VaLevi 11 - Livulu lya Shukulu Kalunga

Tusitu vakulya na ava vakujeneka kulya

¹ Shukulu Kalunga wendekele kuli Mosesa na Alone ngwendi,

² “Lekeni vanu vaIsalele ngwendi, mwasa kulya kasitu woshe wa asi

³ uje wakutyangunuka vimbemba, co lalo muka-kulekula nakuseka.

⁴ Oloni akati ka vaje vaka-kulekula nakuseka nambe vakutyangunuka vimbemba, kesi mukalye kamelo, omwo ikeye akalekula nakuseka oloni katyangunukile vimbemba, kesi wakujela,

⁵ na lisheha omwo ikeye akalekula nakuseka oloni katyangunukile vimbemba, kesi wakujela kuli yeni embwe,

⁶ nambe kalumba omwo ikeye akalekula nakuseka, oloni katyangunukile vimbemba. Co ava kesi vakujela kuli yeni embwe.

⁷ Co kesi mulye ngulu omwo ikeye kesi wakujela embwe, ikeye ni watyangunuka vimbemba, oloni kesi kulekula nakuseka.

⁸ Kesi mulye tusitu ava nambe kukwata a mitunu yavo ya kutsa embwe, vakevo kesi vakujela embwe.

⁹ “Co mwasa kulya nkala muyati wa isi vaje vali mu mema a kalunga nambe mu vindonga vaje vali na matendo na mavanda.

¹⁰ Oloni voshe vakuyoya mu mema vaje kuvesi na matendo na mavanda kumwapandele kuvalya,

¹¹ vapwe va vunyengwe kuli yeni. Kumwapandele kuvalya omwo kesi vakujela, nambe kukwata a mitunu yavo ya kutsa.

¹² Co kumwapandele kulya woshe uje wakala mu mema uje kesi na matendo na mavanda, wapwa wa vunyengwe kuli yeni.

¹³ Co tuzila ava vakevo vanapu va vunyengwe akati keni, kesi muvalye, vakevo ava, ngonga, na linkungulu,

¹⁴ liselele, na kacuvwi, na cungu,

¹⁵ na likuvi, na likololo,

¹⁶ na inavilanda, na mwimbi,

¹⁷ na kanyange-nyange, na limenekela,

¹⁸ na limbondo, na lyaanda,

¹⁹ na pekokeni, na ndimandima.

²⁰ “Co tulongolo voshe vali na mambava kesi vakujela embwe,

²¹ kuvanga vaje vali na mendi akujombozoka nawo.

²² Mwasa kulya vimbimba mikumbi, na tujenje, na tushenya,

²³ oloni vakwavo voshe vaje vavandondo vaje vali na mambava, co lalo vakulikoka vapwa vakujeneka kujela, va vunyengwe.

²⁴ “Co woshe uje akakwata a mitunu ya tusitu ava va kutsa akapwa wakujeneka kujela noo ku cingwezi,

²⁵ tusitu voshe va vimbemba, kuvanga vimbemba vyavo vyakutyangunuka, vaka-kulekula nakuseka,

²⁶ co na tusitu voshe vaje va mendi awana va vituto.

²⁷ Woshe uje akambata mitunu yavo ya kutsa napande kukusha vuzalo vwendi,

²⁸ oloni akapwa wakujeneka kujela, noo ku cingwezi.

²⁹ “Co n̄olo, na muku, na kangongwe, na citombwe,

³⁰ na liku, na citatu, na musanga, na congono vanapu vakujeneka kujela.

³¹ Woshe uje akwata a mitunu yavo ya kutsa akapwa wakujeneka kujela noo ku cingwezi.

³² Co nga mitunu yavo ya kutsa iwila a cuma cimo, cikapwa cakujeneka kujela. Eci cinakundama ku vivala vyoshe vya viti, nambe nanga, nambe cilambu, nambe cikeleya, nambe kuvacipangesa mu ngila ika indi ika, cikapwa cakujeneka kujela. Co cije cuma vakacimbwitike mu mema, oloni cikapwa cakujeneka kujela noo ku cingwezi.

³³ Co nga mitunu yavo iwila mu ndeo ya vuma, co vyuma vyoshe vije vilimo vikapwa vyakujeneka kujela, munapande kuyitsiya ije ndeo.

³⁴ Co nga vyakulya vyoshe vije vivakali vili mu ndeo, oloni anandwekela mema akutunda a mitunu ya kutsa, kuvyajelele, co cuma coshe civakanwa ca muje mu ndeo kucajelele.

³⁵ A cuma coshe aje awila mitunu ya kutsa kucajelele, nambe liko lya vuma lyakushonga lyakutelekela nambe liko likwavo lya vuma lyakushonga lyakwocela, valivujule.

³⁶ Oloni nga kavwelu-vwelu nambe lisima lili na mema amangi anga vyakujela, oloni cuma coshe cikakwata a mitunu yavo ya kutsa cikapwa cakujeneka kujela.

³⁷ Nga mutunu umo uwila a vimbuto vije vanakunu, vimbuto vije anga vikapwa vyakujela.

³⁸ Oloni nga vije vimbuto vyakujaveka mu mema, co mutunu umo uwilao, vije vimbuto vikapwa vyakujeneka kujela.

³⁹ “Nga cimuna umo wakulya atsa, co woshe amukwata akapwa wakujeneka kujela noo ku cingwezi.

⁴⁰ Co nga munu umo alya ku situ ya uje cimuna wa kutsa, napande kukusha vuzalo vwendi, oloni ikeye akapwa wakujeneka kujela noo ku cingwezi.

⁴¹ “Co kumwapandele kulya tusitu vaje vakulikoka asi,

⁴² nambe vakulikoka, nambe vakwenda na mendi awana, nambe vali na mendi amangi, vanapu vakujeneka kujela.

⁴³ Kesi mulijwalese yeni vavenya akulya cuma cimo cakulikoka asi.

⁴⁴ Yange njapwa Kalunga Njambi yeni, co munapande kulinyunga mupwe vaka-kujela, omwo yange njapwa wakujela.

⁴⁵ Yange njapwa Kalunga uje wamitundisile mu lifuti lya Ingito ngeci njipwe Njambi yeni. Munapande kupwa vakujela omo yange njapwa wakujela.

⁴⁶ “Ngecivene, eli linapu lishiko lya tusitu, na tuzila, na voshe vaje vakala mu ndonga, na voshe vaje valinakulikoka asi.

⁴⁷ Munapande kunyanyama mukunongonona akati kaava vakujela na ava vakujeneka kujela, akati ka tusitu vaje munapande kulya na vaje kumwapandele kulya.”