Visimo 7 - Livulu lya Shukulu Kalunga

¹ Munange, anuka evi njilinakwendeka, co kesi wivale kulinga vinjinakuleke.

² Nyunga mashiko ange, co ukayoya, nyunga vilongesa vyange ngwe muukanyungu vufuko vwaseo yakama.

³ Nyunga vilongesa vyange simbu yoshe, co visoneke mu mbunge yove.

⁴ Mana apwe ngwe ndokazi yove, co kuzivuka kupwe ngwe musamba wove wa a mbunge.

⁵ Vilongesa evi vikakunyunga ku majwi akuseveleka a vanakazi va vakweni.

Munakazi wa cikwizi

⁶ A simbu imo, omo njakengele anja mu njanena ya njuvo yange,

⁷ co njamwene vakwenje vavangi vakweeva, oloni akati kavo, njazivukileo mukwenje umo wakweeva manene.

⁸ Ikeye wakele nakwenda mu tapalo, kuyehi na masambwa-ngila kuje kwakele munakazi umo. Co mukwenje ou wetile kuyehi na njuvo ya uje munakazi,

⁹ yapwile simbu ya cingwezi omo kwazivala laja.

¹⁰ Co uje munakazi waliwanene na uje mukwenje, uje munakazi wazalele vuzalo vwa vukwizi, co wakele na vutumbe mu mbunge yendi.

¹¹ Uje munakazi wapwile wakukenyuka, wakujeneka shwamwa, co simbu yoshe wakele nakwendangana mu vitapalo,

¹² nakwimana a masambwa-ngila, na mu vitapalo, na mu mitambela ya vulandeselo vwa vyuma.

¹³ Wavumbatelele uje mukwenje, nakumutsemba, co akukaluka kwendi wendekele ngwendi,

¹⁴ “Lelo njinakombelela vin̄ombelo vya kulitombola, co lalo njili na situ ije inasalao yakulingisa ciwano.

¹⁵ Njinakushakezekele, co njinakuwana.

¹⁶ Njinafwiki vulili vwange na vinanga vya linyu vya mavala-mavala vya ku Ingito.

¹⁷ Njinakwitiho mazi a miila, na malimangango, na sinamone.

¹⁸ Ija tuvwaelele na cizemo vutsiki vwoshe. Tujolele amo na cizemo.

¹⁹ Munalume wange waiho embo, nai vungenzi vwa kulyala.

²⁰ Nambatele vimbongo vyavingi, co kaija vwasi noo visimano vivali.”

²¹ Ngecivene, uje munakazi wazembelekele uje mukwenje nakumweseka na majwi endi akuseveleka.

²² Aje vene waile nendi ngwe ngombe aya nakumutsiya, nambe ngwe mbambi uje atsa mu mweto,

²³ noo mukili ukamutiva a mbunge, mukwenje nafu ngwe kazila uje atsa mu mweto, kazivukile ngeci mwonyo wendi uli mu vushonde.

²⁴ Ngecivene, yeni vana vange, tolilileni kuli yange, zivilileni evi njendeka.

²⁵ Kesi mutave munakazi wa cifwa cangacije akoke vimbunge vyeni, kesi muye nakumukavangeya.

²⁶ Munakazi wa cifwa cangacije naviisa nakutsiisa vanalume vavangi vaje naumo wai asa kuvalava.

²⁷ Nga muya ku njuvo yendi, co muli mu ngila yakuya ku vukalo vwa vatsi. Ikeyo ngila yayasi yakuya ku kutsa.