Kulava 3 - Livulu lya Shukulu Kalunga

Vana va Alone va vanalume

¹ Eyi ikeyo naanga ya Alone na Mosesa a simbu ije omo Shukulu Kalunga wendekele kuli Mosesa a Munkinda wa Sinai.

² Alone wakele na vana vawana va vanalume, mazina avo, Nandave ikeye ntwatwa, na Avihu, na Elyazale, na Itamale.

³ Vavavwavesele nakuvakundika kupwa vaka-kukombelela,

⁴ oloni Nandave na Avihu vatsililile mu Mambo ya Sinai omo vakombelelele tuhya twakujeneka kujela kuli Shukulu Kalunga ngwe ku mashiko a Mosesa. Vakevo kuvakele na vana, ngecivene, Elyazale na Itamale vapangele vipangi vya vuka-kukombelela a simbu yakuyoya kwa ishavo Alone.

VaLevi vavaangula kupangela vaka-kukombelela

⁵ Shukulu Kalunga wendekele kuli Mosesa ngwendi,

⁶ “Nena kulutwe muyati wa Levi ngeci uvaangule vapwe vaka-kupangela muka-kukombelela Alone.

⁷ Vakevo vakapanga vipangi vije vishakiwa ku Mbalaka Mwakuliwanena nakupangela vaka-kukombelela na mbunga yoshe.

⁸ Vakevo vakanyunga vivala vyoshe vya mu Mbalaka Mwakuliwanena nakupangela vanu va Isalele omo vakapanga cipangi ca ku Mbalaka Mwakuliwanena.

⁹ Moko ya vaLevi yapwa kupangela Alone na vana vendi omwo vanamwanavo voshe kupwa vwana vwendi vwakutunda muli vanu va Isalele.

¹⁰ Ukemika Alone na vana vendi kupanga vipangi vya vuka-kukombelela, oloni munu woshe-iwoshe akashwenya kuyehi, vakamutsiye.”

¹¹ Shukulu Kalunga wendekele lalo kuli Mosesa ngwendi,

¹² “VaLevi vanapu vange vanengi muli va ntwatwa voshe va vanalume va Isalele.

¹³ Omo njatsiile va ntwatwa voshe va vaka-Ingito, njalijeleselele yange vavenya va ntwatwa voshe va vanalume va mu naanga ya vaIsalele, co na vimuna va nkomba vakulivanga kusemuka, vakapwa vange. Yange njapwa Kalunga.”

Kulava cikota ca Levi

¹⁴ Co mu Mambo ya Sinai Shukulu Kalunga washikile Mosesa

¹⁵ kulava vikota na naanga ya Levi, kulava vanalume voshe vaje vali na ngonde imo nambe kutuvakana.

¹⁶ Co Mosesa walingile ngacije.

¹⁷ Levi wakele na vana vatatu va vanalume, mazina avo, Ngeleshone, na Kohate, na Melali. Ava vakevo vapwile vakukulwila va vikota vaje valilukile mazina ava.

¹⁸ Awa akewo mazina a vana va Ngeleshone na naanga yavo vapwile, Limbeni, na Shimei.

¹⁹ Co vana va Kohate na naanga yavo vapwile, Amelame, na Izehale, na Hevelone, na Uziyele.

²⁰ Co vana va Melali va vanalume na naanga yavo vapwile, Maheli, na Mushi. Eyi ikeyo naanga ya vaLevi ngwe ku vikota vya vaishavo.

²¹ Ku cikota ca Ngeleshone kwatundile naanga ya Limbeni na naanga ya Shimei.

²² Co vungi vwa vanalume vaje vavalavele va ngonde imo nambe kutuvakana vapwile 7,500.

²³ Cikota ca Ngeleshone vashimbikile cilombo cavo kunima ya Mbalaka mu kangombe ka yambi.

²⁴ Co Elyasafe muna Laele wapwile mukulunu wa cikota ca vaNgeleshone.

²⁵ VaNgeleshone vakele na moko yakunyunga Mbalaka Mwakuliwanena, na cifwiko cayo ca mukati, na cifwiko cayo ca anja, na livamba lya ku cikolo,

²⁶ na mavamba a ku cipango, na livamba lya ku cikolo ca cipango cazengelekele Mbalaka na mutula, na mikole yayo yoshe. Ngecivene, vakevo vakele na moko ya vyakupangesa vyoshe vije vyakundamene ku vivala evi.

²⁷ Co ku cikota ca Kohate kwatundile naanga ya Amelame, na Izehale, na Hevelone, na Uziyele. Eci cikeco cikota ca Kohate.

²⁸ Vungi vwa vanalume vavalavele va ngonde imo nambe kutuvakana vapwile 8,600.

