Mateo 27 - Livulu lya Shukulu Kalunga

Yesu vamutwala kuli Pilato

¹ Alikaki mutondo-tondo vakulunu va vaka-kukombelela voshe na vakulunu vatumbile matumbe avo akulwisa Yesu ngeci vamutsiye.

² Co vamukutile, co vamutwalele nakumwana kuli Pilato, nguvulu wa vaLoma.

Kutsa kwa Yundasa

³ Omo Yundasa uje wamwendele vungungu, wamwene ngeci Yesu vanamuhisa laja, watengulukile, co welwisile vije vimbongo vya siliva makumi atatu kuli vakulunu va vaka-kukombelela na ku vakulunu.

⁴ Wendekele ngwendi, “Njinalingi vuvi akwenda vungungu munu wakujeneka mulonga.” Vamukumbulwile ngwavo, “Ovyo vikajo kuli yetu? Owo mulonga wove!”

⁵ Co Yundasa wombilile vije vimbongo mu Njuvo ya Shukulu Kalunga, co waile nakulishukika.

⁶ Oloni vakulunu va vaka-kukombelela vanonele vije vimbongo, vendekele ngwavo, “Evi vinapu vimbongo vya maninga, kucitava kuvyaka mu mbango ya mu Njuvo ya Shukulu Kalunga ngwe ku Mashiko etu.”

⁷ Ngecivene, valizivasanene ngeci vavilande lihya lya Muka-kushonga Vindeo, ngeci lipwe lyakutsinda vangenzi.

⁸ Ngecivene, vatumbwile lihya lije ngwavo, “Lihya lya Maninga,” kweta na ku litangwa lyalelo.

⁹ Asinoni vilingiwe vije vyendekele Njelemiya muka-kwimanena ngwendi, “Vambatele vimbongo vya siliva makumi atatu, ndando ije ivayongwele vanu va Isalele kumulandesa nayo.

¹⁰ Co vavipangesele mukulanda lihya lya muka-kushonga vindeo, ngwe mwanjishikile Shukulu Kalunga.”

Pilato ehula Yesu

¹¹ Yesu wemanene ku mesho a Pilato nguvulu wa vaLoma, co wamwihwile ngwendi, “Yove mwene wa vaYunda ndi?” Yesu wamukumbulwile ngwendi, “Muunendeka mukemwo vene.”

¹² Oloni omo vakulunu va vaka-kukombelela na vakulunu vamuvangelele kakumbulwileko nambe lijwi limo.

¹³ Asinoni Pilato wamwihwile ngwendi, “Kuwazivile vyuma evi vyavingi valinakukuvangela ndi?”

¹⁴ Oloni Yesu kamukumbulwile nambe lijwi limo, ngecivene, Nguvulu wakomokele manene.

Yesu vamusompela kutsa

¹⁵ A ciwano na Ciwano ca Pasovala, nguvulu wakele na cilika cakwecela cinzinda uje vashakele vanu.

¹⁶ Co a simbu ije kwakele cinzinda umo watsimanene manene, lizina lyendi Yesu Mbalambasa.

¹⁷ Ngecivene, omo mbunga ya vanu vakungulukile, co Pilato wavehwile ngwendi, “Iyajo mushaka ngeci njimyeceleye? Yesu Mbalambasa nambe Yesu uje ivatumbula Kilistu?”

¹⁸ Omwo Pilato wazivukile ngeci vakulunu va vaYunda vanenele Yesu kuli ikeye omwo vakele na lifuwa.

¹⁹ Omo Pilato watumbamene a litanda lyakusompa, munakazi wendi watumine majwi kuli ikeye ngwendi, “Kesi ulinge cuma cimo ali munu owo wakujeneka mulonga, omwo njozi njinaloto ya ali ikeye inanjiyandesa manene.”

²⁰ Vakulunu va vaka-kukombelela na vakulunu vashongangeyeye ije mbunga ngeci valombe Pilato ecele Mbalambasa, co Yesu vamutsiye.

²¹ Oloni Pilato wavehwile lalo ngwendi, “Iyajo umo akati kaava vavali imushaka ngeci njimyeceleye?” Vamukumbulwile ngwavo, “Mbalambasa.”

