Kulava 6 - Livulu lya Shukulu Kalunga

Mashiko a vaNazalite

¹ Shukulu Kalunga wendekele kuli Mosesa ngwendi,

² “Leka vanu va Isalele ngwove, munalume woshe nambe munakazi uje alisinga cisingo ngeci apwe kaNazalite nakulikundika ikeye vavenya kuli Shukulu Kalunga,

³ akalyangunune ku vinyu na ku vwala. Kesi akanwe ku muyati umo wa vinyu vyakungangamena nambe kulya vushuka vwa vinyu vwakutonola nambe vwakuma.

⁴ Omo napu kaNazalite, kesi akalye cuma cimo cakutunda ku mukolovozi wa vushuka vwa vinyu, nameme mikavo, nambe vishwashwa vya vushuka.

⁵ “Nga ikeye nalisingi kupwa kaNazalite, kapandele kuteula vin̄ambu vyendi nambe munjezi. Ikeye ali na cisingo noo matangwa akulikundika kuli Shukulu Kalunga anapumo ngeci apwe wakujela, akecelele vin̄ambu vyendi na munjezi wendi ngeci vipwe vyavilaja.

⁶ “Matangwa oshe aje analikundika kuli Shukulu Kalunga kesi akashwenye kuyehi na civimbi,

⁷ nambe ca ishe, nambe ca vaina, nambe ca ndolome yendi, nambe ca ndokazi yendi. Nga vakevo vanatsi, kesi alijwalese ikeye vavenya embwe, omwo vin̄ambu vyendi vinapu cimweso cakulikundika kwendi kuli Njambi.

⁸ Omo napu kaNazalite apwe wakujela kuli Shukulu Kalunga.

⁹ “Nga vin̄ambu vya kaNazalite vije nalikundika navyo navijwalesa omwo munu amutsila a mesho na cintulu, co napande kukala matangwa atanu na avali, asinoni akateule vin̄ambu vyendi na munjezi.

¹⁰ A litangwa lyamucitanu na atatu akatwale tutela vavali nambe mayembe vavali kuli muka-kukombelela ku cikolo ca Mbalaka Mwakuliwanena.

¹¹ Co muka-kukombelela akakombelelao umo kupwa n̄ombelo ya a vuvi, co mukwavo kupwa n̄ombelo ya kwenyeka mukumwambesa, omo nalingi vuvi vwakukwata a civimbi. Co a litangwa lije vene akajelesa mutwe wendi.

¹² Co napande kulikundika lalo kuli Shukulu Kalunga a simbu ya vuNazalite vwendi nakutwala lijamba lya muna manga wa mwaka umo kupwa n̄ombelo yakuliilwisila. Oloni matangwa aje akulivanga akapwa angoco omwo vin̄ambu vyendi vyakukundika vyajwalele.

¹³ “Eli likelyo lishiko lya kaNazalite omo matangwa a cisingo cendi anapumo. Vakamutwale ku cikolo ca Mbalaka Mwakuliwanena na Shukulu Kalunga,

¹⁴ co ikeye akatwale kuli Shukulu Kalunga, lijamba umo wa muna manga wa mwaka umo wakujeneka kapenga wa mulambu wa kwenyeka, na muna manga wa lwavo wa mwaka umo wakujeneka kapenga wa mulambu wa a vuvi, co na lijamba lya manga wakujeneka kapenga wa mulambu wa kulitombola.

¹⁵ Co akalambula lalo mutonga wa makende akujeneka musima, na mashama-shama a kuhima a vunga vwakuseneta vwakukumbasana na mazi a olive, amo na mulambu wavyo wa vimbuto vya vinona na mulambu wavyo wa vinyu.

¹⁶ “Co muka-kukombelela akatwale evi vyoshe kuli Shukulu Kalunga nakulambula mulambu wa a vuvi na mulambu wa kwenyeka.

¹⁷ Akakombelele lalo lijamba lya manga kupwa mulambu wa kulitombola kuli Shukulu Kalunga, na mutonga wa makende akujeneka musima, co muka-kukombelela akatwale mulambu wa vimbuto vya vinona na mulambu wa vinyu.

¹⁸ Co uje kaNazalite akalitewile vin̄ambu vyendi ku cikolo ca Mbalaka Mwakuliwanena nakuvyaka a liko aje vakenyekela mulambu wa kulitombola.

¹⁹ Asinoni, muka-kukombelela akambate lyehe lya lijamba lya manga lyakuteleka, amolika na mukasha umo wa likende lya kuhima na kalishama-shama kakandondo ka musima kakutunda mu mutonga, akavyake mu mavoko a uje kaNazalite.

²⁰ Co muka-kukombelela akavitwale kupwa vwana vwavuvwa vwakwana kuli Shukulu Kalunga. Co vikevyo vikapwa, ngwe ku lishiko, mutambela wakujela wa muka-kukombelela amo na lindi lya lijamba lya manga vije valambwile. Akumanesa vyuma evi, co uje kaNazalite akasa oni kunwa vinyu.

²¹ “Eli likelyo lishiko lya kaNazalite uje alisinga cisingo. Oloni nga kaNazalite akulaesa kulambula mulambu kutuvakana vije vyanalisingile akulivanga, co ikeye napande kushulisa mwamuvwa cisingo cije canalisingile.”

Lilombelo lya vaka-kukombelela ngeci Njambi avezikise vanu

²² Shukulu Kalunga washikile Mosesa ngwendi,

²³ “Leka Alone na vana vendi ngwove, omu mukemwo mumukavezikisa vanu va Isalele nakwendeka ngweni,

²⁴ ‘Shukulu Kalunga amivezikise nakuminyunga,

²⁵ Shukulu Kalunga amitetele, nakumizivilako ngozi,

²⁶ Shukulu Kalunga amizivile mema ku mbunge nakumyana kwoloka.’ ”

²⁷ Shukulu Kalunga wendekele ngwendi, “Nga mukatumbula lizina lyange mukuvezikisa vanu va Isalele, co njikavavezikisa vene.”