²⁹ Cikota ca Kohate vatungilile cilombo cavo mu mbwela ya Mbalaka Mwakuliwanena,

³⁰ co Elizafane muna Uziyele wapwile mukulunu wa cikota ca Kohate.

³¹ Co vakele na moko yakunyunga Cikasa ca Cikumiiyo, na mesa, na citumbikilo ca vindeya, na mitula, na vije vakele nakupangesa vaka-kukombelela mu Mwela Wakujela, na livamba lya ku cikolo ca mu Mwela Wakujela Manene. Vakevo vakele na moko ya vyakupangesa vyoshe vije vyakundamene ku vivala evi.

³² Co mukulunu wa vaLevi wapwile Elyazale muna Alone muka-kukombelela. Ikeye wakele na moko ali vaje vakele nakupanga mu Mwela Wakujela.

³³ Co ku cikota ca Melali kwatundile naanga ya Maheli, na Mushi.

³⁴ Vungi vwa vanalume vavalavele va ngonde imo nambe kutuvakana vapwile 6,200.

³⁵ Co cikota ca Melali vatungilile cilombo cavo ku kunto ya Mbalaka Mwakuliwanena, co Zulyele muna Avihele wapwile mukulunu wa cikota ca Melali.

³⁶ Vakevo vakele na moko yakunyunga vivuliko vya Mbalaka na mikambo yayo, na vimanda na vitumbikilo, na vyoshe vyakukutisa. Vakevo vakele na moko ya vyakupangesa vyoshe vyakundamene ku vivala evi.

³⁷ Vakevo lalo vakele na moko yakunyunga vimanda, na vitumbikilo, na vipampalingo, na mikole yoshe ya cipango.

³⁸ Mosesa na Alone na vana vendi vatungilile cilombo cavo kulutwe lwa Mbalaka mu ngangela. Co vakevo vakele na moko yakupanga vipangi vya mu Mwela Wakujela mukwimanenako vanu va Isalele. Munu weka woshe ashwenya kuyehi vapandele kumutsiya.

³⁹ Vungi vwa vaLevi vaje vavalavele, vanalume va ngonde imo nambe kutuvakana, vaje Mosesa na Alone vavalavele ku vikota vyavo ngwe muje mwashikile Shukulu Kalunga, vapwile 22,000.

Kukula va ntwatwa va vanalume

⁴⁰ Shukulu Kalunga wendekele kuli Mosesa ngwendi, “Lava va ntwatwa voshe va vanalume va vanu va Isalele vaje vanakundama kuli yange. Ngecivene, vasoneke mazina avo, voshe vaje vali na ngonde imo nambe kutuvakana.

⁴¹ Oloni njalyangwila vaLevi ngeci vapwe vange vainge mu mwela wa va ntwatwa va vanalume va vanu va Isalele. Yange njapwa Kalunga. Co lalo njalyangwila vimuna voshe va vaLevi vainge mu mwela wa vimuna va va ntwatwa voshe va vanu va Isalele kupwa vange.”

⁴² Mosesa wononokele, co walavele va ntwatwa va vanalume voshe va vanu va Isalele ngwe muje mwashikile Shukulu Kalunga,

⁴³ va ntwatwa voshe vaje vakele na ngonde imo nambe kutuvakana. Vungi vwavo vapwile 22,273.

⁴⁴ Shukulu Kalunga wendekele kuli Mosesa ngwendi,

⁴⁵ “Kundika vaLevi ngeci vapwe vange vainge mu mwela wa va ntwatwa voshe va vanalume va vanu va Isalele, co kundika lalo vimuna va vaLevi kwinga mu mwela wa vimuna va nkomba vakulivanga kusemuka va vanu va Isalele.

⁴⁶ Omwo vungi vwa va ntwatwa va vanalume va vanu va Isalele vanatuvakana vaLevi na 273, co unapande kukula vaje vana va vanalume vanasalao.

⁴⁷ Ukatambula ku munu na munu mavundungulu atanu a siliva, ngwe ku ndando ivemika,

⁴⁸ co vimbongo vije vivanakulile vaje vanasaleleo vyane kuli Alone na vana vendi.”

⁴⁹ Co Mosesa watambwile vimbongo vya kukula kuli vaje vasaleleo vavakulile vaLevi,

⁵⁰ watambwile mavundungulu 1,365 a siliva kuli va ntwatwa va vanu va Isalele ngwe ku ndando ivemika.

⁵¹ Mosesa waanene vimbongo vije vakulile va ntwatwa vaje vasaleleo kuli Alone na vana vendi ngwe ku lijwi lya Shukulu Kalunga.