Maako 4 - Livulu lya Shukulu Kalunga

Ndembola na Mbalake

¹ Munima ya kutsa kwa Ehunde, vanu va Isalele valingile lalo vuvi ku mesho a Shukulu Kalunga.

² Ngecivene, Shukulu Kalunga wavakundikile ku mavoko a Njavine mwene wa vaKanana, uje washwanene mu nganda ya Hazole. Muka-kushika mashwalale wapwile Sisela, uje wakele mu Haloshete ya Vaka-kujeneka Kukulaela.

³ Njavine wakele na matemba a vikuvo akupwa 900, co ikeye washwanene vanu va Isalele na muuka na vukalu myaka makumi avali. Asinoni vanu va Isalele valililile kuli Shukulu Kalunga ngeci avakwase.

⁴ Co Ndembola munakazi wa Lapindote, wapwile muka-kwimanena wa munakazi, ikeye wapwile lyaako lya Isalele a simbu ije.

⁵ Ikeye wakele nakutumbama mwisi ya muti wa lishakavale, mukati ka Lama na Mbetele mu lifuti lya malundu lya Efalime, co vaIsalele vakele nakwija mukuvakwila.

⁶ Litangwa limo, Ndembola watumine munu kukasana Mbalake muna Avinowame wa ku nganda ya Kendeshe mu Nafetali, wendekele kuli ikeye ngwendi, “Shukulu Kalunga, Njambi ya Isalele, nakushiki ngwendi, ‘Twala vanu vakupwa 10,000 va ku muyati wa Nafetali na Zembuloni, vatwamenene ku Munkinda wa Tavole.

⁷ Co yange njikakokweya Sisela, muka-kushika wa nzita ya Njavine kwakulwa nove ku Ndonga ya Kishone. Co ikeye akaija na matemba endi na mashwalale vendi, oloni njikamukundika ku mavoko ove.’ ”

⁸ Asinoni Mbalake wamukumbulwile ngwendi, “Njikaya nga yove ukaya amo nange, oloni kunjikai nga yove kuukai amo nange.”

⁹ Co Ndembola wamukumbulwile ngwendi, “Mwamuvwa, njikaya amo nove, oloni kuukawana lutsimo lwakuhyana lwai, omwo Shukulu Kalunga akakundika Sisela ku mavoko a munakazi.” Ngecivene, Ndembola waile na Mbalake ku Kendeshe.

¹⁰ Co Mbalake wasanene miyati ya vanu va Zembuloni na Nafetali kuya ku Kendeshe, co vanalume vakupwa 10,000 vamukavele. Co Ndembola waile amolika nendi.

¹¹ Co Hevele wa ku muyati wa vaKeni washimbikile mbalaka yendi muyehi na Kendeshe, kuyehi na muti wa Oke ku Zananime. Ikeye walyangunukile na vakwavo vaKeni, va ka naanga ya Hombambi, nyali ya Mosesa.

¹² Omo valekele Sisela ngwavo Mbalake muna Avinowame nalamata laja ku Munkinda wa Tavole,

¹³ co ikeye wakungulwile matemba endi a vikuvo akupwa 900, na vanu vendi voshe, co watundile navo mu Haloshete ya Vaka-kujeneka kukulaela nakuya ku Ndonga ya Kishone.

¹⁴ Asinoni Ndembola wendekele kuli Mbalake ngwendi, “Ya! Shukulu Kalunga alinakukutwamenena! Ku litangwa lya lelo ikeye nakundika Sisela ku livoko lyove.” Ngecivene, Mbalake washelumukile kutunda ku Munkinda wa Tavole na vanalume vakupwa 10,000 vaje vamukavele.

¹⁵ Omo Mbalake washolokele na nzita yendi mukulwa, co Shukulu Kalunga wauya-wuyisile Sisela na matemba endi oshe na mashwalale. Sisela washulukile mu litemba lyendi, co watewele.

¹⁶ Mbalake washekele mashwalale na matemba, kweta na mu Haloshete ya Vaka-kujeneka kukulaela, co mashwalale voshe va Sisela vavatapele mitwe na mukwale. Naumo wai wasaleleo.

¹⁷ Sisela watewelele ku mbalaka ya Njaele, munakazi wa Hevele kaKeni, omwo kwakele kwoloka mukati ka Mwene Njavine wa ku Hazole na naanga ya Hevele kaKeni.

¹⁸ Njaele watuukile mukushesha Sisela, co wendekele kuli ikeye ngwendi, “Shukulu, kovela mu mbalaka yange. Kesi uzive lyova embwe.” Ngecivene, Sisela wakovelele, co wamufwikile kambilititi.

¹⁹ Co Sisela wendekele kuli Njaele ngwendi, “Njaneko mema njinwe, njili na lihwila.” Co Njaele wafukwile ku njeke ya cilambu mwakele mavele, co wamwanene wanwile, co wamufwikile lalo.

²⁰ Asinoni Sisela wamulekele ngwendi, “Imana ku cikolo ca mbalaka, co nga munu umo aija nakukwihula ngwendi, ‘Kuli munu umo kuno ndi?’ Co yove endeka ngwove wai.”

²¹ Sisela wajukile manene, ngeci waile mu tulo twakama. Co Njaele wambatele kavulo na pampalingo ya mbalaka, co wamumwengelelele nakumupameya mu mbanda ya litwi pwilili na mu livu.

²² Omo Mbalake wezile nakushakezeka Sisela, co Njaele watuukile mukumushesha, co wendekele kuli ikeye ngwendi, “Ija kuno njikumwese munalume iwulinakushakezeka.” Co Mbalake waile nendi, wakovelele muje mu mbalaka, co muje wawanenemo Sisela nalala asi natsi namupulyasana na pampalingo ya mbalaka mu mbanda ya litwi lyendi.

²³ Co a litangwa, lije Njambi waanene vaIsalele nzili yakufungulula Njavine mwene wa vaKanana.

²⁴ Co vakevo vamusindakanene manene noo vamunyongesele.