Visimo 24 - Livulu lya Shukulu Kalunga

-19-

¹ Kesi uliveyele vaka-vuvi, nambe kulikwata navo vusamba embwe.

² Vimbunge vya vaka-vuvi viyongola lika vya lwozi, co tunwa twavo twendeka lika vya muuka.

-20-

³ Njuvo vakaitungu a luvula lwa mana nakuzivisisa,

⁴ mana anapande kushulisa milili na vufuko vwoshe vwa seo.

-21-

⁵ Kukala na mana kunapu kwakuvwa kutuvakana kukala na nzili, eyo, mana apwa cuma ca seo manene kutuvakana kukala na nzili.

⁶ Nga vakutwamenena mwamuvwa wasa kulwa nzita, nga vanu vavangi vakunangula wasa kuhyana nzita.

-22-

⁷ Visimo vya mana, vyapwa vyakulova manene kuli cilema kuvizivisisa. Ikeye kesi kwendeka omo vasimutwiya vin̄anda vyakama.

-23-

⁸ Uje atumba matumbe a vuvi, vakamutumbula muka-kunena vukalu.

⁹ Viyongola vya vulema vyapwa vuvi. Vanu vazinda munu uje ashendumuna vakwavo.

-24-

¹⁰ Nga uzeya a simbu ya vukalu, co nzili yove ipwa yaindondo.

-25-

¹¹ Amena vaje vavatwala ku kutsa, vayesa vaje vaya nakuvatsiya.

¹² Wasa kwendeka ngwove, “Ou kesi mulonga wange,” oloni Njambi azivuka viyongola vyove. Ikeye alinakukenga ali yove, co azivuka viyongola vyove. Co akakwana cikandelela ku vyuma vije ulinga.

-26-

¹³ Munange, lya vuki omwo vwapwa vwavuvwa. Vuki vwakundweka mu ngenga, vupwelelela mu kanwa kove.

¹⁴ Unapande kuzivuka ngeci mukemwo muwanafu mana ku mwonyo wove. Nga ukala na mana, co cinyangavili cove kucikahu.

-27-

¹⁵ Kesi upwe ngwe vaka-vuvi vaje vavandamena ku njuvo ya muka-vushunga nakumulwisa, nakwambata vivala vyendi.

¹⁶ Nameme muka-vushunga awa visimbu vitanu na vivali, akatukamo lalo, oloni vaka-vuvi tuyando tukavanyongesa.

-28-

¹⁷ Kesi uvwaelele omo citozi cove ali mu vukalu, co lalo kesi ujolele omo citozi cove atanuka.

¹⁸ Kutewa Shukulu Kalunga acimona, co aluvala, co kakamunyanyamesa.

-29-

¹⁹ Kesi ulishoshomwene omwo vaka-kulinga vuvi, nambe kuliveyelavo.

²⁰ Simbu yaindondo lika vaka-vuvi vaziluka ngwe mulangi wa ndeya ije izima.

-30-

²¹ Munange, singimika Shukulu Kalunga, nakusingimika lalo mwene. Kesi ulipandakane na vanu vaje vaka-kuvatengulukila,

²² omwo vwasi-vwasi vukalu vukaija a vanu vangacije. Kuma iyajo azivuka tuyando tuje Njambi nambe mwene anena?

Visimo vikwavo lalo vya mana

²³ Evi lalo vikevyo visimo vya vaka-mana. Kusompela vulemu kunapu kwakuvi,

²⁴ woshe uje asambesa muka-mulonga, vanu voshe vakamusinga nakumuzinda.

²⁵ Oloni vaje vahisa muka-mulonga, vakavwaelela, co vakakala na vivezikiso.

²⁶ Kukumbulula kwa kulongwa kunapu cimweso ca vusamba vwa vushunga.

²⁷ Akulivanga vwaesa mahya ove, asinoni utunge njuvo yove.

²⁸ Kesi upwe mukaleo wakulwisa mukweni wakujeneka mulonga, nambe kwendeka vyuma vyakutanganesa ali ikeye.

²⁹ Kesi wendeke ngwove, “Njikalinga kuli ikeye ngwe mwanjilingile!”

³⁰ Njetile ku lihya lya cilema wa mulwa, na ku citungu cendi ca mikolovozi ya vushuka vwa vinyu.

³¹ Mu lihya lyendi mwamenene mutiva-ntumbi, na shaku. Co civumbe ca mamanya casiwukile.

³² Omo njakengele cuma eci, njaciyongwele, co njalilongeseleleo,

³³ nga wendeka ngwove, “Njicitumbameko, nakulalako kamandondo, nakwetekako mavoko ange mukuhwimako kasimbu lika.”

³⁴ Vuutu vukakulwisa ngwe mwizi uje ali na vitwa.