Maako 21 - Livulu lya Shukulu Kalunga

Vanu va muyati wa Mbenjemani vavashakezekela vanakazi

¹ Omo vaIsalele valikungulwilile ku Mizipa, co valisingile cisingo ca cikumiiyo kuli Shukulu Kalunga ngwavo, “Naumo wai wetu akatava vaMbenjemani kwambata vana vetu va vanakazi.”

² Ngecivene, vanu va Isalele vaile ku Mbetele, co vatumbamene kuje ku mesho a Njambi noo ku cingwezi, valilile manene nakuzeya, co vendekele ngwavo,

³ “Shukulu Kalunga Njambi ya Isalele, omwo vikajo eci cinalingiwa? Omwo vikajo vanu va muyati wa Mbenjemani valinakuhwa mu Isalele?”

⁴ Alikaki mutondo-tondo, vanu vendukile, vatungile mutula kuje. Co vakombelelele vin̄ombelo vya kwenyeka, na vin̄ombelo vya kulitombola kuje.

⁵ Co vaIsalele vehwile ngwavo, “Veyajo ku miyati yoshe ya vanu va Isalele kuvakungulukile ku mesho a Shukulu Kalunga ku Mizipa?” (Omwo valisingile cisingo ca cikumiiyo ngeci woshe kakai ku Mizipa napande kutsa.)

⁶ Co vanu va Isalele vakele na vusiwa ali vandolome vavo vaMbenjemani, vendekele ngwavo, “Ku litangwa lya lelo vaIsalele vanazimbalesa vanu va muyati wavo umo.

⁷ Vationi tulinga mukuwanena vanakazi vaje vanalume va Mbenjemani vanasalao? Omwo tunalisingi laja cisingo ca cikumiiyo kuli Shukulu Kalunga ngeci naumo wai munetu wa munakazi itukavana.”

⁸ Omo vehwile nga kuli munga imo ya ku miyati ya vanu va Isalele vaje kuvakungulukile ku Mizipa, co vawanene ngeci naumo wai wakutunda ku Njembeshe mu Ngilyande wakele kuje,

⁹ omwo vasanene mazina a mashwalale, naumo wai ivawanene wakutunda ku Njembeshe wakele kuje.

¹⁰ Ngecivene, mbunga yatumine mashwalale vavo vakutakama vakupwa 12,000 vakulwa na mikwale nakuvashika ngwavo, “Yeni mukatsiye vanu va mu Njembeshe voshe, amo na vanakazi, na vanike.

¹¹ Eci cikeco cimukalinga na vanalume voshe na vanakazi voshe vaje valimona laja na vanalume.”

¹² Co vawanene vambanda vakupwa 400 vaje kanda valimone na vanalume akati ka vanu va mu Njembeshe, co vavanenele ku cilombo ca ku Shilo, cije cakele mu lifuti lya Kanana.

¹³ Asinoni cikungulukilo coshe catumine lijwi kuli vaMbenjemani, vaje vakele ku Limanya lya Limone nakuvaleka kuhwa kwa nzita.

¹⁴ Co vaMbenjemani velukile simbu ije, co vaIsalele vavaanene vanakazi va ku Njembeshe vaje kuvatsiile. Oloni kuvapwisilemo.

¹⁵ Co vanu vakele na vusiwa ali vaMbenjemani omwo Shukulu Kalunga napokola lizivasano lya miyati ya vanu va Isalele.

¹⁶ Ngecivene, vaje vantwama valikungulwile vendekele ngwavo, “Kukwesi vanakazi lalo mu muyati wa vanu va Mbenjemani. Vatijo tulinga mukushakezekele vanakazi vanalume ava vanasalao?

¹⁷ VaIsalele kuvapandele kujenekao muyati wavo umo, ku miyati ya vanu likumi na ivali. Tunapande kuwana ngila yakuyoyesa vanu va muyati wa Mbenjemani ngeci kesi vaziluke,

¹⁸ oloni yetu kutuvana vana vetu va vanakazi ngeci vavambate embwe, omwo tunaka laja cisingo, ngeci naumo wai akashombwesa munendi kuli vaMbenjemani.”

¹⁹ Co vayongwele ngwavo, “Ciwano ca a mwaka na mwaka ca Shukulu Kalunga ku Shilo cili muyehi.” (Shilo yakala ku kunto ya Mbetele, na mbwela ya Lembona, na ku ngangela ya tapalo mukati ka Mbetele na Shekeme.)

²⁰ Co valekele vaMbenjemani ngwavo, “Yeni mukavande mu mahya a mikolovozi ya vushuka vwa vinyu nakukengelela.

²¹ Omo vambanda va ku Shilo vaija mukukina simbu ya ciwano, co jombolokeni mu mahya a mikolovozi ya vushuka vwa vinyu. Co munu na munu akwate munakazi wa ku Shilo, co amutwale ku mutambela wa Mbenjemani.

²² Nga vaishavo nambe vandolome vavo vaija kuli yeni nakulinyenga, co valekeni ngweni, ‘Tweceleni tuvanyunge, omwo kutwavatundisile kuli yeni mu nzita kupwa vanakazi vetu embwe. Co lalo kesi yeni munatusanenenevo, yeni kumwesi na mulonga wai wakupokola cikulaeso ceni.’ ”

²³ Co vaMbenjemani valingile ngacije vene, munu na munu waangwile munakazi akati ka vambanda vaje vakele nakukina kuje ku Shilo, vamwambatele nakuya nendi. Co velukile ku mitambela yavo, vakatungulwile membo avo, co vakakele kuje.

²⁴ Co a simbu ije vene, vungi vwa vaIsalele vaje vasaleleo, munu na munu welukile ku muyati wendi na ku cikota cendi na ku vushwana vwendi.

²⁵ A simbu ije, kukwakele mwene mu Isalele, co munu na munu walingile cije cashakele.