Visimo 17 - Livulu lya Shukulu Kalunga

¹ Mwamuvwa kulya livanda lyakuma lya likende mu kwoloka, kutuvakana kukala na ciwano mu njuvo muje muli lwozi.

² Ngamba wa mana akashika mwana uje azivisa shwamwa, ngamba wa cifwa cangacije akatambula vushwana amolika na mwana wa shukulu yendi.

³ Ngolinde na siliva vakavyeseka na tuhya, oloni Shukulu Kalunga akeseka viyongola vya munu.

⁴ Vaka-vuvi vakatolilila ku viyongola vya vuvi, co vaka-makuli vakatolilila ku makuli lalo.

⁵ Uje ashendumuna tuutu alinakushaula Njambi uje wavatangele, uje avwaelela a tuyando twa vakwavo vakamuhisa.

⁶ Tukulukazi vakalyalesa ali vatekulyavo, vana lalo vanapande kulyalesa ali visemi vavo.

⁷ Vaka-vulemu kuvesi kwendeka makuli, co cilema kesi na cuma cimo cacivwa cakwendeka.

⁸ Vanu vamo vayongola ngeci lizika-kanwa likapanga ngwe manseno, co vakulaela ngeci lyasa kupanga cuma cimo.

⁹ Nga ushaka vanu vakuzeme vasambese omo vakuviisila, kwanuka-anuka milonga ikutsiisa vusamba.

¹⁰ Munu muka-mana asa kuziva akumwendekela lumolika, oloni cilema kasa kuziva kumwendekela nambe kumupupa visimbu vyakupwa 100.

¹¹ Kutsa kwija ngwe muluwa wa ngozi ku vaka-vuvi vaje simbu yoshe vashangumuna vukalu.

¹² Cili kulutwe kuliwana na ndumba ivananyeka vana vendi, kutuvakana kuliwana na cilema alinga vya vulema vwendi.

¹³ Nga wilwisila vyavivi ku vyavivwa, co vuvi kuvukatundu mu njuvo yove.

¹⁴ Kushangumuka vimata kunapu ngwe mema azikuka mu lishali, ngecivene, likele kushangumuka vimata simbu kanda lwozi lushangumuke.

¹⁵ Uje asambesa muka-vuvi na uje ahisa muka-vushunga, voshe muvuvali vwavo vanapu vunyengwe kuli Shukulu Kalunga.

¹⁶ Omwo vikajo vilema vali na vimbongo vije vasa kulikwasa navyo mukulilongesa, oloni vakevo kuvesi na mana?

¹⁷ Vasamba vamwesa cizemo cavo simbu yoshe, vavushoko vanasemukila ngeci vamwene amo tuyando.

¹⁸ Kuvanga munu wakujeneka mana lika ikeye akulaesa kwana kapopo ku likongo lya mukwavo.

¹⁹ Kuzema vuvi kunapu kuzema tuyando, nga simbu yoshe ulyalesa ulikokela lika tuyando.

²⁰ Munu wakulindwa mbunge kesi kuwana vyavivwa, muka-kwendeka makuli alikokela lika tuyando ikeye vavenya.

²¹ Kukita mwana wakweeva, kunenesa visemi vendi kulinyenga nakujeneka kuvwaelela.

²² Mbunge yakuvwaelela ikangwisa muvila, oloni mbunge yakulinyenga simbu yoshe iyondwesa muvila.

²³ Maako vavavi vakatambula mazika-kanwa mu vuse-vuse, ngeci vaengese n̄anda.

²⁴ Muka-mana mesho endi ali ku vyuma vya mana, oloni mesho a cilema akenga ku vyuma vyangoco.

²⁵ Mwana wa cilema akazivisa shwamwa ishe, nakunenela vaina vakumukita vusiwa.

²⁶ Kesi mwamuvwa kuhisa munu wakujeneka mulonga, nambe kupupa vaka-vushunga omwo vushunga vwavo.

²⁷ Uje anyunga majwi endi ali na mana, na munu uje azivuka mwamuvwa vyuma akasimpi.

²⁸ Nameme cilema nga noloka kuluu, vamutumbula wakunyanyama na muka-mana.