Amos 2 - Maayong Balita nga Biblia (2012)

Moab

¹ Ang Ginoo nagasiling, “Ang mga pumoluyo sang Moab liwatliwat nga nagpakasala, kag tungod sini silutan ko gid sila, kay ginsunog nila tubtob mangin-apog ang mga tul-an sang hari sang Edom.

² Padalhan ko sing kalayo ang duta sang Moab sa pagsunog sang mga pamakod sang Keryot. Ang mga pumoluyo sang Moab magakalamatay sa malapuyot nga inaway, samtang ang mga soldado nagasininggit kag ang mga trumpeta ginapatunog.

³ Pagapatyon ko ang pangulo sang Moab kag ang tanan nga mga opisyales sini.” Amo ini ang hambal sang Ginoo.

Juda

⁴ Ang Ginoo nagasiling, “Ang mga pumoluyo sang Juda liwatliwat nga nagpakasala, kag tungod sini silutan ko gid sila, kay gintamay nila ang akon gid mga ginatudlo kag wala nila pagtumana ang akon mga sugo. Ginpatalang sila sang indi matuod nga mga dios nga gin-alagad sang ila mga katigulangan.

⁵ Gani padalhan ko sing kalayo ang Juda sa pagsunog sang mga pamakod sang Jerusalem.”

Ang Paghukom sang Dios sa Israel

⁶ Ang Ginoo nagasiling, “Ang mga pumoluyo sang Israel liwatliwat nga nagpakasala, kag tungod sini silutan ko gid sila, kay ginabaligya nila nga mangin-ulipon ang wala sala nga mga tawo nga wala makabayad sang ila mga utang, kag ang mga imol nga indi gani makabayad sang bili sang isa ka pares nga sandalyas.

⁷ Ginatapak nila ang mga maluya kag makaluluoy kag ginadaugdaog ang mga imol. Indi lang ang pamatan-on nga lalaki kundi subong man ang iya amay nagapakighilawas sa amo man nga ulipon nga babayi, gani ginapasipalahan nila ang akon balaan nga ngalan.

⁸ Sa tagsa ka lugar nga ila ginasimbahan nagahigda sila sa mga bayu nga ginprenda sa ila. Sa templo sang ila Dios nagainom sila sing bino nga ila ginkuha sa mga nakautang sa ila sing kwarta.

⁹ “Pero bisan pa sini, O akon mga tawo, tungod sa inyo ginlaglag ko sing bug-os ang mga Amornon, mga tawo nga subong kataas sang mga kahoy nga sedro kag subong kabakod sang terebinto.

¹⁰ Ginpagwa ko kamo sa Ehipto, gintuytoyan sa desierto sa sulod sang kwarenta ka tuig, kag ginhatag ko ang duta sang mga Amornon nga mangin-inyo.

¹¹ Ginpili ko ang iban sang inyo mga anak nga lalaki nga manginpropeta, kag ang iban sang inyo mga pamatan-on nga mangin-Nazareo. Mga tawo sang Israel, indi bala ini matuod? Ako, ang Ginoo, naghambal sini.

¹² Pero ginpainom ninyo ang mga Nazareo sing bino, kag ginmanduan ang mga propeta nga indi maghambal sang akon mga pulong.

¹³ Karon ipiton ko kamo subong sang pag-ipit sang karo nga puno sing patubas.

¹⁴ Bisan ang madasig magdalagan indi makapalagyo, ang makusog magaluya, kag ang mga soldado indi makaluwas sang ila kaugalingon nga kabuhi.

¹⁵ Ang mga manugpana indi makabato, ang madasig magdalagan indi makaluwas, kag ang mga tawo nga nagasakay sa kabayo indi makapalagyo sa pagluwas sang ila kabuhi.

¹⁶ Sa sadto nga adlaw bisan ang pinakamaisog nga mga soldado magabilin sang ila mga hinganiban kag magapalagyo.” Ang Ginoo naghambal sini.