Visimo 25 - Livulu lya Shukulu Kalunga

Visimo vya Solomoni vikwavo

¹ Evi lalo vikevyo visimo vya Solomoni, vije vivasonekele vanalume va mu mbanja ya Mwene Hezekiya wa mu Yunda.

² Tusingimika Njambi a vyuma vije vyakushweka, tusingimika vimyene akutunungulwila vyuma vije vyakushweka.

³ Kuwasa kuzivuka vije vyayongola mwene, viyongola vyendi kesi vikevyo viyongola vyetu, viyongola vya mwene vinapu ngwe akamwa ya melu nambe ngwe nzinga ya mema a kalunga.

⁴ Siliva vanapande kuyijelesa, simbu kanda muka-kufula afule cuma cacivwa.

⁵ Vanu vaka-vuvi vanapande kuvatundisa, simbu kanda mwene ashwane mu vushunga.

⁶ Kesi ulimwese kupwa uwakama omo wimana ku mesho a mwene.

⁷ Cinapu cuma cacivwa nga mwene ikeye vavenya akwana mwela wa kasingimiko, kutuvakana yove kushauka ku mesho a vamyata va mwene.

⁸ Kesi uzambwile kutwala mukweni ku mbanja. Nga mukaleo weka akawana ngeci yove u muka-mulonga, co ukaziva shwamwa yakama manene.

⁹ Nga akati kove na mukweni ali vimata, livwaeseni yeni vavenya akati keni, co kesi mulekeko vakweni veka lalo.

¹⁰ Kutewa munu woshe azivuka, co lizina lyove likashauka.

¹¹ Lijwi lyalivwa lije vendeka lalo a simbu yaivwa, linapu ngwe cimweso ca ngolinde civanatumbika mu siliva.

¹² Kunangula kwakuvwa kuli na seo manene kutuvakana kanzeya ka ngolinde, nambe vyakuzala vya senga vyakulinga na ngolinde yaivwa.

¹³ Muluwa wamuvwa akasimpisa mbunge ya shukulu yendi uje namutumu, ngwe mema akutonola muwakasimpisa vimbunge vya vanu a simbu ya kuteja.

¹⁴ Vanu vaje vakakulaela vwana vuje kuvesi kwana, vanapu ngwe mashelwa na lihunzi, vije kuvyesi kunena nyonzi.

¹⁵ Akupwa munu wakusimpa wasa kusindiya mwene, co lijwi lyakwendeka na cizemo likamanesa vukalu.

¹⁶ Nga uwana vuki lyako vwavundondo, kutewa ukutilila manene, co uvushanja.

¹⁷ Kesi uyayaye ku njuvo ya mukweni kushwakumo, kutewa akakwenukwa, co akakuzinda.

¹⁸ Vukaleo vwa makuli ali musamba wove, vunapu ngwe kumulwisa na moko ya mukwale, nambe na mbweti, nambe na mukili wakuvambuka.

¹⁹ Musamba uje kuwasa kukulaela a simbu ya vukaleo, napu ngwe liyo lya lisinga nambe ngwe lindi lije lili na mbandu.

²⁰ Kwimbila mwaso munu ali mu vusiwa kunapu ngwe kushulula munu vuzalo vwendi a litangwa lya lisika, nambe ngwe kukwita mwongwa a mbandu.

²¹ Nga citozi cove ali na njala, mwane vyakulya alye, nambe nga ali na lihwila, mwane mema anwe.

²² Eci cinapu ngwe kulundika manungu a tuhya a mutwe wendi, co Shukulu Kalunga akakwana cikandelela.

²³ Lufwe lukanena vukalu, ngwe lihunzi lya ku kunto mulikanena nyonzi.

²⁴ Mwamuvwa kukala mu cimbimbi ca njuvo yove, kutuvakana kukala mu njuvo amo na munakazi wa kanwa.

²⁵ Kuziva muzimbu wauvwa wa ku lifuti lya kulyala, kunapu ngwe munu anwa mema akutonola omo ali na lihwila.

²⁶ Omo muka-vushunga atava muka-vuvi, napu ngwe mazilo aje vanombila mu lisima lya mema amavwa.

²⁷ Kesi mwamuvwa kulya vuki vwavungi, mwamuvi lalo ku vanu kulishakezekela vulemu vakevo vavenya.

²⁸ Munu uje aluvala-luvala simbu yoshe, napu ngwe nganda ya civumbe.