Amos 3 - Maayong Balita nga Biblia (2012)

¹ Mga pumoluyo sang Israel, magpamati kamo sa sini nga mga pulong nga ginhambal sang Ginoo batok sa inyo, ang bug-os nga pungsod nga iya ginpagwa sa Ehipto:

² “Sa tanan nga mga kapungsoran sa duta ikaw lamang ang akon ginkilala kag ginkabalak-an. Tungod sini pagasilutan ko ikaw sang tanan mo nga mga sala.”

Ang Bulohaton sang Propeta

³ Makaupdanay bala ang duha ka tawo sa paglakat kon wala anay sila magkasugot?

⁴ Magangurob bala ang leon sa talon kon wala sia sing may nakita nga tulokbon? Magangurob bala sia sa iya lungib kon wala sia sing may nadakpan?

⁵ Masiod bala ang pispis sa duta kon wala sing paon sa siod para sa iya? Mapisik bala ang siod kon wala sing may nagtandog sini?

⁶ May magpatunog bala sang trumpeta para sa inaway nga indi makapahadlok sang mga tawo sa isa ka siudad? May makakulogmat bala nga matabo sa siudad kon indi ini paghimuon sang Ginoo?

⁷ Sa pagkamatuod ang Ginoo nga Gamhanan indi maghimo sing bisan ano nga butang kon indi niya anay mapahayag ang iya plano sa iya mga alagad nga mga propeta.

⁸ Kon magngurob ang leon, sin-o bala ang indi mahadlok? Kon ang Ginoo nga Gamhanan maghambal, sin-o bala ang indi makasugid sang iya mga pulong?

Ang Kalaglagan sang Samaria

⁹ Ipahibalo sa mga nagaestar sa mga palasyo sang Asdod kag Ehipto: “Tilipon kamo sing tingob sa mga bakulod sang Samaria kag tan-awa ang daku nga kagamo didto, ang mga pagpakasala nga nagakatabo sa siudad.”

¹⁰ Ang Ginoo nagasiling, “Ini nga mga tawo nagapuno sang ila dalagku nga mga balay sang mga butang nga ila nakuha paagi sa pangawat kag sa palugos. Indi sila makahibalo maghimo sing matarong.

¹¹ Gani ang kaaway magakibon sang ila duta, magaguba sang ila mga pamakod, kag magaagaw sang ila mga pagkabutang sa ila dalagku nga mga balay.”

¹² Ang Ginoo nagasiling, “Subong nga ang isa ka manugpahalab nakaagaw gikan sa baba sang leon sang duha ka tiil ukon isa lamang ka dulonggan sang karnero, subong man ako magaluwas sang mga Israelinhon nga nagaestar sa Samaria, pero diutay lamang ang maluwas sa ila nga karon nagasandiay sa malahalon nga mga higdaan.”

¹³ Ang Ginoo nga Gamhanan, ang Dios sang mga hangaway, nagasiling, “Karon magpamati ka, kag paandami ang mga kaliwat ni Jacob.

¹⁴ Sa adlaw nga silutan ko ang mga pumoluyo sang Israel tungod sang ila mga sala pagagub-on ko ang mga altar sa Betel. Ang mga pamusod sang tagsa ka altar magabuloblag kag mahulog sa duta.

¹⁵ Pagagub-on ko ang mga balay para sa tigtulognaw kag ang mga balay para sa tingadlaw. Ang mga balay nga naadornohan sing tiposo maguba, kag ang tagsa ka daku nga balay mawas-ag.” Amo ini ang hambal sang Ginoo.