Rut 2 - BIBLE MBAÏ 1980

Rut þur goot nyako kam ndøøt lo Boaj

¹ Ngonkõ ngaw Naomi mad i nõ, i de kïbo kï ngenyamaj. Tøa i Boaj, i nooj Elimelek.

² Rut dekïdë kï Moab el Naomi an: M'køi, i nyam ad m'aw m'þur nyako kam ndøøt lo de'n m'a m'ngah maj takumat. Tura an: Ngonïm kïdë aw.

³ Titbe Rut aw þur kam ndøøt, go ngéjanyakot, na aw kam ndøøt lo Boaj'n i nooj Elimelek nõ.

⁴ Kaglo sî, Boaj þai Betlehem ðe, na el ngéjanyako an: Kï Bïraþe i nat sesï. Turïna anan: Kï Bïraþe njang døi.

⁵ Boaj ndïje þer lon'n ndaa dø ngéðakïla janyakot an: Dekïdë kïmand'n ðan i nõ a?

⁶ Þer loa'n ndaa dø ngéjanyakot ye tur an: I dekïdë kï Moab'n ðen nat kï Naomi ko døning Moabt.

⁷ Ndïjem an: I nyam ad m'þur nyako, kad m'kaw nyako kï tuso go ngejaat nat lo kïða. Lon ðe kïsî, mbã tajigla ða dõ kï njan, na ndï kuj taakò ngon tëbe al.

⁸ Boaj el Rut an: Ngonïm, oo dø ta lom. Ot kaw þur nya kam ndøøt lo de mad kïðang, ot kaw lo mad kïsãi ho, i ndï nat kï ngékïlaþerg lom kïdë.

⁹ I nda kumi dø ndøøt'n ða jan nyako tit, na i ndulo god. M'øj þerg lom kad ødin al, na îla kïnda man ðai a ne, aw ta jomant'n basag ða ødïn mant nõ.

¹⁰ Kamla Rut so ber kï takumïn kï ningt el Boaj an: Titbãi m'ngah maj takumit, ad i ga kami dømt, mîn kï mî dekïdë kïmbah a?

¹¹ Boaj tura an: Deg ørrmïn hoi nyag kïmaj tube'n i ða kï mumi kïdë go koi ngawit nu, kï nyan i nya bøwi kï kõi kï døning kooji, na i ðe døningt lo girrdeg kï i ger kete al.

¹² Kï Bïraþe bá kïlaðai, kï nyabaji loi kïtaagbe i kokïro Bïraþe Luwaht lo Israel'n i ðe yaroi girr bøgat nõ.

¹³ Rut el an: Ad m'ngah maj takumit geem, kïta i søl kamm, na elta kïmaj kï þer loi kïdë, ke neni mî kïkïða ku ngékïlaþergt loi kïdë al.

¹⁴ Lon kaglo sanya asï ye, Boaj el Rut an: I ndøt kï rojt so, na i sa sej nya, un bïnã kï løi, ødïn tã. Ndï ber kad ngéjanyakot. Adïna kum nyako kïndaw. Sa ndan na ngom ndega.

¹⁵ Lon þai aw kad þur nyako ye, Boaj ndamber ngékïlaþerg lon an: I nyan adïna þur nyako kïnãi kadat, na ot kelïn ta døt.

¹⁶ I tørrïn dø nyako madg kam sïnga nyakot, nyan ad tuson ber ada þur na ot ndangïna.

¹⁷ Kïtø 'nten la Rut þurïn nyako mbã kad ud, øi ørj ðoosï njang kïbo kïða, kamla nda nyako ørj'n non.

¹⁸ Ngah kuma asï tat, na øi kum nyako ørj telïn kï þe, aw da mumïn nyako'n þur. Kamla Rut un ndeg nyasa kïnãi ad mumïm.

¹⁹ Muma ela an: Þone i aw þur nyako ko ðah a? I ða kïla ko ðah a? Kï maj urr de'n høi kïront nõ. Øj mumïn de'n ða sia kïla, ela an: Tø de'n m'ða sia kïla þone i Boaj.

²⁰ Naomi el mumïn an: Kï majkurr lo Bïraþe i døat, Bïraþe'n nya ta køj kamkë lon ngékumkajirg kï ngékoig al. Naomi el mumïn an: De'n non i nooj'j, i kïkïða ku ngébadøjt.

²¹ Rut dekïdë kï Moab el an: Boaj elïm an: I ndï nat kï ngékïlaþerg lom mbã kaglo ja nyako tïgan.

²² Naomi el mumïn Rut an: Ngonïm maj kad aw nat kï ngékïlaþer loa kïdë kad de ndødi kam ndøøt mad kïðang al.

²³ Titbe Rut ndï nat kï ngékïlaþer lo Boaj kïdë mbã jan nyako ørj kï gem tube tïgan, na hølondït nat kï mumïn.