Amos 4 - Maayong Balita nga Biblia (2012)

¹ Pamatii ninyo ini, mga kababayin-an sang Samaria, kamo nga nagatalambok kasubong sang nasagod sing maayo nga mga baka sang Basan, kamo nga nagadaugdaog sa mga maluya, nagapigos sa mga imol, kag nagasugo sa inyo mga bana nga nagasiling, “Dalhi ako sing ilimnon!”

² Subong nga ang Ginoo nga Gamhanan balaan, nagsaad sia nga nagasiling, “Ang mga adlaw magaabot gid nga guyoron nila kamo nga natuhog sa mga taga. Ang tagsa sa inyo manginsubong sang isda sa taga.

³ Pagadalhon kamo sa pinakamalapit nga bulwang sang pader kag ibuslog paggwa. Ini ang hambal sang Ginoo.

Ang Israel wala Madudla

⁴ “Mga pumoluyo sang Israel, lakat kamo kag magpakasala sa balaan nga lugar sa Betel! Kadto kamo sa Gilgal kag magpagusto sa pagpakasala! Magdala sing mga hayop nga ihalad kada aga, kag magdala sang inyo mga ikapulo kada-ikatlo nga adlaw.

⁵ Ihalad ang inyo tinapay subong halad sa pagpasalamat sa Dios, kag magpabugal kamo nahanungod sang inyo halad nga kinabubot-on! Kay amo ini ang luyag gid ninyo himuon!” Amo ini ang hambal sang Ginoo nga Gamhanan.

⁶ “Ako ang nagdala sing gutom sa tanan ninyo nga mga siudad, pero wala kamo magbalik sa akon.

⁷ Wala ko pagpaulana bisan kinahanglan gid ini sang inyo mga tanom. Ginpaulan ko sa isa ka siudad, pero wala ko pagpaulana sa isa. Ang isa ka uma gin-ulanan, pero ang isa nga wala pag-ulani nagmala.

⁸ Ang mga tawo sa duha ukon tatlo ka mga siudad nagluya sa kauhaw kag nagkadto sa kaingod nga siudad sa pagpangita sing tubig, pero kulang ang tubig nga ilimnon. Sa gihapon wala kamo magbalik sa akon.” Amo ini ang hambal sang Ginoo.

⁹ “Ginpadala ko ang mainit nga hangin agod malaya ang inyo mga tanom. Ang mga apan nagkaon sang inyo mga tanom sa lagwerta kag mga katamnan sang ubas, mga kahoy nga higera kag olivo. Pero wala kamo magbalik sa akon.” Ini ang hambal sang Ginoo.

¹⁰ “Ginpadala ko sa inyo ang pamalatian kasubong sang ginpadala ko sa Ehipto. Ginpamatay ko sa inaway ang inyo pamatan-on nga mga lalaki kag ginkuha ang inyo mga kabayo. Ginpuno ko sang kabaho sang patay nga mga lawas ang inyo mga kampo. Pero wala kamo magbalik sa akon.” Ini ang hambal sang Ginoo.

¹¹ Ang Ginoo nagasiling, “Ginlaglag ko ang iban sa inyo subong sang paglaglag ko sang Sodoma kag Gomorra. Kamo nga nakaluwas kaangay sang nagdabdab nga kahoy nga ginsabnit sa kalayo. Pero wala kamo magbalik sa akon.

¹² Gani, mga pumoluyo sang Israel, pagasilutan ko kamo. Kag tungod kay himuon ko ini, maghanda kamo sa pag-atubang sa akon nga inyo Dios nga magahukom sa inyo!”

¹³ Ang Dios amo ang naghimo sang mga bukid kag nagtuga sang hangin. Ginpahayag niya ang iya plano sa tawo, ginabayluhan niya ang adlaw sang gab-i. Sia ang nagagahom sa bug-os nga duta. Amo ini ang iya ngalan: Ang Ginoo, ang Dios sang mga hangaway!