Pilipiag 1 - BIBLE MBAÏ 1980

Lapia

¹ Mî Pol, nat kï Timote, jî þerg lo Krist Jeju; kï ndang maktub 'nten j'ad deg kïjaþat lo Luwah, îgïn adïn kamd Krist Jeju, nat kï ngékoogo ngékawna kï ngékïlaþerg tube kïkam þeþot kï Pilip.

² Kï Bøwj Luwah kï Bïraþe Jeju Krist adsïn majkurr kï kamkïsokïber.

Pol ða mersi Luwah

³ Kaglog tube'n kam gah døsït ye, m'ða mersi Luwah.

⁴ Kaglog tube'n m'ndï m'elta kï Luwah kïtatøsï ye, m'ela kï ronel,

⁵ kïta ða'n i ðan sem dø kïla lamber hoitat kïmaj, ndøt kï dasabang mbã tajigla.

⁶ M'ger kammt maj, Luwah'n mba girr kïla kïmaj'n non kamsït ye, a hø ða kïla'n non mbã tøl kona ndø ðe Jeju Krist't.

⁷ I goot kad m'gaa nya kï titbe kï døsït tube, tit kan hã în ne ngarkammt, kïta în tube în ngégana sem dø majt'n Luwah ða sem, ke lon mîn dangãit, ke lon mîn dangãit al þaitø, ad m'ngah ðob kørr girr hoita kïmaj, na m'ndï m'ad deg gerïn kad i ta kïðubag.

⁸ Luwah i ngemam naj, m'tarsï tube kïrotag kïgo kõkamt'n i kam Krist't kïta deg. Kõkam'n i kam Krist Jejut kïta deg ye, kõkam'n non i kammt ad m'tarsï tube ho. Luwah i ngemam naj dø tat 'nten.

⁹ Nya'n m'kø kam keltalt kï Luwah la ten; m'kø kad tar losï to mbuj mbuj, kam nyagert kïkam goosï kørr girr tat tube.

¹⁰ Kïtøkad i gerïn ne nyag kïmaj tøi. Titbe la a în ne kïjanjoi, kïkanj ta mad døsït ndøt'n Jeju Krist a ðe.

¹¹ Jeju Krist la i nge tee kï kand ða denesew kamsït; kï i þankot kï kand'n non kïtakad Luwah ngahn tøko kï ndub.

Ndï kï dø dõ kï jeje, i dø Krist't

¹² M'ndig kad i gerïn ngankõ, nyag 'nten dømt ye, øgïn Hoita Kïmaj kad tee kï ro degt al, na bela ndï ða sia, ad aw kï ketekete ye.

¹³ Kïtø i nya kï to kïtïga wakïsï ro ngéngom dø ngekõþet tube, kï ndeg deg tube, ad gerïn maj i kïta Krist la mîn kam dangãit ye,

¹⁴ na koo'n ngankom oomïn dangãit, mî kï dø kï jinjir la, koosï ngankõ madg ngãibe ngangïn ne kokïro kam Bïraþet, mbã iren kamd ndang kad elïn ne ta lo Luwah kïkanj þool.

¹⁵ Rota deg madg ndï lan mber ta lo Krist kï lo minat kï gakï, kïmadg tø ndï lan mber ta lo Krist kïgo kamndigt kïmaj.

¹⁶ Îgïn non ndï lan mber Krist kï lo tart ho, gerïn kad Luwah ndah kammt kad m'la mber hoita kïmaj ho.

¹⁷ Na îgïn ndï lan mber ta lo Krist kï tagah kï karnyang al, na kï jangkïna kïta þut nyandoo lod kï køsï død, ndï oon anan ndï n'admïn kamkøl kï døt døt, lon mîn dangãit kam jinjirgt.

¹⁸ Ta goto. Kï ðob kïðen deg ndï lan ne mber Krist, ke kï lo ndokumt, ke kïgo rotat, m'a m'nyà ta ða ronel døt al bat.

¹⁹ Kïtø m'ger maj, nya 'nten a ða kïla kajïm kïtakul kø'n i køn kïtatøm, kïtakul ða'n Ndil Jeju Krist a ða sem.

²⁰ M'ngoo keðeng, na m'nda kammdøt kad rom a sølïm dø nya madt kïða al, na kï kam kï misïmisï kï rotagt la Krist a ngahn køsïgon kam dãromt tajigla, ke mbãkïnõt, ke m'ndï kï døm dõ, ke m'oi.

²¹ Kïtø mî, ndïm kï dø dõ i Krist, koi tø i nya lom kï ngahdøt.

²² Na îla m'ndï kï døm dõ kam dãrot, m'asï ða kïla kï tee kï kandïn a ne, m'oo nya'n m'a m'køt nõ al.

²³ Nyag kï joo'n non ndï ørrmïn yo ngïra, nyur ndï õm kad m'ørr dõ m'aw m'ndï nat kï Krist, kïta i nya kïmaj.

²⁴ Na kï tøi 'nten, sumba kad m'ndï kï døm dõ kïtatøsï.

²⁵ Kïtø 'nten, m'ger kammt þet, m'oo tit m'a m'ndï kï døm dõ, m'a m'ndï nat sesï tube tø kïtakad m'ða sesï kad awïn kï ketekete, kad i ðan ronel kam kadkam Krist't.

²⁶ Kïtø lon m'a m'aw rosït gog a ne, a i ðan ronel ngãibe kam Krist Jejut kïtatøm.

²⁷ Na kï nyaðasï asï ta Hoita Kïmaj lo Krist. Kïtøkad ke m'aw m'oosï, ke m'goto kaa ne, kï m'oo hoi ðasï bijir kam ndilt kïkïða, kï hoi ðøø'n i ðøøn nat kad i ngomïn ne Hoita Kïmaj'n i taan kïkam kïkïða.

²⁸ Ot kadïn ngénðoorsïg ndasïn þoolt dø nyat mad. I nya kï to tïga wakïsï rodt; în deg kï nuj kø. Na kï rosït taa to kï tïga wakïsï în deg'n Luwah ajisï.

²⁹ Kïtø Luwah ða sesï maj titbe; adsï kad adïn kamsï Krist hã kïðabe al, na kï i dain yosï kï kõ kïtatøa ho.

³⁰ Kïtø i ndï i ðøøn ðøø kïkïða 'nten ho, ad i ðøø'n oon m'ndï m'ðøø maði, m'ndï m'ðøø tajigla þaitø tit'n oon ne hoia.