Kutuuka 2 - Livulu lya Shukulu Kalunga

Kusemuka kwa Mosesa

¹ A simbu ije kwakele munalume wa ku muyati wa Levi ikeye wambatele munakazi wa ku muyati wendi.

² Co uje munakazi wakele na kafumba, wakitile mwana wa munalume. Omo wamwene vuvwa vwa uje mbututu, co wamushwekele vingonde vitatu.

³ Oloni omo kasele oni kumushweka simbu yakama, wanonele mutonga wakutunga na mahongo, wausatele na lipombosiwa ngeci mema kesi akovelemo. Co waakelemo mbututu, asinoni waumbwatekele ku ngenge ya ndonga mu cihongo.

⁴ Co ndokazi ya mbututu wemanene alyala kamandondo mukukengelela vika vikalingiwa ali mbututu.

⁵ Omo muna vamwene wezile ku ndonga nakujwela, vangamba vendi vendele ku ngenge ya ndonga. Co ikeye wamwene mutonga mu cihongo, co watumineko mumbanda wa ndungo ngeci akaunone.

⁶ Muna mwene waufukwile, wamwene muli mbututu wa munalume alinakulila, co wamuzivilile mema ku mbunge, wendekele ngwendi, “Ou ikeye umo wa vimbututu va vaHevelu.”

⁷ Asinoni ndokazi ya uje mbututu washwenyele kuyehi wehwile ngwendi, “Mutava njiye njikamisanene munakazi umo wa kaHevelu ngeci akumilelele ou mbututu ndi?”

⁸ Co muna mwene wamukumbulwile ngwendi, “Eyo zambula.” Co uje mumbanda waile wakashakele vaina ya mbututu vene.

⁹ Muna mwene walekele uje munakazi ngwendi, “Ambata ou mbututu ukanjileleleye, njikakufweta.” Ngecivene, uje munakazi wambatele uje mbututu wakamulelele.

¹⁰ Co omo mwanike wakolele, wamutwalele kuli muna mwene, wamupwisile munendi. Muna mwene wamulukile lizina lya Mosesa ngwendi, “Njamujavulwile mu mema, ngeci njamuluku lizina lyendi Mosesa.”

Mosesa avombolokela ku Mindyani

¹¹ Litangwa limo omo Mosesa nakolo laja, waile nakusikamesa vavushoko vwendi vaHevelu, wamwene tuyando twavo omo vakele nakuvasindiya nakuvapangesa vipangi vyavikalu. Co wamwene lalo umo kaIngito alinakupupa kaHevelu ka vushoko kendi.

¹² Mosesa wakengele noku-noku, kamwene munu naumo wai, co watsiile uje kaIngito washitikile muvila wendi mu lishen̄avu.

¹³ Alikaki lalo welukilileko, wamwene vaHevelu vavali va vanalume valinakulwa. Co wendekele kuli uje waviisile ngwendi, “Omwo vikajo ulinakupupanga mukweni kaHevelu ngacije?”

¹⁴ Co uje munalume wamukumbulwile ngwendi, “Iyajo nakupwisa muka-kushwana nambe muka-kusompa akati ketu? Kuma yove ushaka kunjitsiya ngwe muje muunatsiile uje kaIngito ndi?” Co Mosesa wakele na lyova, co walyendekesele ikeye vavenya ngwendi, “Kuma vanu vanazivuka eci njinalingi.”

¹⁵ Co omo mwene wazivile vije vyalingiwile, washakele kutsiya Mosesa, oloni Mosesa watewele, wakakele ku lifuti lya Mindyani. Mosesa watumbamene ku lisima.

¹⁶ Co muka-kukombelela wa ku Mindyani wakele na vana vendi vatanu na vavali va vanakazi. Co vaje vambanda vezile nakutekula mema. Vashulisile mato muje vakele nakunwila vimanga na vimembe va ishavo.

¹⁷ Co tunyungi vamo vezile nakusheka vana va Yetolo, oloni Mosesa wakatukile nakuvamena, co wanwisile vutanga vwa vana va Yetolo.

¹⁸ Omo velukile kwimbo, co ishavo wavehwile ngwendi, “Omwo vikajo muneluka vwasi litangwa lya lelo?”

¹⁹ Co vamukumbulwile ngwavo, “KaIngito umo natwamena kuli vaje tunyungi vaka-kutuvindika. Ikeye natutekwilako mema nakunwisa vimuna vetu.”

²⁰ Yetolo wehwile vana vendi va vanakazi ngwendi, “Ikeye ali kuli? Vikajo munasezela owo munalume? Yeniko mukamusane twakulye nendi.”

²¹ Ngecivene, Mosesa watavele kukala na Yetolo, co Yetolo wamwanene munendi wa munakazi Zipola ngeci amwambate.

²² Co wakitile nendi mwana wa munalume wamulukile lizina lyendi Ngeleshome ngwendi, “Yange nji muka-kwija mu lifuti lya vungenzi.”

²³ Co omo kwetile myaka yaingi, mwene wa Ingito watsile. Oloni vaIsalele vakele nakukemanga omwo ya vundungo vwavo, vakele nakutambeka ngeci vavakwase. Co mutambi wavo wetele kuli Njambi.

²⁴ Njambi wazivile kukemanga kwavo, wanukile cikumiiyo cendi na Avilahama, na Isake, na Yakomba.

²⁵ Ngecivene, Njambi wamwene vundungo vwa vaIsalele, co wavazivilile mema ku mbunge.