VaLevi 3 - Livulu lya Shukulu Kalunga

Milambu ya kulitombola

¹ “Omo munu akombelela umo wa vingombe vendi kupwa mulambu wa kulitombola, napande kupwa nkomba nambe lwavo wakujeneka kapenga.

² Uje munu akakambeke livoko lyendi a mutwe wa uje cimuna nakumutsiila ku cikolo ca Mbalaka Mwakuliwanena. Co vaka-kukombelela va ka naanga ya Alone vakashamwine maninga ku mitambela yoshe iwana ya mutula.

³ Asinoni ku mulambu wa kulitombola akatundiseko mazi kupwa mulambu wa vyakulya wakwenyekela kuli Shukulu Kalunga, mazi oshe a vya mwimo,

⁴ na vinso na mazi avyo, na mutambela uje wauvwa wa lishuli.

⁵ Asinoni vana va Alone vakenyekele aje mazi a mutula akamwa ya mulambu wa kwenyeka, uje ili a vitale vya tuhya. Unapu mulambu wa vyakulya, co vweko vwa mulambu ou vukavwaelelesa Shukulu Kalunga.

⁶ “Nga manga nambe membe vamukombelela kupwa mulambu wa kulitombola napande kupwa wa lijamba nambe lwavo, oloni napande kupwa wakujeneka kapenga.

⁷ Nga munu akombelela manga,

⁸ akakambeke livoko lyendi a mutwe wa uje cimuna nakumutsiila kulutwe lwa Mbalaka. Co vana va Alone vakashamwine maninga ku mitambela yoshe iwana ya mutula.

⁹ Asinoni ku mulambu uje wa kulitombola akatundiseko mazi kupwa mulambu wa vyakulya wakwenyekela kuli Shukulu Kalunga, mazi oshe, na mukila woshe wa mazi uje vanavatwila kuyehi na citsiya ca mwongo, na mazi oshe a vya mwimo,

¹⁰ na vinso, na mazi avyo, na mutambela uje wauvwa wa lishuli.

¹¹ Co muka-kukombelela akavyenyekele vyoshe a mutula kupwa mulambu wa vyakulya wakwenyekela kuli Shukulu Kalunga.

¹² “Nga munu akalambula membe akamunene ku mesho a Shukulu Kalunga.

¹³ Co akakambeke livoko lyendi a mutwe wa uje cimuna nakumutsiila kulutwe lwa Mbalaka Mwakuliwanena. Co vana va Alone vakashamwine maninga ku mitambela yoshe iwana ya mutula.

¹⁴ Asinoni ku mulambu uje akatundiseko mazi kupwa mulambu wendi wa vyakulya wakwenyekela kuli Shukulu Kalunga, mazi a vya mwimo,

¹⁵ na vinso, na mazi avyo, na mutambela wauvwa wa lishuli.

¹⁶ Muka-kukombelela akenyekele vyoshe vije a mutula kupwa mulambu wa vyakulya wa kwenyeka. Vweko vwa mulambu wa vyakulya vukavwaelelesa Shukulu Kalunga. Co mazi oshe anapu a Shukulu Kalunga.

¹⁷ Kukwesi kaIsalele akalya mazi nambe maninga, eli likelyo lishiko limukanyunga ku myaka yoshe kuli vaIsalele voshe ku visemwa vyeni vyoshe vya kulutwe kwoshe kuje kumukakala.”