Kutuuka 11 - Livulu lya Shukulu Kalunga

Mosesa ambulula kutsa kwa va ntwatwa

¹ Asinoni Shukulu Kalunga wendekele kuli Mosesa ngwendi, “Kunasala cihiso cimolika kuli mwene wa Ingito na vanu vendi. Co munima ya cihiso eci asinoni akamyecela muye. Mwa vushunga vene, akamishekamo yeni voshe.

² Endeka kuli vanu va Isalele, valeke voshe ngeci vakalombe kuli vandambo vavo vaka-Ingito vyakuzala vya senga vya ngolinde na siliva.”

³ Co Shukulu Kalunga walingisile vaka-Ingito kusingimika vaIsalele. Mwa vushunga, vamyata va mwene na vanu voshe va mu Ingito vayongwele Mosesa kupwa munu wakama mu lifuti lya Ingito mwoshe.

⁴ Ngecivene, Mosesa wendekele kuli mwene ngwendi, “Shukulu Kalunga nendeka ngwendi, ‘Mukati ka vutsiki njikaita mu Ingito,

⁵ co vana va va ntwatwa voshe va vanalume va mu Ingito vakatsa, kushangumukila ali muna mwene, uje akashwana a litanda, kukamanesela kuli muna ndungo wa ntwatwa, uje akatu tiliku. Co na vana va vimuna voshe va nkomba vakulivanga kusemuka vakatsa lalo.

⁶ Co kukakala kulila mbimbi-mitwe mu Ingito mwoshe, kuje kukwakeleko akulivanga nameme kucikakalako lalo kulutwe embwe.

⁷ Oloni kukukakala katali akavwoza ali vaIsalele nameme a vimuna vavo. Asinoni mukazivuka ngweni yange Kalunga, njinaangununa akati ka vaka-Ingito na vaIsalele.’ ”

⁸ Mosesa wendekele lalo ngwendi, “Vamyata vove voshe vakaija kuli yange nakunjitsikamena, co vakanjilomba ngeci njiye na vanu vange voshe. Co munima yevi, njikaya.” Asinoni Mosesa waluvalele manene, co watundile kuli mwene.

⁹ Co Shukulu Kalunga walekele Mosesa ngwendi, “Mwene akavyana kumitolilila, ngeci vikomokeso vyange vitume mu Ingito.”

¹⁰ Mosesa na Alone valingile vikomokeso vyoshe evi ku mesho a mwene, oloni Shukulu Kalunga wakaluwisile manene mbunge ya mwene, co katavele kweca vaIsalele vatunde mu lifuti lyendi.