Visimo 15 - Livulu lya Shukulu Kalunga

¹ Kukumbulula kwakuvwa kwolwesa vukalu, oloni lijwi lyakuvavalesa mbunge, lishangumuna vukalu.

² Omo vaka-mana vendeka, vendeka mana, oloni vilema vendeka vyangoco.

³ Mesho a Shukulu Kalunga ali kwoshe-ikwoshe. Ikeye alinakukenga ali vaka-vuvi, na ali vaka-vushunga.

⁴ Majwi a ngozi apwa cemba cacivwa, oloni majwi a vukalu, akavavalesa ku mbunge.

⁵ Cinapu vulema kwombwanesa vije vyakulongesa isho, oloni cinapu cuma cacivwa kunyunga kunangula kwendi.

⁶ Vaka-vushunga vakanyungu vufuko vwavo, oloni vaka-vuvi vakazimbalesa vufuko vwavo, omo simbu yaikalu yeta.

⁷ Majwi a vaka-mana ashandola mana, oloni vikuyongola kwa vilema kesi kwa mana embwe.

⁸ Shukulu Kalunga akazivi vunyengwe na vin̄ombelo vya vaka-vuvi, oloni avwaelela na malombelo a vaka-vushunga.

⁹ Shukulu Kalunga akazivi vunyengwe a vingila vya vaka-vuvi, oloni wazema vanu vaje valinga vya vushunga.

¹⁰ Nga ulinga vya kupenga-penga, co vakakuhisa manene, nga kuutava kukunangula, co ukatsa.

¹¹ Nambe vukalo vwa vatsi, kuvwasa kuvindika Shukulu Kalunga kuzivuka vije vilimo, co munu asa kushweka vatijo viyongola vyendi ku mesho a Njambi?

¹² Vaka-kulyalesa kuvesi kushaka kuvanangula, co kuvesi lalo kulomba kuvanangula kuli vaje vakunyanyama.

¹³ Omo vanu vanavwaelela, co vajola-jola, oloni omo vaviilila, co vazeya.

¹⁴ Vihwanga vakashaka kulilongesa, oloni vilema vanapwisamo na vulema vwavo.

¹⁵ Kuyoya kwa kautu, simbu yoshe kwapwa kwa kayando, oloni vanu vakuvwaelela, simbu yoshe vajolela mukuyoya kwavo.

¹⁶ Mwamuvwa kupwa u kautu oku ukomoka Shukulu Kalunga, kutuvakana kupwa u muka-kufuka, nakukala mu tuyando.

¹⁷ Mwamuvwa kulisa visapa-sapa ku njuvo kuje kuli cizemo, kutuvakana kulisa situ ya mazi ku njuvo kuje kuli cizindo.

¹⁸ Mbunge ya matoto ikashangumuna vimata, oloni kusimpa, kukanene kwoloka.

¹⁹ Nga u mulwa, co ukawana vukalu mukuyoya kwove, oloni nga u wa kulongwa, co kuukayanda.

²⁰ Mwana uje wa mana avwaelelesa ishe, oloni mwana wakweeva, akolesa vaina shwamwa.

²¹ Vilema vavwaelela na vulema vwavo, oloni vaka-mana, vakalingi vyuma vya vushunga.

²² A kunangula kwakuvwa vyuma vikaviya, oloni nga kuli munga ya vaka-kunangula, vyuma vikavwaa.

²³ Kukumbulula cihula a simbu yaivwa, kunenela vanu kuvwaelela.

²⁴ Vanu vakunyanyama vakende mu ngila ije yakushungama itwala ku mwonyo, oloni kesi ngila ije ishelumuka ku vukalo vwa vatsi.

²⁵ Shukulu Kalunga akanyongesa vinjuvo vya vanu va kulyalesa, oloni akanyunga vufuko vwa vifwile.

²⁶ Shukulu Kalunga wazinda viyongola vya vuvi, oloni akavwaelela na majwi a vaka-kujela mu vimbunge.

²⁷ Muka-cipululu akanene vukalu ku naanga yendi, oloni uje azinda lizika-kanwa, akayoya.

²⁸ Vaka-vushunga vakayongola akulivanga simbu kanda vakumbulule, oloni vaka-vuvi vakazambula kukumbulula, co vakalikovelesa mu vukalu.

²⁹ Omo vaka-vushunga valombela, Shukulu Kalunga avatolilila, oloni kesi kutolilila ku malombelo a vaka-vuvi.

³⁰ Cihanga cakujola-jola, civwaelelesa mbunge, na muzimbu wauvwa, ukolesa muvila.

³¹ Nga utolilila omo vakunangula, co ukapwa muka-kunyanyama.

³² Nga uvyana kulilongesa, ulinakuliyeluwisa lika yove vavenya, oloni nga utava kukunangula, co ukapwa muka-kunyanyama.

³³ Kukomoka Shukulu Kalunga, kulongesa munu mana, akulivanga unapande kulikeesa, asinoni uwane kasingimiko.