Efeso 5 - Livulu lya Shukulu Kalunga

Kuyoya mu ceke

¹ Ngecivene, ngwe omo mwapwa vana va Njambi vamuya ku mbunge, munapande kulifwa nendi.

² Endeni mu cizemo ngwe Kilistu mwatuzemene, co wanene mwonyo wendi kuli yetu ngwe mulambu wa lwengo lwaluvwa na n̄ombelo ije ivwaelelesa Njambi.

³ Akupwa mu vana va Njambi, kesi mwamuvwa ngeci mukale majwi amo a vupangala, nambe vya mazilo, nambe vya cipululu, kesi muvisimutwiye akati keni.

⁴ Kucamipandele kwendeka majwi a shwamwa, a kutuka nambe a mazilo. Oloni munapande kukandelela lika kuli Njambi.

⁵ Mwa vushunga, naumo wai muka-vupangala, nambe muka-mazilo, nambe muka-cipululu, (omwo cipululu citwala kukulemesa tumponya) kesi na mutambela mu Vumwene vwa Kilistu na Njambi.

⁶ Kesi mutave umo amikwise na majwi a makuli, omwo a vyuma evi vukalu vwa Njambi vukakala ali vaje vaka-kujeneka kumwononoka.

⁷ Ngecivene, kesi mulyendele na munu wa cifwa cangacije.

⁸ Laja mwakele mu lisusulungu, oloni omo munapu mu vanu va Mwene, ololo muli mu ceke. Ngecivene, munapande kuyoya ngwe vanu vali mu ceke,

⁹ omwo ceke cikeco cikakunena kuteja kwakama manene kwa muyati woshe wa vyuma vyavivwa, vyakushungama na vushunga.

¹⁰ Esekeni kulilongesa vije vivwaelelesa Mwene.

¹¹ Kesi mulipandakane na vyuma vyangoco vije vivakalingi vanu, vyuma vije vinakundama ku lisusulungu. Oloni vishololeni ku ceke.

¹² (Mwa vushunga, nambe kwendeka vyuma vivalinga mu vushweke vinena shwamwa.)

¹³ Co omo vyuma vyoshe visholoka ku ceke, asinoni vushunga vwa cifwa cavyo vusholoka,

¹⁴ omwo cuma coshe cije cisholoka cipwa ceke. Omu mukemwo vakendeka ngwavo, “Tona, yove walala, co induka ku kutsa, Kilistu akakutwila ceke.”

¹⁵ Ngecivene, nyanyameni mumuli nakuyoya. Kesi muyoye ngwe vaka-kwonwa mana, oloni ngwe vaka-mana.

¹⁶ Pangeseni mwamuvwa visimbu vije mulinavyo, omwo matangwa ano anapu amavi.

¹⁷ Ngecivene, kesi mupwe vilema, oloni lingeni vije vyashaka Mwene ngeci muvilinge.

¹⁸ Kesi mupende na vinyu, vije vyasa kumiviisa, oloni shuleni na Munzinzime.

¹⁹ Endekeni kuli umo na mukwavo na majwi a myaso na myaso ya ku san̄ulu na myaso yakujela, imbeni myaso kuli Mwene nakushangazala mu vimbunge vyeni.

²⁰ Simbu yoshe kandeleleni kuli Njambi Tatetu mu vyuma vyoshe mu lizina lya Mwene yetu Yesu Kilistu.

Vanakazi na vanalume

²¹ Lyononokeni umo na mukwavo mukusingimika Kilistu.

²² Eni vanakazi, ononokeni kuli vanalume veni, ngwe kuli Mwene.

²³ Omwo munalume ali na moko ali munakazi wendi ngwe Kilistu lalo ali na moko a cikungulukilo, co Kilistu vavenya ikeye Muyoyesi wa cikungulukilo, muvila wendi.

²⁴ Ngecivene, vanakazi vanapande kwononoka kuli vanalume vavo mu vyoshe, ngwe cikungulukilo mucikononoka kuli Kilistu.

²⁵ Eni vanalume, zemeni vanakazi veni, ngwe Kilistu mwazemene cikungulukilo, co wanene mwonyo wendi omwo cikeco.

²⁶ Walingile eci mukukundika cikungulukilo kuli Njambi na lijwi lyendi, anima yakucijelesa akucijwelesa mu mema,

²⁷ ngeci akemike cikungulukilo ku mesho endi mu vuvwa vwaco vwoshe, cakujela nakujeneka mulonga, nambe kapenga kamo, nambe ka mucinya nambe ka cuma keka kakucijwalesa.

²⁸ Mukemwo lalo vanalume vanapande kuzema vanakazi vavo ngwe muvakazeme mivila yavo vavenya. Munalume uje azema munakazi wendi alizema ikeye vavenya.

²⁹ (Naumo wai wazinda muvila wendi vavenya. Oloni aulisa nakuulela, ngwe Kilistu vene mwakalingi ku cikungulukilo,

³⁰ omwo tunapu vilyo vya muvila wendi.)

³¹ Ngwe muvyendeka visoneka ngwavyo, “Omu mukemwo munalume akaseza ishe na vaina nakulipandakana na munakazi wendi, co voshe vavali vakapwa muvila umolika.”

³² Kuli cisin̄iko ca kulova ca vushunga mu visoneka evi cije cinjinazivuka ngwange cilumbununa vya Kilistu na cikungulukilo.

³³ Oloni cinenika yeni lalo, munalume woshe napande kuzema munkazi wendi ngwe mwalizema ikeye vavenya, co munakazi woshe napande kusingimika munalume wendi.