²² Pilato wavehwile ngwendi, “Vikoni njikalinga na Yesu ou ivatumbula Kilistu?” Co voshe vatambekele ngwavo, “Mushukike a cilindakano!”

²³ Oloni Pilato wavehwile lalo ngwendi, “Mulonga ukajo wanalingi?” Oloni vatambekele manene ngwavo, “Vamushukike!”

²⁴ Omo Pilato wamwene ngeci nomu mwalinga vene mwai, oloni lwozi lunasa kushangumuka, wambatele mema, wajwelele ku mavoko endi ku mesho a mbunga, co wendekele ngwendi, “Yange kunjesi na mulonga a kutsa kwa munu ou! Ou mulonga weni vavenya.”

²⁵ Co voshe vamukumbulwile ngwavo, “Maninga endi aije ali yetu na ali vana vetu!”

²⁶ Asinoni Pilato wecelele Mbalambasa, co wapupile Yesu makote, co wavaneneye ngeci vakamushukike a cilindakano.

Mashwalale vashendumuna Yesu

²⁷ Asinoni mashwalale va Pilato vakovelesele Yesu mu lipela lya nguvulu, co mbunga yoshe ya mashwalale vamuzengelekele.

²⁸ Co vamushulwile vuzalo vwendi, co vamuzikile cikoveyo cacilaja cakuvenga.

²⁹ Co vavindile cilongo ca minango ya mambimbo vacakele ku mutwe wendi, co vamwakele citi mu livoko lyendi lya cilyo, vatsikamene a mavuli ku mesho endi vamushendumwine ngwavo, “A vulye Mwene wa vaYunda!”

³⁰ Co vamujekwilile mate, co vamutambwile cije citi, vamupupisileco ku mutwe.

³¹ Co omo vamanesele kumushendumuna, vamushulwile cije cikoveyo, vamuzikile lalo vuzalo vwendi. Asinoni vamutwalele anja ngeci vakamushukike a cilindakano.

Yesu vamushukika a cilindakano

³² Omo vakele nakuya, valiwanene na munalume umo wa ku Silene, lizina lyendi Simoni, co mashwalale vamusindiiye ngeci ambate cilindakano ca Yesu.

³³ Co omo vetele ku mutambela umo uvatumbwile ngwavo, Ngolongota, kulumbunuka ngwavo, “Mutambela wa Cikola.”

³⁴ Vaanene Yesu vinyu vyakukumbasana na nyanga ngeci anwe, oloni omo wavimakelele, wavyanene kuvinwa.

³⁵ Co omo vamushukikile a cilindakano, vatele n̄ela akulipangela vuzalo vwendi.

³⁶ Asinoni vatumbamene asi nakumunyunga.

³⁷ Co vasonekele mukanda wa majwi aje vamuhisile nawo, vawakele akamwa ya mutwe wendi ngwavo, “Ou ikeye Yesu Mwene ya vaYunda.”

³⁸ Asinoni vashukikile lalo amo nendi vezi vavali, umo ku livoko lyendi lya cilyo, mukwavo ku livoko lyendi lyacimwoshwe.

³⁹ Co vanu vakele nakwita kuje vaningangesele mitwe yavo nakushaula Yesu,

⁴⁰ co vendekele ngwavo, “Yove wendekele ngwove ukasiwula Njuvo ya Shukulu Kalunga, co ukaitunga lalo a matangwa atatu! Lyamene yove vavenya nga u muna Njambi! Shuluka a cilindakano!”

⁴¹ Mu ngila eyi vene vakulunu va vaka-kukombelela na valongisi va majwi a Lishiko na vakulunu vamushendumwine ngwavo,

⁴² “Wovwele vakwavo, oloni kasa kulyovola ikeye vavenya! Kuma kesi ikeye mwene wa Isalele ndi? Ashuluke a cilindakano ololo, co tukamukulaela!

⁴³ Wakulaelele muli Njambi, co wendekele ngwendi, ‘Nji Muna Njambi.’ Asinoni tumoneni nga Njambi amwamena.”

⁴⁴ Nameme vezi lalo vaje vavashukikile amo nendi vamushawile mu cifwa cimo.

