Visimo 27 - Livulu lya Shukulu Kalunga

¹ Kesi ulyalesele a imene, omwo kuwasa kuzivuka vije vikasholoka mukati ka lelo na imene.

² Kesi ulishangazale yove vavenya embwe, vakushangazale vanu veka.

³ Vulemu vwa limanya na lishen̄avu, kuvilyeseka nakulema kwa vukalu vuje vuvakanene vilema.

⁴ Kuluvala kwapwa muuka, nakushandola, oloni cipululu cinahyana kuluvala.

⁵ Mwamuvwa kunangula mukweni citona-mesho kutuvakana ayongole ngwendi kuwamumbile mbunge.

⁶ Musamba wove nameme nakuvulumuna anga wamuvwa. Oloni omo citozi akambeka livoko lyendi a citsili cove, co nyanyama!

⁷ Omo unakuta, wasa kuvyana vuki, oloni omo uli na njala, nameme vyakulya vyakulula vipwelelela.

⁸ Omo munu ali kulyala na limbo lyendi, napu ngwe kazila ali kulyala na lishwa lyendi.

⁹ Mazi amavwa akunika mwamuvwa, avwaelelesa ku mbunge, na vusamba vwakukola vukwana nzili.

¹⁰ Kesi wivale vasamba vove nambe vasamba va isho. Nga uli mu tuyando kesi ulombe ndolome yove akukwase, mundambo uje walyata nendi, asa kukukwasa kutuvakana ndolome yove uje ali kulyala.

¹¹ Munange, kala na mana, co njikavwaelela njikasa kukumbulula munu woshe uje anjipaya.

¹² Vaka-mana omo vamona tuyando twija, co vatwongoloka, oloni muka-kujeneka kuyongola akovelamo, co kulutwe aliveya.

¹³ Vanapande kukutambula cikoveyo cove nga wacanene kupwa kapopo ku mulonga wa mungenzi, apwa ngwe nomo omwo nalizivasana na munakazi wa muyati weka.

¹⁴ Kumenekela musamba wove mukumwindwisa na lijwi lyakutambekela, kunalifu nakusinga.

¹⁵ Munakazi wa kanwa napu ngwe muwakandweke mema a nyonzi ya mungole.

¹⁶ Cinapu cuma cacasi kukwata lihunzi nambe kukumateya mazi mu livoko lyove, kutuvakana kwolwesa munakazi wa kanwa.

¹⁷ Vanu valilongesa ku vanu na vakwavo, ngwe cikuvo cotanganya cikuvo na cikwavo.

¹⁸ Uje avwaesa muti wa mukuyu, akalya vushuka vwawo, na munu lalo uje ononoka Shukulu Kalunga kendi, vakamusingimika.

¹⁹ Omo munu alikengela mu mema, amona cihanga cendi, mukemwo lalo na viyongola vili mu mbunge ya munu vimusholola ikeye vavenya.

²⁰ Lishungu lya vanu lyafwa ngwe vukalo vwa vatsi, simbu yoshe viyongola vyeka kuvili.

²¹ Ngolinde na siliva vavyeseka mu tuhya twa lutengo, oloni munu vakamweseka mukumushangazala.

²² Nameme upupa cilema manene, vulema kuvutundu muli ikeye.

²³ Nyunga mwamuvwa vimanga vove, na vingombe vove,

²⁴ omwo vufuko kuvwesi kukala simbu yoshe. Nameme vumwene kuvwesi kukala simbu yoshe.

²⁵ Omwo mwila wakuma vanaukele, co kumena mwila wauha, co mwila wakumena kumukulo wa lilundu vaukungulwila amo.

²⁶ Wasa kutonga vuzalo ku maka a vimanga vove, co ulanda livu na vimbongo uwana akulandesa vimembe vove vamo.

²⁷ Co kuje ku vimembe vakwavo lalo kukekwo kuuwana mavele akulwa na naanga vove, amo na vangamba vove voshe.