Mako 5 - Livulu lya Shukulu Kalunga

Yesu akangwisa munalume wa minzinzime yakujwala

¹ Yesu na vandongisi vendi vezile musambwa ya Lishali lya Ngalileya mu lifuti lya Ngelasa.

² Co omo Yesu watundile mu vwato, waliwanene na munalume umo watundile ku viilo. Uje munalume wakele na munzinzime wakujwala,

³ co wakele mukati ka viilo. Co munu naumo wai wasele kumukuta nameme na malyenge,

⁴ Omwo visimbu vyavingi vakutile mendi endi na tukunju, co mavoko endi vawakutile na malyenge, oloni visimbu vyoshe wakele nakuvatozola malyenge nakupokozola tukunju poko-poko. Co wakele manene na nzili, co naumo wai wasele kumwononwesa.

⁵ Mutanya na vutsiki wakele nakwendangana mukati ka viilo na mu malundu, co wakele nakukangoka manene nakulilengozola ikeye vavenya na mamanya.

⁶ Co omo wakele alyala wamwene Yesu, ngecivene, washatukile, watsikamene a mavuli ku mesho endi,

⁷ co wakangokele na lijwi lyakama ngwendi, “Vika ushaka kulinga nange ove Yesu, Muna Njambi wa Akamwa ya Vyoshe? Omwo a lizina lya Njambi, njikulomba ngwange, kesi unjihise embwe!” (

⁸ Ou munalume wendekele evi omwo Yesu wendekele kuli ikeye ngwendi, “Ove munzinzime wakujwala, tunda muli munu ou!”)

⁹ Ngecivene, Yesu wamwihwile ngwendi, “Lizina lyove yove iya?” Ikeye wamukumbulwile ngwendi, “Lizina lyange yange ‘Mbunga’ omwo twapwa tuvavangi!”

¹⁰ Co walombele manene Yesu ngeci kesi ashekele ije minzinzime yakujwala anja ya lifuti lije.

¹¹ Kuje kwakele vutanga vwakama vwa vingulu vakele nakulya kumukulo wa lilundu.

¹² Co ije minzinzime yakujwala yalombele Yesu ngwayo, “Tutume ku vingulu, tukakovele muli vakevo.”

¹³ Ngecivene, waitavele, co ije minzinzime yakujwala yatundile muli uje munu, co yakakovelele mu vutanga vwa vingulu. Co vutanga vwoshe vwa vingulu vapwile 2,000, vwashatukilile mu lishali, co vwanyongelelemo.

¹⁴ Vanu vaka-kunyunga vingulu vashatukilile ku nganda vakambulwile vin̄anda vyoshe kuje na kuli vaka-kulima. Co vanu vaileko nakukamona vije vyalingiwile,

¹⁵ co omo vezile kuli Yesu, co vamwene munalume uje wakele na mbunga ya minzinzime yakujwala natumbama kuje, nazala mwamuvwa nalikongomeka, co voshe vakele na lyova.

¹⁶ Co vaje vamwene vije vyalingile vambulwile kuli vanu vije vyalingiwile kuli uje munalume muka-minzinzime yakujwala, na kuli vingulu.

¹⁷ Ngecivene, valombele Yesu atunde mu lifuti lyavo.

¹⁸ Co omo Yesu wakovelele mu vwato, uje munalume wakele na minzinzime yakujwala wamulambelelele ngwendi, “Njitave njiye amo nove!”

¹⁹ Oloni Yesu kamutavele embwe. Wamulekele ngwendi, “Iluka kwimbo kuli vavushoko vwove ngeci ukavaleke evi vyanakulingila Mwene na muje mwanakuzivilako mema ku mbunge.”

²⁰ Ngecivene, uje munalume wetile mu Vinganda Likumi, nakuvaleka vije vyamulingilile Yesu. Co voshe vavizivile valikomokelele.

Muna Njailosi wa mumbanda na munakazi uje wakwatele ku cikoveyo ca Yesu

²¹ Co omo Yesu wajavukilile lalo musambwa ya lishali ku mutambela ukwavo. Kuje ku kenge ya lishali kwakele mbunga yakama yamuzengelekele.

