Maako 3 - Livulu lya Shukulu Kalunga

Miyati ya vanu vaje vasalele mu lifuti ngeci veseke vaIsalele

¹ Ngecivene, Shukulu Kalunga wasezele miyati ya vnu vamo mu lifuti ngeci veseke vaIsalele, vaje kuvalwile nzita na vaKanana.

² Ikeye walingile eci, ngeci alongese cisemwa na cisemwa ca vaIsalele kulwa nzita, vunene vene kuli vaje kuvalwile nzita ku simbu ya laja.

³ Vaje vasalele mu lifuti vakevo vimyene vaje vatanu va vaFilisitiya, na vaKanana voshe, na vaSindoniya, na vaHivi, vaje vakele mu Minkinda ya Lembanone kutunda ku Munkinda wa Mbale Helemone nakweta ku Ngila ya Hamate.

⁴ Vavasezeleo mukweseka vaIsalele, mukumona nga vononoka mashiko a Shukulu Kalunga aje aanene vakukulwila vavo ali Mosesa.

⁵ Ngecivene, vaIsalele vatungile akati ka vaKanana, na vaHiti, na vaAmoli, na vaPeleze, na vaHivi, na vaNjevushi.

⁶ Co valyambatelele navo, nakulemesa vinjambi vavo.

Otenyele

⁷ Co vanu vaIsalele valingile vuvi ku mesho a Shukulu Kalunga, vevalele Shukulu Kalunga Njambi yavo, nakulemesa tumponya twa vaMbale na Ashela.

⁸ Ngecivene, Shukulu Kalunga waluvalele na vaIsalele, co wavakundikile ku mavoko a Mwene Kushane Lishataime wa ku Mesopotamya, co vapwile vinzinda vendi myaka itanu na itatu.

⁹ Asinoni vaIsalele valililile kuli Shukulu Kalunga, co Shukulu Kalunga wavatuminine muyoyesi uje wavayoyesele. Lizina lyendi Otenyele, muna Kenaze shongo ya Kalembi.

¹⁰ Munzinzime wa Njambi wezile ali ikeye, co wapwile lyaako lya vaIsalele. Otenyele waile ku nzita, co Shukulu Kalunga wakundikile Mwene Kushane Lishataime wa ku Mesopotamya ku mavoko endi.

¹¹ Co mu lifuti mwakele kwoloka myaka makumi awana, asinoni Otenyele watsile.

Ehunde

¹² Co vanu va Isalele valingile lalo vuvi ku mesho a Shukulu Kalunga. Omwo eci, Shukulu Kalunga waanene nzili kuli Mwene Engilone wa ku Mowavi, co wafungulwile vaIsalele.

¹³ Co Engilone walipandakanene na vaAmoni, na vaAmaleke, co vafungulwile vaIsalele nakutambula Yeliko, nganda ya mashakaVaLe

¹⁴ Co vaIsalele vapwile vindungo kuli Engilone myaka likumi na itanu na itatu.

¹⁵ Asinoni vaIsalele valililile lalo kuli Shukulu Kalunga, co Shukulu Kalunga wavatuminine munalume ngeci avamene. Lizina lyendi Ehunde, munalume muka-cimoshwe, uje wapwile muna Ngela, wa ku muyati wa Mbenjemani. Ali ikeye vanu va Isalele vatumine milambu kuli Mwene Engilone wa vaMowavi.

¹⁶ Co Ehunde wafulile moko ya mukwale ya vuvela kuvali, co vulaja vwayo yapwile masentimita 50, co waikutiiye ku nyonga yendi ku livoko lya cilyo kwisi ya vuzalo vwendi.

¹⁷ Asinoni watwalele milambu kuli Engilone mwene wa vaMowavi, uje wapwile munalume wakununa manene.

¹⁸ Omo Ehunde naana laja milambu kuli ikeye, co walekele vaje vanu vambatele ije milambu kwiluka kwimbo.

¹⁹ Oloni Ehunde omo wetele ku mamanya akushonga aje akele kuyehi na Ngilingale, co welukile kunima kuli Engilone wendekele ngwendi, “Shukulu, njili na lijwi lya mu vushweke nove.” Ngecivene, mwene washikile vangamba vendi ngwendi, “Tusezeni etu lika!” Co voshe vatuukilemo.

²⁰ Ngecivene, mwene watumbamene endi lika mu njuvo yendi mu mulili wa kwilu wakutonola, co Ehunde wakovelelemo wendekele ngwendi, “Njili na lijwi nove linatundu kuli Njambi.” Co mwene wemanene.

²¹ Co na livoko lyendi lya cimoshwe, Ehunde washomwene mukwale, kuutundisa ku mutambela wa nyonga yendi ya ku cilyo kwisi ya vuzalo vwendi, wativile mu lifu lya mwene.

²² Co mukwale woshe wakovelelemo na cikundo cawo coshe, co mazi acifwikile. Ehunde kaushomwene lalo mu lifu lya mwene, mukwale wasakamenene mu lifu lya mwene, co watuukilile kunima.

²³ Asinoni Ehunde watuukile anja, co washokele mapito a ku njuvo ya kwilu kunima yendi, waapatele,

²⁴ co waile. Omwo nai laja, vangamba vezile, oloni vawanene mapito akupata, vakevo vayongwele ngeci mwene ali mukati acili nakulivwaesa.

²⁵ Co vavandamenene simbu yakama ngwe muvaselele, oloni omwo mwene kashokolwele ku cikolo, vanonele sapi nakushokololako. Co muje vamwene shukulu yavo nalala asi natsi.

²⁶ Simbu vacivandamena, Ehunde watewele. Wakatuvakanene mamanya akushonga, co watewelele ku Seila.

²⁷ Omo wetele mu lifuti lya malundu lya Efalime, co wembile lupembo mukusana vanu va Isalele mukulwa nzita, asinoni ikeye wavatwamenenene nakushelumuka kutunda ku lifuti lya malundu.

²⁸ Co wavalekele ngwendi, “Njikaveni! Omwo Shukulu Kalunga nakundika vitozi veni vaMowavi ku mavoko eni.” Ngecivene, vashelumukile nakukava Ehunde nakukafungulula mwela uje kuje kwakele vaMowavi, kuje kwakujavukila Yondau, co kuvatavele munu umo wa ku vaMowavi kujavuka ndonga.

²⁹ Co a litangwa lije vatsiile mashwalale va vaMowavi vakapwa 10,000 va nzili nakutakama, naumo wai wasaleleo.

³⁰ Co a litangwa lije vaIsalele vafungulwile vaMowavi, co mu lifuti mwakele kwoloka myaka makumi atanu na atatu.

Shamengale

³¹ Munima ya Ehunde kwezile Shamengale muna Anate. Na ikeye lalo wapwile ntwama ya vaIsalele, akutsiya vaFilisitiya vakupwa 600 na citi cakutimwisa vingombe.