Visimo 22 - Livulu lya Shukulu Kalunga

¹ Lutsimo lwaluvwa na kasingimiko, vili na seo kutuvakana siliva na ngolinde.

² Muka-kufuka na kautu voshe vanafu mumolika, Shukulu Kalunga ikeye wavatangele.

³ Omo vaka-mana vamona vukalu vwija, co vatewa, oloni muka-kujeneka mana ayako, co akalikovelesa mu vukalu.

⁴ Ononoka Shukulu Kalunga, pwa muka-kulikeesa, co ukawana vufuko, na kasingimiko nakuyoya simbu yakama.

⁵ Vilema vakende mu ngila ije ili na mambimbo, oloni nga uzema mwonyo wove tunda ku myeto ije ili mu ngila ya vaka-vuvi.

⁶ Longesa mwanike ngila ije mwanapande kwendela, co omo nakolo kakatundumo.

⁷ Tuutu vakavashwana kuli vaka-kufuka, vaje voshe vakumuna vapwa vindungo va vaka-kukumwisa.

⁸ Uje akuva vuvi akateja tuyando, co kuluvala manene kwa vaka-vuvi kukahwa.

⁹ Munu muka-mema ku mbunge akavezika, omwo alinakwana vyakulya vyendi ku tuutu.

¹⁰ Nga usheka vaje vashendumuna vakwavo, kulijokota na lwozi vikahwa.

¹¹ Uje azema kukala na mbunge yakujela, co endeka vya ngozi, mwene akapwa musamba wendi.

¹² Mesho a Shukulu Kalunga akamono muka-mana, oloni anyongesa majwi a muka-makuli.

¹³ Muka-vulwa atumbama mu njuvo endeka ngwendi, “Nga njituuka anja nakuya ku vipangi ndumba anjikwata.”

¹⁴ Vupangala na munakazi wambala vunapu ngwe mbulu yakulova, nga uluvalesa Shukulu Kalunga, co ukawilamo.

¹⁵ Vulema vukasata mu vimbunge vya vanike, oloni kuvapupanga vivanzi vyakuvalongesa, co civutundisamo.

¹⁶ Nga wana vwana kuli vaka-kufuka, nambe kuyandesa tuutu ngeci ufuke, ukapwa lika u kautu yove vavenya.

Visimo vya mana vyakupwa makumi atatu

¹⁷ Tolilila njikulongese visimutwiya vya vaka-mana. Lilongese vilongesa vyavo,

¹⁸ co ukavwaelela nga uvyanuka nakuvinyunga.

¹⁹ Njikulongesa lelo, ngeci ukulaele kuli Shukulu Kalunga.

²⁰ Yange njakusonekela visimutwiya vyakupwa makumi atatu. Visimutwiya evi vinapu vya mana, co lalo vyasa kukunangula mwamuvwa,

²¹ nakukulongesa muvwafwa vushunga. Omo vakutuma kukashakezeka vushunga, co ukanena kukumbulula kwakuvwa.

-1-

²² Kesi unyanyamene tuutu, nambe kuvakwisa omo vali mu mbanja.

²³ Omwo Shukulu Kalunga ikeye muka-kuvalwila, co vyoshe vije ulinga kuli vakevo, Shukulu Kalunga akavilinga lalo kuli yove.

-2-

²⁴ Kesi ulikwate vusamba na vanu vaka-kuluvala-luvala vwasi, nambe kwenda amo na munu muka-litoto.

²⁵ Kutewa ukalilongesa vilinga vyavo, co ukonwa kutenguluka.

-3-

²⁶ Kesi ukulaese kufwetela munu mulonga.

²⁷ Nga unonwa kufweta, co vakambata nambe vulili vwove.

-4-

²⁸ Kesi ukashwenyese cimweso ca nginga yalaja ije ivatwile vakukulwila vove.

-5-

²⁹ Nga upanga vipangi vyove mwamuvwa, co ukapangela vimyene, kuukapangela vanu vangoco embwe.