VaLevi 12 - Livulu lya Shukulu Kalunga

Kulijelesa kwa munakazi omo nasulumuna mwana

¹ Shukulu Kalunga wendekele kuli Mosesa ngwendi,

² “Leka vanu va Isalele ngwove, a matangwa atanu na avali omo munakazi nakiti laja mwana wa munalume, co kajelele, kakwata ku liko.

³ A litangwa lyamucitanu na atatu, uje mbututu vakamutuule.

⁴ Asinoni uje munakazi akakale mu katanda matangwa makumi atatu na matangwa atatu omo kanda akombe. Co kapandele kukwata ku cuma cimo cakujela nambe kukovela mu Mbalaka Mwakuliwanena noo nakombo.

⁵ Oloni nga akita mwana wa munakazi, akapwa wakujeneka kujela a matangwa likumi na matangwa awana, kakwata ku liko. Napande kukala matangwa akwavo akupwa makumi atanu na limo na matangwa atanu na limo lalo, noo nakombo.

⁶ “Omo matangwa endi akulijelesa anapumo mwamuvwa, nambe ali mwana wa munalume, nambe ali mwana wa munakazi, co akanene muna manga wa mwaka umo kuli muka-kukombelela ku cikolo ca Mbalaka Mwakuliwanena, kupwa n̄ombelo ya kwenyeka, na liyembe nambe katela wa n̄ombelo ya a vuvi.

⁷ Co muka-kukombelela akakombelela n̄ombelo ya munakazi kuli Shukulu Kalunga mukutundisa vulikazi vwendi, co ikeye akajela. Ngecivene, eli likelyo lishiko lyanapande kunyunga munakazi omo nakiti mwana.

⁸ “Nga munakazi kasa kunena muna manga, co akanene mayembe vavali nambe tutela vavali, umo apwe wa n̄ombelo ya kwenyeka mukwavo apwe wa n̄ombelo ya a vuvi, co muka-kukombelela akamwambesa kumutundisa vulikazi vwendi, co ikeye akajela.”