VaLevi 10 - Livulu lya Shukulu Kalunga

Vuvi vwa Nandave na Avihu

¹ Vana va Alone Nandave, na Avihu, umo na umo wambatele cikango cendi civakavweke tuhya, co vaakeleo manungu a tuhya, co vaakele insense akamwa ya tuhya, co vatwalele kuli Shukulu Kalunga. Oloni tuje tuhya kutwapwile twakujela, omwo Shukulu Kalunga kavashikile kulinga ngacije.

² Aje vene Shukulu Kalunga watumine tuhya, twavenyekele nakuvatsiila kuje vene ku mesho a Shukulu Kalunga.

³ Asinoni Mosesa wendekele kuli Alone ngwendi, “Omu mukemwo mwanendeka Shukulu Kalunga omo wendekele ngwendi, ‘Voshe vanjipangela vanapande kusingimika kujela kwange, njikamwesa vulemu vwa vumpau vwange kuli vanu vange voshe.’ ” Oloni Alone wolokele kuluu.

⁴ Co Mosesa wasanene Mishaele, na Elezafane, vana va Uziyele inanu ya Alone, wendekele kuli vakevo ngwendi, “Ijeni kuno mwakutundise vivimbi vya vashoniyeni ku Mbalaka yakujela, muvatwale anja ya cilombo.”

⁵ Ngecivene, vezile, vambatele vivimbi kumo na vuzalo vwavyo, co vavatwalele anja ya cilombo, ngwe muje mwavashikile Mosesa.

⁶ Asinoni Mosesa wendekele kuli Alone, na kuli vana vendi, Elyazale, na Itamale ngwendi, “Kesi mulikele kusakula vin̄ambu vyeni, co lalo kesi mutavule vuzalo vweni mukumwesa ngeci mulinakulila embwe. Nga yeni mulingamo, co mukatsa, Shukulu Kalunga akaluvala na mbunga yoshe. Oloni vavushoko vweni vaIsalele voshe vanavatavesa kulila a kutsa oku kunalingiwa na tuhya tuje Shukulu Kalunga watumine.

⁷ Kesi mutunde mu cikolo ca Mbalaka kutewa mukatsa, omwo yeni vanamizilika na mazi akuvwava a Shukulu Kalunga.” Co valingile ngwe muje mwendekele Mosesa.

Mashiko a vaka-kukombelela

⁸ Co Shukulu Kalunga wendekele kuli Alone ngwendi,

⁹ “Yove na vana vove va vanalume kesi mukovele mu Mbalaka Mwakuliwanena omo munanu vinyu nambe vwala. Nga mulingamo, co mukatsa. Eli likelyo lishiko lya ku myaka yoshe limukanyunga na vatekulwila veni voshe ku visemwa vyoshe vya kulutwe.

¹⁰ Co munapande kwangununa akati kevi vyakundama kuli Njambi nevi vyakupangesa ngoco, akati kevi vyakujela nevi vyakujeneka kujela.

¹¹ Co munapande kulongesa vanu va Isalele mashiko oshe awa njinamyanawo ali Mosesa.”

¹² Co Mosesa wendekele kuli Alone, na kuli Elyazale, na Itamale vana vendi vavali vaje vasaleleo ngwendi, “Twaleni mulambu wa vimbuto vya vinona uje wasalele ku vyakulya vakombelelele kuli Shukulu Kalunga, co vilyeni vyakujeneka musima, vilileni kumukulo wa mutula, omwo n̄ombelo eyi inapu yakujela manene.

¹³ Co vilileni mu mwela wakujela, ou ukewo mutambela wa vyakulya vakombelelele kuli Shukulu Kalunga wakundama kuli yove na vana vove va vanalume. Omu mukemwo mwanjishikile Shukulu Kalunga.

¹⁴ Oloni n̄undo, na lindi vyakulambula ukavilila ku mwela umo wakujela, yove na vana vove va vanalume, na vana vove va vanakazi, omwo vinapu vwana vuvanaana kuli Shukulu Kalunga kupwa mutambela wove, na mutambela wa vana vove wa milambu ya kulitombola ya vanu va Isalele.

¹⁵ Co lindi, na n̄undo vakavitwale amo na mazi kupwa mulambu wa vyakulya kuli Shukulu Kalunga. Evi vikapwe vyove, na vana vove va vanalume kupwa mutambela weni wa ku myaka yoshe, ngwe muje mwashikile Shukulu Kalunga.”

¹⁶ Co Mosesa wehwile a membe wa n̄ombelo ya a vuvi, wawanene ngeci vanamwenyeka laja. Co waluvalele manene na Elyazale, na Itamale, wavehwile ngwendi,

¹⁷ “Omwo vikajo kumwalililile n̄ombelo ya a vuvi mu mwela wakujela? Eyi n̄ombelo inapu yakujela manene, Shukulu Kalunga namyanayo mukwambata vuvi vwa mbunga ya vanu mukuvaambesa.

¹⁸ Ngwe omo maninga endi kuvawatwalele mu Mbalaka yakujela, mwapandele kulila n̄ombelo eyi muje vene, ngwe muje njamishikile.”

¹⁹ Co Alone wakumbulwileko ngwendi, “Nga yange njinalile ku n̄ombelo ya a vuvi, lelo nga njinavwaelelesa Shukulu Kalunga ndi? Kenga, lelo vanu vanakombelela n̄ombelo yavo ya a vuvi kuli Shukulu Kalunga, amo na n̄ombelo yavo ya kwenyeka, oloni anga vene vyuma evi vyakukomokesa vyalingiwa kuli yange!”

²⁰ Omo Mosesa wazivile ngacije, co watavele.