VaLevi 9 - Livulu lya Shukulu Kalunga

Alone akombelela vin̄ombelo

¹ Co a litangwa lyamucitanu na atatu, omo vamanesele matangwa avo akuvakundika, Mosesa wasanene Alone na vana vendi, amo na vantwama va Isalele.

² Co wendekele kuli Alone ngwendi, “Twala muna ngombe wa nkomba, na lijamba lya manga vakujeneka kapenga, ukavakombelele kuli Shukulu Kalunga. Co muna ngombe wa nkomba apwe wa mulambu wa a vuvi, na lijamba lya manga apwe wa mulambu wa kwenyeka.

³ Asinoni leka vanu va Isalele vatwale lijamba lya membe apwe wa mulambu wa a vuvi, na muna ngombe wa nkomba wa mwaka umolika, na muna manga wa mwaka umolika vakujeneka kapenga vapwe va mulambu wa kwenyeka,

⁴ na ngombe wa nkomba, na lijamba lya membe, na manga vapwe va mulambu wa kulitombola. Co vakavakombelele kuli Shukulu Kalunga na mulambu wa vimbuto vya vinona vyakutsingasana na mazi. Vanapande kulinga evi omwo lelo Shukulu Kalunga akalisholola kuli vakevo.”

⁵ Co vatwalele vyuma vyoshe vije Mosesa wavishikile kulutwe lwa Mbalaka, mbunga yoshe vakungulukilile kuje nakulemesa Shukulu Kalunga.

⁶ Co Mosesa wendekele ngwendi, “Shukulu Kalunga namishiki mulinge vyuma vyoshe evi, ngeci ceke ca vumpau vwendi case kusholoka kuli yeni.”

⁷ Asinoni Mosesa wendekele kuli Alone ngwendi, “Ya ku mutula, ukakombelele n̄ombelo ya a vuvi vwove, na n̄ombelo yove ya kwenyeka mukulyambesa yove vavenya, amo na vanu voshe. Linga n̄ombelo eyi mukutundisa vuvi vwa vanu, ngwe muje mwashikile Shukulu Kalunga.”

⁸ Co Alone waile ku mutula nakutsiya muna ngombe wa nkomba wa n̄ombelo ya a vuvi vwendi.

⁹ Asinoni vana vendi vamutwalelele maninga, co wambwitikilemo mulavo wendi, wakwitile amo ku vyakushongomoka vya mu vimbango vya mutula, co wetilile aje asaleleo kwisi ya mutula.

¹⁰ Asinoni wenyekelele mazi a mutula, na vinso, na mutambela wauvwa wa lishuli, ngwe muje mwashikile Shukulu Kalunga kuli Mosesa.

¹¹ Oloni wenyekelele situ, na cilambu anja ya cilombo.

¹² Alone watsiile cimuna uje wa n̄ombelo yendi ya kwenyeka. Co vana vendi vamutwalelele maninga, co waetilile ku mitambela yoshe iwana ya mutula.

¹³ Co vamutwalelele n̄ombelo ya kwenyeka, cipuka na cipuka, na mutwe vya uje cimuna, co wavyenyekelele a mutula.

¹⁴ Asinoni wakushile vya mwimo, na mapondo, co wavyenyekelele a mutula, akamwa ya n̄ombelo ya kwenyeka ije yakeleo.

¹⁵ Co munima yevi, Alone wakombelelele vin̄ombelo vya vanu. Wambatele membe uje wapwile wa n̄ombelo ya a vuvi vwa vanu, co wamutsiile, asinoni wamukombelelele ngwe muje mwalingile a n̄ombelo ya a vuvi vwendi vavenya.

¹⁶ Co watwalele lalo cimuna wa n̄ombelo ya kwenyeka, wamukombelelele ngwe mwaya mashiko.

¹⁷ Co wakombelelele n̄ombelo ya vimbuto vya vinona, wajomweneo livoko lyakushula lya vunga, wavwenyekelele a mutula. (Eci capwile kwakelako ku n̄ombelo ya kwenyeka ya a litangwa na litangwa.)

¹⁸ Co Alone watsiile ngombe wa nkomba, na lijamba lya manga kupwa mulambu wa kulitombola kwa vanu. Co vana vendi vamutwalelele maninga, waetilile ku mitambela yoshe iwana ya mutula.

¹⁹ Asinoni vamutwalelele mazi a ngombe wa nkomba, na a lijamba lya manga, na mukila wa mazi, na citata-mila, na vinso, na mutambela wauvwa wa lishuli,

²⁰ co wavyakele akamwa ya vin̄undo vya vimuna, co wenyekelele mazi a mutula.

²¹ Oloni vin̄undo, na lindi lya ku cilyo wavikombelelele kupwa n̄ombelo yaivwa kuli Shukulu Kalunga kupwa ya vaka-kukombelela, ngwe muje mwashikile Mosesa.

²² Omo Alone wamanesele kukombelela vin̄ombelo vyoshe vije, wajundwile mavoko endi akamwa ya vanu, wavavezikisile, co washelumukile asi.

²³ Co Mosesa na Alone vakovelele mu Mbalaka Mwakuliwanena, omo vatuukile anja, vavezikisile vanu, co ceke ca vumpau vwa Shukulu Kalunga casholokele ku vanu voshe.

²⁴ Co vwasi-vwasi Shukulu Kalunga watumine tuhya, twenyekele uje mulambu wa kwenyeka, na vilyo, na mazi a mutula. Omo vanu vamwene vije vyalingiwile, co voshe vatambekele nakutsikama a mavuli, nakukulamesa vihanga vyavo asi.