Kutsa kwa Yesu

⁴⁵ Kushangumuka akati ka mutwe, kwakele lisusulungu mu lifuti lyoshe, a maola atatu.

⁴⁶ Omo kwetile maola atatu, co Yesu watambekele na lijwi lyakama ngwendi, “Eloi, Eloi, lama sambakatani?” Kulumbununa ngwavo, “Njambi yange, Njambi yange, vikajo unanjisezela?”

⁴⁷ Co vanu vamo vaje vemanene kuje, omo vazivileko vendekele ngwavo, “Alinakusana Elinja!”

⁴⁸ Co aje vene umo wavo washatukile vwasi, wanonele mupelo, waujavekele mu vinyu vyakulula, wawakele ku shongo ya lihongo, co wamunwisile.

⁴⁹ Oloni vakwavo vendekele ngwavo, “Vandamena tumone nga Elinja aija nakumwamena!”

⁵⁰ Co Yesu watambekele na lijwi lyakama, co wecelele mwonyo wendi.

⁵¹ Asinoni nanga ije yakele nakujenjela mu Njuvo ya Shukulu Kalunga yatavukile akati, kutunda kwilu nakweta asi. Co asi ajajele na mamanya atavukile,

⁵² vimbumbo lalo vyashokolokele, co vaka-kujela vavangi vaje valalele muje vasangukile.

⁵³ Co vatundile mu vimbumbo, co omo Yesu wasangukile ku vatsi, vaile ku Nganda Yakujela, kuje vanu vavangi vavamwene.

⁵⁴ Omo uje mukulunu wa mashwalale na mashwalale vaje vakele amo nendi nakunyunga Yesu, vamwene mandunduma, na vyuma vyeka vije vyalingiwile, vazivile lyova manene, co vendekele ngwavo, “Mwa vushunga kuma wapwile Muna Njambi!”

⁵⁵ Kuje kwakele vanakazi vavangi vakele kuje, vakele kulyala nakukengelela, vaje vakavele Yesu kutunda ku Ngalileya nakumukwasa.

⁵⁶ Akati kavo akele Maliya Mangandalena, Maliya vaina ya Yakomba na Yosefa, na munakazi wa Zembendeo.

Yesu vamutsinda

⁵⁷ Omo vetele ku cingwezi, kwezile munalume umo wakufuka wa ku Alamatiya, lizina lyendi Yosefa, ikeye lalo wapwile ndongisi ya Yesu.

⁵⁸ Ikeye waile kuli Pilato nakulomba muvila wa Yesu. Asinoni Pilato washikile ngeci vamwanewo.

⁵⁹ Ngecivene, Yosefa wambatele muvila wa Yesu, wauzengelele a nanga yaiha ya linyu,

⁶⁰ co waulangekele mu mbumbo yendi yaiha, ije yacokwele mu limanya. Wandumwinine ku cikolo limanya lyakama, co waile.

⁶¹ Maliya Mangandalena na Maliya mukwavo vatumbamene kuje, oku vanakenge ku mbumbo.

Vaka-kunyunga ku mbumbo

⁶² Alikaki, lyapwile Litangwa Lyakuhwima, vakulunu va vaka-kukombelela na vaFaliseo vakungulukilile kuli Pilato,

⁶³ vendekele ngwavo, “Shukulu, twanuka uje muka-kukwisa omo wakele nakuyoya wendekele ngwendi, ‘Njikasanguka omo kuneti matangwa atatu.’

⁶⁴ Ngecivene, shika vanyunge mwamuvwa ku mbumbo, noo a litangwa lyamucitatu, kutewa vandongisi vendi vakaija nakumwiva vutsiki, co vakaleka vanu ngwavo, nasanguka ku vatsi. Co makuli akukotokela akatuvakana makuli akulivanga.”

⁶⁵ Pilato wavalekele ngwendi, “Muli na mashwalale vaka-kunyunga, yeni mukanyunge mwamuvwa mbumbo.”

⁶⁶ Ngecivene, vaile, co vanyungile mwamuvwa mbumbo, vaakele cisateso a limanya, co vasezele mashwalale kunyungako.