Mateo 17 - Livulu lya Shukulu Kalunga

Kulimuka kwa Yesu

¹ Co omo kwetile matangwa atanu na limo Yesu waile amo na Petulu na Yakomba na Yowano ndolome ya Yakomba, co wavatwamenenene kulamata akamwa ya munkinda waulaja kwavo lika.

² Co omo vamukengele, wemukile mweka ku mesho avo, co cihanga cendi cavyazimine ngwe misha ya litangwa, na vuzalo vwendi vwatokele too ngwe ceke.

³ Co vaje vandongisi vatatu vamwene Mosesa na Elinja valinakusimutwiya na Yesu.

⁴ Ngecivene, Petulu wendekele na Yesu ngwendi, “Mwene, mwamuvwa kuli yetu omo tuli kuno! Nga ushaka, njitunga mambalanda atatu, limo lyove, limo lya Mosesa, limo lya Elinja.”

⁵ Omo wacikele nakwendeka, lishelwa lyakuvyazima lyavafwikile, co lijwi lyatundile mu lishelwa lyendekele kuli vakevo ngwalyo, “Ou ikeye Munange injazema, njilinakuvwaelela ali ikeye, mutolilileni!”

⁶ Omo vandongisi vazivile lijwi, vazivile lyova manene, co vavulumanene.

⁷ Oloni Yesu wezile kuli vakevo wavakambekele mavoko, wendekele kuli vakevo ngwendi, “Katukeni, co kesi muzive lyova!”

⁸ Ngecivene, omo vandwile mesho avo kuvamwene munu weka lalo, oloni kuvanga Yesu lika.

⁹ Co omo vatundile ku munkinda, Yesu wavasin̄ikile ngwendi, “Kesi mukalekeko munu umo a vyuma evi munamono, kuvanga noo Muna Munu nasanguka ku vatsi.”

¹⁰ Co vandongisi vendi vamwihwile ngwavo, “Omwo vikajo valongisi va majwi a Lishiko vakendeka ngwavo Elinja napande kwija akulivanga?”

¹¹ Yesu wavakumbulwile ngwendi, “Elinja napande kwija akulivanga nakuvwaesa vyoshe.

¹² Oloni njimileka ngwange Elinja naija laja, vanu kuvamuzivukile, oloni vamulingile mwoshe muvashakelele. Ngecivene, mu ngila eyi vene vakayandesa Muna Munu.”

¹³ Asinoni vandongisi vazivukile ngeci nendeka navo vya Yowano Muka-kumbwitika.

Yesu akangwisa mukwenje wakele na munzinzime wakujwala

¹⁴ Co omo vetele kuje ku mbunga ya vanu, munalume umo wezile kuli Yesu, watsikamene a mavuli

¹⁵ wendekele ngwendi, “Shukulu, zivilako munange mema ku mbunge! Omwo ali na mushongo wauvi wakushinya omwo visimbu vyavingi akalyumbila-umbila mu liko na mu mema.

¹⁶ Co njamutwalele kuli vandongisi vove, oloni kuvasele kumukangwisa.”

¹⁷ Co Yesu wakumbulwile ngwendi, “Yeni vaka-kujeneka kukulaela, vanu vaka-vuvi! Visimbu vingaijo njikakala neni? Visimbu vingaijo njinapande kuyanda omwo yeni? Muneneni kuno kuli yange!”

¹⁸ Co Yesu washikile uje munzinzime wakujwala, co uje munzinzime wakujwala watundile muli ikeye, co uje mukwenje wakangukile a simbu ije vene.

¹⁹ Asinoni vandongisi va Yesu vezile kuli ikeye kwavo lika, vamwihwile ngwavo, “Omwo vikajo yetu kutwasele kutundisa uje munzinzime wakujwala?”

²⁰ Yesu wavalekele ngwendi, “Omwo kukulaela kweni kwakundondo. Mwa vushunga njimileka ngwange nga kukulaela kweni kunapu kwakama ngwe kanona ka mbuto ya musalata, mwasa kwendeka ku munkinda ngweni, ‘Tunda kuno, ya kuje.’ Co ukaya, co nga nacimo cai cimukonwa!

²¹ Oloni ou munzinzime wakujwala wangeci, kuwesi kutunda na cuma ceka, kuvanga nakulomba nakulikela kulya.”

Yesu endeka lalo a kutsa kwendi

²² Omo vandongisi valikungulwile amo mu Ngalileya, Yesu wendekele kuli vakevo ngwendi, “Muna Munu ololo vamwana ku mavoko a vanu,

²³ co vakamutsiya, oloni omo kuneti matangwa atatu akasanguka.” Co vandongisi vazivile vusiwa vwakama manene.

Kufweta lisimu lya mu Njuvo ya Shukulu Kalunga

²⁴ Omo Yesu na vandongisi vendi vezile ku Kapenauma, vaka-kutambula lisimu va mu Njuvo ya Shukulu Kalunga vezile kuli Petulu vamwihwile ngwavo, “Kuma mulongisi weni akafwete lisimu lya mu Njuvo ya Shukulu Kalunga ndi?”

²⁵ Ikeye wavakumbulwile ngwendi, “Mwa vushunga akafwete.” Co omo Petulu wakovelele mu njuvo, Yesu walivangele kwendeka nendi ngwendi, “Simoni, yove wayongola vatijo? Kuli veyajo vimyene va ano a kaye kuvakatambula lisimu? Ku vanu vavo, nambe ku vangenzi?”

²⁶ Petulu wamukumbulwile ngwendi, “Ku vangenzi.” Yesu wendekele nendi ngwendi, “Nga ngoconi, co vanu vavo vanasamba.

²⁷ Oloni kutewa tutanukisa ava vanu, ngecivene, ya ku lishali, ukalovele. Co uje isi ukalovela akulivanga, co omo ukafukula mu kanwa kendi, co ukawanamo mbongo, yambate ukafwete lisimu lya Njuvo ya Shukulu Kalunga nove nange.”