VaLevi 5 - Livulu lya Shukulu Kalunga

Milonga ije ishakiwa milambu ya a vuvi

¹ “Nga munu vamusana ku mbanja ngeci akaane vukaleo vwa vije namono nambe nazivi, co ajeneka kuvyambulula, ngongo yendi vavenya.

² “Nga munu akwata a cuma cakujeneka kujela, kujeneka kuzivuka, nambe kasitu wa kutsa wakulya, nambe cimuna wa kutsa wakulya, nambe njame ya tulongolo va kutsa vakulya, co ikeye kajelele, akakala na mulonga.

³ “Nga munu umo akwata nkala cuma cacivi cakutunda a munu kujeneka kuzivuka, cije cikamwonwesa kujela, co akakala na mulonga.

⁴ “Nga munu umo azambula kulisinga ngoco kujeneka kuyongola mwamuvwa, nambe a cuma cacivwa nambe cacivi, kujeneka kuzivuka, co akakala na mulonga.

⁵ “Nga munu nalingi mulonga, alitavele vuvi vwendi vuje vwanalingi,

⁶ napande kunena mulambu wa mulonga wendi kuli Shukulu Kalunga, manga nambe membe wa lwavo ngeci upwe mulambu wa a vuvi. Co muka-kukombelela akamwambesa ku vuvi vwendi.

⁷ “Oloni nga munu onwa kunena manga nambe membe, co uje munu napande kunena kuli Shukulu Kalunga tutela vavali nambe mayembe vavali, kupwa mulambu wa mulonga wendi a vuvi vuje vwanalingi. Kazila umo akapwa wa mulambu wa a vuvi, co mukwavo wa mulambu wa kwenyeka.

⁸ Co akavatwale kuli muka-kukombelela, uje akalivanga kulambula kazila umo kupwa mulambu wa a vuvi. Ikeye akapokole mukoshi wa uje kazila kesi akatukule mutwe wendi,

⁹ co akashamwine maninga amo a kazila kumukulo wa mutula. Co aje asalao akawandwekesele kwisi ya mutula. Ou ukewo mulambu wa a vuvi.

¹⁰ Asinoni akalambule kazila wamucivali kupwa mulambu wa kwenyeka, ngwe ku mashiko. Co mu ngila eyi muka-kukombelela akaambesa uje munu ku vuvi vwendi, co vakamusambesa.

¹¹ “Oloni nga munu onwa kunena tutela vavali nambe mayembe vavali, co akanene kilo imo ya vunga vwavuvwa vwakuseneta kupwa mulambu wa a vuvi vwendi. Kesi akaakeo mazi a olive nambe insense embwe, omwo ukewo unapu mulambu wa a vuvi.

¹² Co akavunene kuli muka-kukombelela, uje akajomonao livoko lyakushula lya vunga kupwa cimweso ngeci vukevwo vwoshe vanavukombelela kuli Shukulu Kalunga, co ikeye akavwenyekela a mutula akamwa ya milambu ya vyakulya. Ukewo unapu mulambu wa a vuvi.

¹³ Co mu ngila eyi muka-kukombelela akaambesa uje munu ku vuvi vwendi, co vakamusambesa. Vuje vunga vunasalao vukapwa vwa muka-kukombelela, ngwe mulambu wa vimbuto vya vinona.”

Milambu ya kuliilwisila

¹⁴ Shukulu Kalunga wendekele kuli Mosesa ngwendi,

¹⁵ “Nga munu alinga vuvi kujeneka kuzivuka, omo ikeye nonwa kwana vije vyakujela kuli Shukulu Kalunga, co akanene lijamba lya manga nambe membe wakujeneka kapenga, ngeci apwe mulambu wa kuliilwisila kuli Shukulu Kalunga. Co ndando ya uje cimuna inapande kupwa ngwe ndando ije ishakiwa ku Mbalaka Mwakuliwanena.

¹⁶ Co ikeye napande kwingisamo vyuma vije vyanavulumwine vyakujela, nakwakelako litambelo makumi avali. Ikeye akavyane kuli muka-kukombelela, co muka-kukombelela akakombelela cimuna uje wa a vuvi vwa uje munu mukumwambesa, co vakamusambesa.

¹⁷ “Nga munu akalinga vuvi kujeneka kuzivuka, co apokola lishiko limo lya mashiko a Shukulu Kalunga, ikeye ali na mulonga, co ngongo yendi vavenya.

¹⁸ Napande kunena lijamba lya manga nambe membe wakujeneka kapenga kuli muka-kukombelela kupwa mulambu wa kuliilwisila. Co ndando ya uje cimuna inapande kupwa ngwe ndando ije vemika ya mulambu wa kuliilwisila. Muka-kukombelela akakombelele n̄ombelo mukumwambesa ku vuvi vuje vwalingile kujeneka kuzivuka, co vakamusambesa.

¹⁹ Ou unapu mulambu wa kuliilwisila wa a vuvi vuje vwalingile kuli Shukulu Kalunga.”