Palapit kamo sa akon, kag magakabuhi kamo.

⁵ Indi kamo magkadto sa Beerseba sa pagsimba. Indi ninyo ako pagpangitaon sa Betel, kay ang Betel manginwalay pulos. Indi kamo magkadto sa Gilgal, kay ang iya mga pumoluyo pagabihagon.”

⁶ Magkadto kamo sa Ginoo, kag magakabuhi kamo. Kon indi kamo magkadto sa iya, pagalamunon niya ang mga kaliwat ni Jose subong sang paglamon sang kalayo. Ang kalayo magasunog sang mga pumoluyo sang Betel kag wala sing makapalong sini.

⁷ Daw ano ka makakulogmat para sa inyo nga nagalubag sang katarungan kag nagaupang sa mga tawo sa pag-angkon sang ila kinamatarong!

⁸ Ang Ginoo naghimo sang mga bituon, ang Pleyades kag ang Orion. Ginabayluhan niya ang kadudulman sang kapawa, kag ang adlaw sang gab-i. Ginatawag niya ang mga tubig sang dagat kag ginaula niya ini sa duta. Ang iya ngalan amo ang Ginoo.

⁹ Nagadala sia sing kalaglagan sa mga isganan kag sa ila mga pamakod.

¹⁰ Kamo nga mga tawo nagadumot sa tawo nga nagaapin sang katarungan kag nagahambal sang bug-os nga kamatuoran sa mga korte.

¹¹ Ginapigos ninyo ang mga imol kag ginakuha ang ila mga patubas. Gani indi kamo makaestar sa matahom nga mga balay nga bato nga inyo ginpatindog, ukon makainom sing bino gikan sa matahom nga mga katamnan sang ubas nga inyo gintanom.

¹² Nakahibalo ako kon daw ano kadamo sang inyo mga sala kag kon daw ano kadalagku sang mga kalautan nga inyo nahimo. Ginahingabot ninyo ang maayo nga mga tawo, nagabaton kamo sing mga hamham, kag kamo ang nagaupang nga ang mga imol indi makabaton sing matarong nga paghukom sa mga korte.

¹³ Malaut ini nga mga panahon, gani ang mainandamon nga mga tawo nga inyo ginadumtan nagahipos karon nga mga inadlaw!

¹⁴ Tinguhaa ninyo ang paghimo sang matarong kag indi ang malaut, agod magkabuhi kamo. Dayon ang Ginoo, ang Dios sang mga hangaway manginkaupod ninyo, subong sang ginasiling ninyo.

¹⁵ Dumti ang malaut, higugmaa ang maayo, kag maghukom sing matarong sa mga korte. Ayhan ang Ginoo, ang Dios sang mga hangaway magamaluloy-on sa mga kaliwat ni Jose nga nabilin nga buhi pa sa sining pungsod.

¹⁶ Gani ang Ginoo, ang Dios sang mga hangaway nagasiling, “May mga pagpanalambiton kag paghinibi para sa inyo sa mga dalan sang siudad. Ang mga mangungoma upod sa binayaran sa paglalaw pagatawgon sa paglalaw sa inyo kon patay na kamo.

¹⁷ May mga pagpanalambiton sa mga katamnan sang ubas, kon mag-abot ako sa pagsilot sa inyo.” Amo ini ang siling sang Ginoo.

¹⁸ Daw ano ka makakulogmat para sa inyo nga luyag nga ang adlaw sang Ginoo mag-abot sa labing madali! Ano bala nga kaayuhan ang mahatag sina nga adlaw sa inyo? Ina mangin-adlaw sang kadudulman kag indi sang kasanag para sa inyo.

¹⁹ Ina manginkaangay sang isa ka tawo nga nagapalagyo sa leon kag nasugata niya ang isa ka uso! Ukon kaangay sang isa ka tawo nga nagpauli kag naghamboy sang iya kamot sa dingding kag pagakadton lamang sang man-og!

²⁰ Ang adlaw sang Ginoo magadala sing kadudulman, kag indi sang kasanag. Ina nga adlaw manginmadulom nga wala gid sing kasanag.

²¹ Ang Ginoo nagasiling, “Naakig gid ako sa inyo mga piesta, indi na ako makaagwanta sini!

²² Kon maghalad kamo sa akon sing mga halad nga sinunog kag halad nga uyas, indi ako sini magbaton. Kag indi ako magbaton sang inyo pinatambok nga mga sapat nga inyo dalhon sa akon subong halad sa pagpasalamat.

²³ Untata ang inyo magahod nga mga kanta. Indi ako maluyag magpamati sa tunog sang inyo mga arpa.

²⁴ Sa baylo pailiga ang hustisya kaangay sang sapa, kag ang katarungan kasubong sang suba nga wala nagamala.

²⁵ “Mga pumoluyo sang Israel, sa sulod sang kwarenta ka tuig sa desierto wala kamo magdala sa akon sing mga halad kag mga dulot.

²⁶ Pero karon magadala kamo sang mga imahen ni Sakut, ang hari sang inyo dios kag si Kaiwan, ang bituon nga inyo dios nga inyo ginsimba,

²⁷ kag dalhon ko kamo subong nga mga bihag sa duta sa unhan sang Damasco,” siling sang Ginoo, nga ang iya ngalan amo ang Dios sang mga hangaway.