Kulava 4 - Livulu lya Shukulu Kalunga

Vipangi vya vaLevi vaka-cikota ca Kohate

¹ Shukulu Kalunga wendekele kuli Mosesa na Alone ngwendi,

² “Laveni vaLevi vaka-cikota ca Kohate ngwe mu naanga yavo na ku cikota cavo.

³ Laveni vanalume voshe, vaje vali na myaka makumi atatu nakweta kuli vaje vali na myaka makumi atanu, vaje vasa kupanga mu Mbalaka Mwakuliwanena.

⁴ Evi vikevyo vipangi vya vaKohate vyakunyunga vyuma vyakujela manene mu Mbalaka Mwakuliwanena.

⁵ Omo simbu yeta yakujaluka mu cilombo, Alone na vana vendi vakakovele mu Mbalaka Mwakuliwanena, nakutundisa livamba nakulifwika a Cikasa ca Cikumiiyo.

⁶ Co vakafwike a Cikasa vilambu vya mavau vyakufutungula mwamuvwa, co akamwa ya vilambu vya mavau vakafwikeo nanga yakukola yakuzivuluka, asinoni vakashomazekako mikambo yakwambatela.

⁷ “Co vakajala nanga yakuzivuluka a mesa aje vakaka makende a ku mesho a Shukulu Kalunga, nakwakao lalo malonga akukunama, na malonga akwenyekela insense, na malonga a milambu, na vinjava vya milambu ya vinyu. Co makende akakale a mesa simbu yoshe.

⁸ Vyoshe evi vavifwike na nanga yakuvenguluka, co akamwa vakafwikeo vilambu vya mavau vyakufutungula mwamuvwa, asinoni vakashomazekako mikambo yakwambatela.

⁹ “Asinoni vakanona nanga yakuzivuluka nakuyifwika akamwa ya citumbikilo ca vindeya amo na vindeya vyaco, na vimana, na malonga, na malulu oshe a mazi a olive.

¹⁰ Co vakavivungile mu vilambu vya mavau vyakufutungula mwamuvwa amo na vivala vyavwo vyoshe nakuvyaka a mikambo yakwambatela.

¹¹ Kutundoo, vakajale nanga yakuzivuluka akamwa ya mutula wa ngolinde, co akamwa vakafwikeo vilambu vya mavau vyakufutungula mwamuvwa, asinoni vakashomazekako mikambo yakwambatela.

¹² Vakambate vyuma vyoshe vije vyakupangesa mu Mwela Wakujela, nakuvivungila mu nanga yakuzivuluka, co akamwa vakafwikeo vilambu vya mavau vyakufutungula mwamuvwa, vavyake a mikambo yakwambatela.

¹³ Co vakakombe lito lya mazi ku mutula nakujalao nanga yakuvenguluka.

¹⁴ Co vakakeo vivala vyoshe vyakupangesa ku mutula, na vikango vya tuhya, na makulo, na vifwosholo, na tumalonga. Asinoni vakavifwike na vilambu vya mavau vyakufutungula mwamuvwa nakushomazekako mikambo yakwambatela.

¹⁵ Omo simbu yeta yakujaluka mu cilombo, co Alone na vana vendi vakafwike vivala vyoshe vyakujela vya mu Mbalaka. Asinoni vaka-cikota ca Kohate vakaija nakuvyambata, oloni kesi vakakwate ku vivala vyakujela kutewa vakatsa. Evi vikevyo vitele vivakambata vaka-cikota ca Kohate vya mu Mbalaka Mwakuliwanena.

¹⁶ “Elyazale muna Alone muka-kukombelela, ikeye akakala na moko yakunyunga vyoshe vya mu Mbalaka Mwakuliwanena, na mazi a mu vindeya, na insense yakunika lwengo lwaluvwa, na n̄ombelo ya vimbuto ya a litangwa na litangwa, na mazi akuvwava, na vyuma vikwavo lalo vya mu Mbalaka Mwakuliwanena.”

¹⁷ Shukulu Kalunga wendekele kuli Mosesa na Alone ngwendi,

¹⁸ “Kesi mukatave vaka-cikota ca Kohate ngeci vanyonge akati ka vaLevi

¹⁹ akushwenya kuyehi na vyuma vyakujela manene. Akuvindika eci ngeci kesi cilingiwe, Alone na vana vendi vakakovele mukati ka Mbalaka ngeci vakaane munu na munu vipangi vyendi, nakumuleka vije napande kupanga. Lingeni ngacije navo ngeci vayoye, kesi vatse omo vashwenya ku vyuma vyakujela manene.

²⁰ Oloni vaKohate kesi vakakovele mu Mbalaka nakushumbila a vyuma vyakujela nambe kasimbu kakandondo embwe, kutewa vakatsa.”

Vipangi vya vaLevi vaka-cikota ca Ngeleshone

²¹ Shukulu Kalunga wendekele kuli Mosesa ngwendi,

²² “Lava lalo vana va vaLevi va vanalume vaka-cikota ca Ngeleshone ngwe mu naanga yavo na ku cikota cavo.

