Visimo 6 - Livulu lya Shukulu Kalunga

Kunangula kukwavo lalo

¹ Munange, kuma wakulaesele kulyamena na likongo lya mukweni ndi?

² Co majwi ove anakukwata ngwe mweto.

³ Nga unalingimo munange, co yove uli mu mavoko a uje munu, oloni eyi ikeyo ngila yakutundamo, unapande kuya kuli ikeye, likeese nakumulomba ngeci akusambese.

⁴ Unapande kulinga ngeci simbu kanda ulale, nambe kuhwima.

⁵ Tunda mu mweto ou ngwe kazila, nambe ngwe mbambi atewa ciyambi.

⁶ Vaka-vulwa vanapande kulilongesela akuyoya kwa mishwa.

⁷ Vakevo kuvesi na ntwama, nambe mwene, nambe mwata,

⁸ oloni vakakungulula vyakulya vyavo a simbu ya ndombo, nakulivwaesela a cisika.

⁹ Visimbu vingaijo ukalala, yove mulwa? Simbu ikajo ukenduka?

¹⁰ Wendeka ngwove, “Njicishuluvaleko lika. Njihwimeko kamandondo.”

¹¹ Oloni omo uje mulwa acili mu tulo, vuutu vukamulwisa ngwe lipwepwe.

¹² Vanu vakujeneka seo, vakevo lalo vaka-vuvi vakai nakwitanganamo nakwendeka vya makuli.

¹³ Vakemwina na mesho, co vanyateya na milavo mukukwisa vakwavo.

¹⁴ Simbu yoshe vatumba matumbe a vuvi mu vimbunge vyavo, co vashangumuna vukalu kwoshe-ikwoshe.

¹⁵ Omwo a eci, vwasi-vwasi n̄avava ikaija ali vakevo, co vakavulumuka manene kujeneka kukanguka.

¹⁶ Kuli vyuma vitanu na vivali vije Shukulu Kalunga vyazinda, vikevyo vyapwa vya vunyengwe kuli ikeye.

¹⁷ Kulyalesa nakwendeka makuli, kutsiya vanu vakujeneka mulonga,

¹⁸ mana akuyongwela vakweni matumbe amavi, vanu vaje vazambula mukulinga vuvi,

¹⁹ vukaleo vwa makuli ali mukwavo, na munu uje muka-kushangumuna vukalu akati ka vakwavo.

Kunangula a vupangala

²⁰ Munange, nyunga lishiko lyakuleka isho, co kesi wivale vilongesa vya vanyoko.

²¹ Nyunga majwi avo simbu yoshe, ashweke mu mbunge yove.

²² Vilongesa vyavo vikakutwamenena mu ngila omo wenda, vikevyo vikakunyunga ku vutsiki omo ulala, nakukunangula ku mutanya omo winduka.

²³ Vilongesa vyavo vyapwa ceke, kunangula kwavo kukakulongesa mwakuyoyela.

²⁴ Kunangula oku kukakutundisa ku vanakazi vavavi, nakukutundisa ku majwi akukokweya a vanakazi va vakweni.

²⁵ Kesi utave munakazi wa cifwa cangacije akukokweye na vuvwa vwendi, nambe na mesho endi embwe.

²⁶ Munalume asa kukumuna cikwizi na ndando ya mukasha wa likende, oloni kulinga vupangala na munakazi wa mukweni cikamanesa vyoshe vije ulinavyo.

²⁷ Kuma wasa kwambata tuhya a nulo yove na vuzalo vwove kujeneka kwenya?

²⁸ Kuma wasa kwenda a manungu a tuhya mendi ove kwenya ndi?

²⁹ Cinapu vushonde vwakama kulala na munakazi wa mukweni. Woshe uje acilinga, vakamuhisa.

³⁰ Vanu kuvesi kuvayesa mwizi nga aiva vyakulya omo ali na njala,

³¹ oloni nga uje mwizi vanamukwata, co napande kufweta visimbu vitanu na vivali, a vyuma vije vyevile, co napande kufweta vyoshe vije vyali navyo.

³² Oloni munu uje alinga vupangala kesi na mana. Alinakulinyongesa lika ikeye vavenya.

³³ Kuvakamusingimika embwe, oloni vakamupupa, nakumushendumuna simbu yoshe.

³⁴ Kuluvala kwa munalume omwo lifuwa lya munakazi wendi kumunenesa kulinga muuka, co kakala lalo na mema ku mbunge omo alinga shambandinga.

³⁵ Kakatambula ndando yakumufwetela, kukwesi vwana vwavungi vuje vukasa kuhwisa vukalu vwendi.