Kulava 8 - Livulu lya Shukulu Kalunga

Alone ashwameka vindeya

¹ Shukulu Kalunga wendekele kuli Mosesa ngwendi,

² “Leka Alone ngwove, omo ushwameka vindeya vije vitanu na vivali, vinapande kutwila ceke kulutwe lwa citumbikilo ca vindeya.”

³ Alone wononokele, co washwamekele vindeya nakuvikengesa kulutwe lwa citumbikilo cavyo ngwe muje mwashikile Shukulu Kalunga kuli Mosesa.

⁴ Omu mukemwo muvapangele citumbikilo ca vindeya, vacipameyeye na ngolinde kutunda ku citumbikilo caco kweta ku vishani vyaco, califwile na seteko ije yamwesele Shukulu Kalunga Mosesa.

Kujelesa nakukundika vaLevi

⁵ Shukulu Kalunga wendekele kuli Mosesa ngwendi,

⁶ “Angununa vaLevi akati ka vanu va Isalele nakuvajelesa.

⁷ Akuvajelesa linga ngeci, vashamwine mema akuvajelesa, co vateule a mivila yavo yoshe, vakushe lalo vuzalo vwavo, co vakajela.

⁸ Asinoni vakambate muna ngombe wa nkomba na n̄ombelo ya vimbuto ya vunga vwavuvwa vwakuseneta vwakukumbasana na mazi a olive, co yove ukambata muna ngombe wa nkomba mukwavo kupwa n̄ombelo ya a vuvi.

⁹ Co ukakungulula mbunga yoshe ya Isalele, co vaLevi vakemane kulutwe lwa Mbalaka Mwakuliwanena.

¹⁰ Ukatwale vaLevi ku mesho a Shukulu Kalunga, co vanu va Isalele vakakambeke mavoko avo a mitwe ya vaLevi,

¹¹ co Alone akaane vaLevi ku mesho a Shukulu Kalunga kupwa mulambu vwana vwavuvwa vwa vanu va Isalele, ngeci vapwe vavo akupanga vipangi vya Shukulu Kalunga.

¹² Co vaLevi vakakambeka mavoko avo a mitwe ya vaje vingombe va nkomba vavali, co umo akapwe wa n̄ombelo ya a vuvi, mukwavo akapwe wa n̄ombelo ya kwenyeka mukujelesa vaLevi.

¹³ “Co ukemika vaLevi ku mesho a Alone na vana vendi, ukavane kupwa mulambu wauvwa kuli Shukulu Kalunga.

¹⁴ Mu ngila eyi ukaangununa vaLevi akati ka vanu va Isalele voshe, co vakapwa vange.

¹⁵ Omo unajelesa nakukundika vaLevi, co vaLevi vakasa kupanga vipangi mu Mbalaka Mwakuliwanena.

¹⁶ Omwo voshe vananjanavo kutunda akati ka vaIsalele, co njinavengisa mu mwela wa va ntwatwa va vanu vaIsalele, co njinalyangwilavo yange vavenya.

¹⁷ Omwo va ntwatwa voshe va mu naanga ya vaIsalele vanapu vange, va ntwatwa va vanu na ava va vimuna. A litangwa lije omo njatsiile va ntwatwa voshe mu Ingito, njalijeleselelevo kupwa munange wa ntwatwa.

¹⁸ Co njinambata vaLevi kwinga muli va ntwatwa voshe va vanu va Isalele.

¹⁹ Ngecivene, njinaana vaLevi kuli Alone na vana vendi kupwa vwana, akati ka vanu va Isalele nakupanga vipangi mu Mbalaka Mwakuliwanena na mukwambesa vanu va Isalele ngeci kesi kukale mushongo wakulitambwisa akati kavo, omo vanu vashwenya kuyehi na Mwela Wakujela.”

²⁰ Ngecivene, Mosesa na Alone na mbunga yoshe ya vanu va Isalele vakundikile vaLevi, ngwe muje mwashikile Shukulu Kalunga Mosesa.

²¹ Co vaLevi valijelesele ku vuvi nakukusha vuzalo vwavo, co Alone wavakundikile kuli Shukulu Kalunga kupwa vwana vwavuvwa. Co lalo wavaambesele nakuvajelesa.

²² Vanu va Isalele valingile vyuma vyoshe vije vyashikile Shukulu Kalunga kuli Mosesa vyakukundama kuli vaLevi. Ngecivene, vaLevi vasele kukovela mu Mbalaka Mwakuliwanena nakupangela Alone na vana vendi.

²³ Shukulu Kalunga wendekele kuli Mosesa ngwendi,

²⁴ “Eci cikeco cakundama kuli vaLevi, kushangumuka kuli vaje vali na myaka makumi avali na myaka itanu nambe kutuvakana, vakevo vakakovela nakupanga vipangi vya mu Mbalaka Mwakuliwanena.

²⁵ Oloni omo vakapwisa myaka makumi atanu, co vakahwima, kuvakapanga lalo,

²⁶ kuvanga vakakwase lika vandolome vavo kunyunga mu Mbalaka Mwakuliwanena, co kesi vakapange vipangi embwe. Omu mukemwo mukendesela vipangi vya vaLevi.”