²³ Co lava vanalume voshe vaje vali na myaka makumi atatu kweta kuli vaje vali na myaka makumi atanu, vaje vasa kupanga vipangi vya mu Mbalaka Mwakuliwanena.

²⁴ Vakevo vakakala na moko yakwambata vivala evi,

²⁵ Mbalaka, na cifwiko cayo ca mukati, na cifwiko cayo ca anja, na vilambu vya mavau vyakufutungula mwamuvwa vyakufwika akamwa yayo, na livamba lya ku cikolo ca Mbalaka Mwakuliwanena.

²⁶ Co lalo vakambata mavamba na mikole ya ku cipango cakuzengeleka Mbalaka, na mutula, na livamba lya ku cikolo ca cipango, na vyuma vyoshe vyakupangesa. Co vakevo vakapanga vipangi vije vishakiwa a vyuma evi.

²⁷ Mosesa na Alone vakevo vakamona ngeci vaNgeleshone vali na kupanga vipangi vyoshe evi nakwambata vyuma vyoshe vije Alone na vana vendi vavanavyo.

²⁸ Co Itamale muna Alone akakala na moko yakupangesa vaka-cikota ca Ngeleshone mu vipangi evi vyoshe vya mu Mbalaka Mwakuliwanena.”

Vipangi vya vaLevi vaka-cikota ca Melali

²⁹ Shukulu Kalunga walekele lalo Mosesa kulava vaLevi vaka-cikota ca Melali ngwe ku naanga yavo na ku cikota cavo,

³⁰ nakusoneka vanalume voshe vaje vali na myaka makumi atatu kweta kuli vaje vali na myaka makumi atanu, vaje vasa kupanga vipangi vya mu Mbalaka Mwakuliwanena.

³¹ Vakevo vakakala na moko yakwambata vivuliko, na mavalo, na vimanda, na vitumbikilo vya Mbalaka Mwakuliwanena.

³² Co lalo vakambata vimanda, na vitumbikilo, na vipampalingo, na mikole ya ku cipango cakuzengeleka Mbalaka, na vyoshe vyakukutisa mbalaka omo vaimika. Co munu na munu vakamuleka vije napande kwambata.

³³ Co Itamale muna Alone muka-kukombelela akakala na moko yakupangesa vaka-cikota ca Melali mu vipangi evi vyoshe vya mu Mbalaka Mwakuliwanena.

Kulava vaLevi

³⁴ Akukava lishiko lya Shukulu Kalunga, Mosesa na Alone, na vantwama va mu mbunga valavele vaKohate ngwe mu naanga yavo na ku cikota cavo,

³⁵ nakulava vanalume voshe vaje vakele na myaka makumi atatu nakweta kuli vaje vakele na myaka makumi atanu, vaje vasele kupanga mu Mbalaka Mwakuliwanena.

³⁶ Vavalavele ku cikota cavo vapwile 2,750.

³⁷ Ovu vukevwo vungi vwa voshe vaje vaka-cikota ca Kohate vaje vapangele mu Mbalaka Mwakuliwanena. Co Mosesa na Alone vavalavele ngwe muje mwashikile Shukulu Kalunga kuli Mosesa.

³⁸ VaNgeleshone vavalavele ngwe mu naanga yavo na ku cikota cavo.

³⁹ Vanalume voshe kutunda ku myaka makumi atatu nakweta ku myaka makumi atanu vaje vasele kupanga vipangi mu Mbalaka Mwakuliwanena,

⁴⁰ vavalavele mu naanga yavo na ku cikota cavo vapwile 2,630.

⁴¹ Ovu vukevwo vungi vwa vaje vaka-cikota ca Ngeleshone vaje vapangele mu Mbalaka Mwakuliwanena, Mosesa na Alone vavalavele ngwe muje mwashikile Shukulu Kalunga.

⁴² VaMelali vavalavele ngwe mu naanga yavo na ku cikota cavo.

⁴³ Vanalume voshe kutunda ku myaka makumi atatu nakweta ku myaka makumi atanu, vaje vasele kupanga vipangi mu Mbalaka Mwakuliwanena,

⁴⁴ vavalavele ku cikota cavo vapwile 3,200.

⁴⁵ Ovu vukevwo vungi vwa vaje vaka-cikota ca Melali, Mosesa na Alone vavalavele ngwe muje mwashikile Shukulu Kalunga kuli Mosesa.

⁴⁶ Co Mosesa na Alone na vantwama va Isalele valavele vaLevi voshe ngwe mu naanga yavo na ku cikota cavo.

⁴⁷ Vanalume voshe kutunda ku myaka makumi atatu nakweta ku myaka makumi atanu, vaje vasele kupanga vipangi nakwambata vivala vya mu Mbalaka Mwakuliwanena.

⁴⁸ Vungi vwavo vapwile 8,580.

⁴⁹ Ngwe muje mwashikile Shukulu Kalunga kuli Mosesa, mukemwo vene mwavalavelele, munu na munu kupwisa ku vipangi vyendi na ku cikota cendi. Mukemwo mwavalavelele Mosesa ngwe muje mwashikile Shukulu Kalunga.