²² Asinoni kwezile Njailosi, ntwama wa sinangonge, co omo wamwene Yesu, watsikamene ku myanja ya Yesu,

²³ co wamulambelelele manene na kasingimiko ngwendi, “Munange wamundondo wa munakazi alinakuvinja manene. Tuye ukamukambeke mavoko, ngecivene, akakanguke!”

²⁴ Co Yesu waile amo nendi. Ngecivene, vanu vavangi vaile amo na Yesu, co ije mbunga yamuzengelekele noku-noku.

²⁵ Co kwakele munakazi umo wakele na mushongo wakukomokesa wakwita maninga myaka likumi na ivali,

²⁶ co vimbanda vavangi vamusakele. Washandwele vimbongo vyendi vyavingi, oloni nameme ngoco kakangukile, mushongo wahyanene manene.

²⁷ Ikeye wazivile lutsimo lwa Yesu, co wezile munima ya mbunga ya vanu,

²⁸ omwo wendekele mu mbunge yendi ngwendi, “Nga njikwata lika ku mukundwilo wa cikoveyo cendi, njikanguka.”

²⁹ Co omo wakwatele ku mukundwilo wa cikoveyo ca Yesu, aje vene maninga omine cau, co wazivile mu muvila wendi ngeci nakanguka ku mushongo wendi.

³⁰ Co Yesu wazivukile ngeci nzili inamutundu mu muvila wendi, watengulukilile ku mbunga, co wehwile ngwendi, “Iya nakwata ku cikoveyo cange?”

³¹ Co vandongisi vendi vamukumbulwile ngwavo, “Unamono vanu muvali nakukuzengeleka? Co wihula vati ngwove iya nanjikwata?”

³² Oloni Yesu wakengezekele amone iya namukwata.

³³ Oloni uje munakazi wazivukile vije vyalingiwile kuli ikeye, wezile nakujaja na lyova, co wawililile ku myanja ya Yesu, co wamulekele vushunga vwoshe.

³⁴ Yesu wendekele kuli ikeye ngwendi, “Munange, kukulaela kwove kunakukangwisa. Ya mu kwoloka, co kanguka ku mushongo wove.”

³⁵ Omo Yesu acili nakwendeka evi, vamo miluwa vezile vatundile ku njuvo ya Njailosi, vamulekele ngwavo, “Munove natsi. Vikajo upakesela Mulongisi?”

³⁶ Oloni Yesu kombileko mbunge ku lijwi lije livendekele, oloni walekele Njailosi ngwendi, “Kesi uzive lyova, kulaela lika.”

³⁷ Co katavesele munu weka kuya amo nendi kuvanga lika Petulu na Yakomba na shongo yendi Yowano.

³⁸ Omo Yesu wetele ku njuvo ya Njailosi, wamwene vitanga, co wazivile kulila kwakama nakukangoka.

³⁹ Co omo wakovelele mu njuvo, wendekele kuli vakevo ngwendi, “Omwo vikajo mulingila muyoyo ngeci? Omwo vika mulinakulilila ngeci? Ou mwanike katsile embwe, oloni nalala lika tulo!”

⁴⁰ Co vanu voshe vamujolele, oloni voshe wavashekelele anja, co wakovelelemo lika na ishe ya mwanike na vaina na vandongisi vendi vatatu, co vakovelele ku mulili kuje kwalalele uje mwanike.

⁴¹ Ikeye wakwatele ku livoko lya uje mwanike, co wendekele kuli ikeye ngwendi, “Talita kumi,” kulumbununa ngwavo, “Mwanike wa munakazi, njikuleka ngwange induka!”

⁴² Co aje vene wendukile, co washangumukile kwenda. (Wakele na myaka likumi na ivali.) Omo evi vyalingiwile, valikomokelele manene.

⁴³ Oloni Yesu wavasin̄ikile manene ngwendi kesi valekeko munu umo, co wavalekele ngwendi, “Mwaneni vyakulya alye.”