Kulava 2 - Livulu lya Shukulu Kalunga

Kwangununa miyati mu cilombo

¹ Shukulu Kalunga wendekele kuli Mosesa na Alone ngwendi,

² “Omo vaIsalele vakashimbika cilombo cavo, munu na munu akashimbike mbalaka yendi mwisi ya pandelo ya mbunga yendi, na ku pandelo ya ku cikota cendi. Cilombo coshe vakacishimbike kuzengeleka Mbalaka Mwakuliwanena.

³ Vaje vali mwisi ya pandelo ya Yunda, vakashimbike vimbalaka vyavo ku mutambela wa mu ngangela, mu vimbunga vyavo mwisi ya vantwama vavo. Ntwama ya vanu va Yunda ikeye Nashone muna Aminandave.

⁴ Vungi vwa vanu vendi vapwile 74,600.

⁵ Co muyati wa Isakale vakashimbike vimbalaka vyavo mwisi ya pandelo yavo kwatesa ku mbunga ya Yunda. Ntwama ya vanu va Isakale ikeye Netanela muna Zuwale.

⁶ Vungi vwa vanu vendi vapwile 54,400.

⁷ Muyati wa Zembuloni vakashimbike vimbalaka vyavo mwisi ya pandelo yavo kwatesa ku mbunga ya Isakale. Ntwama ya vanu va Zembuloni ikeye Elyave muna Helone.

⁸ Vungi vwa vanu vendi vapwile 57,400.

⁹ Co voshe vaje vali mu mbunga ya Yunda ngwe ku miyati yavo vapwile 186,400. Vakevo vakalivanga kukatuka.

¹⁰ “Co muyati wa Luvena vakashimbike vimbalaka vyavo ku mutambela wa mu mbwela mwisi ya pandelo ya mbunga yavo. Ntwama ya vanu va Luvena ikeye Elizule muna Shendeule.

¹¹ Vungi vwa vanu vendi vapwile 46,500.

¹² Co muyati wa Simyoni vakashimbike vimbalaka vyavo mwisi ya pandelo ya mbunga yavo kwatesa ku mbunga ya Luvena. Ntwama ya vanu va Simyoni ikeye Shelumiyele muna Zulishandai.

¹³ Vungi vwa vanu vendi vapwile 59,300.

¹⁴ Co muyati wa Ngande vakashimbike vimbalaka vyavo mwisi ya pandelo ya mbunga yavo kwatesa ku mbunga ya Simyoni. Ntwama ya vanu va Ngande ikeye Elyasafe muna Ndewele.

¹⁵ Vungi vwa vanu vendi vapwile 45,650.

¹⁶ Co voshe vaje vakele mu mbunga ya Luvena ngwe ku miyati yavo vapwile 151,450. Co mbunga ya Luvena ikeyo ikapwa yamucivali kukatuka nakukava mbunga ya Yunda.

¹⁷ “Asinoni vaLevi vakakatuka nakwambata Mbalaka Mwakuliwanena, co vakenda mukati ka vimbunga vivali vyakulivanga na vimbunga vivali vyakumanesela. Co mbunga na mbunga vakenda amo, ngwe muje muvakashimbikila vimbalaka vyavo, co mbunga imo na imo ikakala mwisi ya pandelo yavo.

¹⁸ “Muyati wa Efalime vakashimbike vimbalaka vyavo ku mutambela wa kangombe ka yambi mwisi ya pandelo ya mbunga yavo. Ntwama ya vanu va Efalime ikeye Elishama muna Amihunde.

¹⁹ Vungi vwa vanu vendi vapwile 40,500.

²⁰ Co muyati wa Manase vakashimbike vimbalaka vyavo mwisi ya pandelo ya mbunga yavo kwatesa ku mbunga ya Efalime. Ntwama ya vanu va Manase ikeye Ngamalyele muna Pendazule.

²¹ Vungi vwa vanu vendi vapwile 32,200.

²² Co muyati wa Mbenjemani vakashimbike vimbalaka vyavo mwisi ya pandelo ya mbunga yavo kwatesa ku mbunga ya Manase. Ntwama ya vanu va Mbenjemani ikeye Avindane muna Ngilyone.

²³ Vungi vwa vanu vendi vapwile 35,400.

²⁴ Co voshe vaje vakele mu mbunga ya Efalime, ngwe ku miyati yavo, vapwile 108,100. Co mbunga ya Efalime ikeyo ikapwa yamucitatu kukatuka nakukava mbunga ya Mbenjemani.

²⁵ “Co muyati wa Ndani vakashimbike vimbalaka vyavo ku mutambela wa ku kunto mwisi ya pandelo ya mbunga yavo. Ntwama ya vanu va Ndani ikeye Ahiyezele muna Amishandai.

²⁶ Vungi vwa vanu vendi vapwile 62,700.

²⁷ Co muyati wa Ashele vakashimbike vimbalaka vyavo mwisi ya pandelo ya mbunga yavo kwatesa ku mbunga ya Ndani. Ntwama ya vanu va Ashele ikeye Pangiyele muna Okelane.

²⁸ Vungi vwa vanu vendi vapwile 41,500.

²⁹ Co muyati wa Nafetali vakashimbike vimbalaka vyavo mwisi ya pandelo ya mbunga yavo kwatesa ku mbunga ya Ashele. Ntwama ya vanu va Nafetali ikeye Ahila muna Enane.

³⁰ Vungi vwa vanu vendi vapwile 53,400.

³¹ Co voshe vaje vakele mu mbunga ya Ndani, ngwe ku miyati yavo vapwile 157,600. Co mbunga ya Ndani ikeyo ikapwa yakumanesela kukatuka nakukava vakwavo.”

³² Co vungi vwa vanu va Isalele vaje vavalavele mu vimbunga vyavo vapwile 603,550.

³³ Oloni vaLevi kuvavalavelele kumo na vaIsalele, ngwe muje mwashikile Shukulu Kalunga kuli Mosesa.

³⁴ Ngecivene, vanu va Isalele valingile vyuma vyoshe vije vyashikile Shukulu Kalunga kuli Mosesa. Co vakevo vashimbikile vilombo vyavo munu na munu mwisi ya pandelo yendi, co vendele munu na munu ngwe ku cikota cendi.