Mark 11 - BIBLE MBAÏ 1980

Jeju and Jerusalemt

¹ Jeju kï ngéndoog în nderrbe kï Jerusalem, kï Betpaje kï Betanit, nderrbe kad mbalbo kag birt ye, Jeju la ngéndoog lon joo.

² Eld an: Awïn kam ngon þet'n ða nõsït nõ, nõbe a i ngahn ngon korro kï døna kï kïla, în hã de þai døat al þaitø. I tutïn na, i ðen sia so.

³ Îla de mad ndïjesï an: Kïtøði i ða i tutïn ne korro ye a? A ne a i elïna anan: Ngej la ndï gee korro ye na, a tel lan gog tajigne.

⁴ Ngéndoog aw nghan ngon korro, ða tïga dø ðobt, i kï dø tabit kujt, ad tutïn na.

⁵ Deg madg ðan nõ, kïmadg kudt ndïjed anan: Ði i ða i ðan titbe a? Kïtø ði i ða i tutïn ne ngon korro a?

⁶ Ngéndoog turïnd tit'n Jeju eldïn ad deg nyand ad awïn.

⁷ Lon ngéndoog ðen kï ngon korro ro Jejut ye, ün kubg lod døat adïn Jeju ndïdøt.

⁸ Deg ngãibe najïn kubg lod dø ðobt na kïmadg un dø ji kagg kï mbool'n tïga'n kam ndøøgt un dø ðobt ho.

⁹ Ngéndia kete nõ Jejut kï îgïn ndulon goa ye, kon anan: Hosana. Køsïgon kï dø Luwaht, kï Luwah njang dø în hã ndï ðe kam tø Bïraþet.

¹⁰ Kï Luwah njang dø kõþe'n ndï ðe, ad i kõþe lo bøwj Dabid. Hosana kam log kï tøitøi kï dõ.

¹¹ Jeju aw tee Jerusalemt, kamla and kam kuj ndub Luwaht. Nda kumïn nulïn nyag tube mbet't, na tøi aw Betanit nat sed ngombangkïlag lon kïkïlah gidaijoo, kïta lo søl yelïl woi.

Jeju nda ndøl dø kag mbaiþoodt

¹² Loti goot, lon þain Betanit ndï awïn ye, þo õ Jeju.

¹³ Oo kag mbaiþood mad ko sãi, mbia la durur; ndøt kï girrt kï n'oo ke þet n'an ngah kanda tit a? Na lon ndøt ðe tee girr kagt ye, ngah nya mad al, na mbi mbaiþood koon; kïta i dø nah kand mbaiþood al þaitø.

¹⁴ Taa ne, Jeju elta kag mbaiþood an: Labekïnõt, de kï a sa kandi goto. Ngéndoog loa oon dø ta'n el nõ.

Jeju tuþa ngéðagatg kam kuj ndub Luwaht

¹⁵ Aw teen Jerusalemt. Jeju and kam kuj ndub Luwaht, mba girr tuþa deg ngéðagat, kï îgïn ða ndugon nyag kam kuj ndub Luwaht kø. Jeju tøsï tableg lo deg ngémbel nar kï komþerg lo deg kï ngéðaw derrg tïlad kø;

¹⁶ na nya de mad, ad un nya mad teen kam kuj ndub Luwaht kï tïga al.

¹⁷ Kamla ndoo deg eld an: Ndangïn ta 'nten kam maktubt kïjaþat ale? Kuj lom a kunïna kuj kelta kï Luwah kïta girrdeg kïdangdang, na în taa, i telïna bulo to ngékumðobg.

¹⁸ Kïbog lo ngéjamosïkadkari, kï kïbog lo ngéndoo deg mberkïnda oon hoi nya'n ða nya nõ; ad deg'n non sahn ðob kï'n tølïn Jeju kø; na þoolïn kïta nyandoo loa dum dø koosïdeg tube.

¹⁹ Lon lo søl ye, Jeju kï ngéndoog lon ten kam þebot kï tïga.

Jeju ndoo ngéndoog lon girrta lo kag mbaiþood

²⁰ Loti gog kïsî, lon ndï tøin dø ðobt ye, ngéndoog lo Jeju oon kag mbaiþood kan Jeju nda ndøl døat nõ tut kurum kï ngïrang be.

²¹ Kam Pierr gah dø nyat'n ða nya ad el Jeju an: Ngendooj, oo kag mbaiþood kan i ndøla ye, tut kurum.

²² Taa ne, Jeju el ngéndoog lon an: Adïn kamsï Luwah.

²³ M'ndï m'elsï kï tïga wakïsï, i rota; îla de mad el mbalbo'n ðan an: I ndøt kø lot'n i ðat, na i kïla i so kam bahbo kat't; na îla de'n non þad kamïnt al bat, na ndahkamïn dø tat'n el nõ a ne, nya'n non a ða nya titbe kïtatøa.

²⁴ Kïtø 'nten m'ndï m'elsïn. Lon i elïn ta kï Luwah, na i køna nya mad a ne, i ndan kamsït kad nya'n i kø'n ye, i ngahn woi ad Luwah a adsï.

²⁵ Kaglot kïðen'n i ða elta kï Luwah, îla în kï ta kï de mad a ne, maj kad i nyan go majal loa kø, kïtakad bøwsï kï i kam dørãt dõ nyan go majalg losï ho.

²⁶ Na îla i nyan go majal lo deg kø al a ne, Bøwsï kï kam dørãt dõ a nyàgo majalg losï kø al ho.

Kïbog ndïjen Jeju ta dø tøgt loa

²⁷ Jeju kï ngéndoog lon tel ðen Jerusalemt gog. Lon Jeju ndï kam kuj ndub Luwaht ye, kïbog lo ngéjamosïkadkari, kï kïbog ngéndang maktubg kï kïbog lo juipg ðen roat.

²⁸ Na ndïjena anan: Kï tøg kï ði i ndï ða'n nya 'nten a? Nõ adi tøg 'nten kad i ðan nyag 'nten a?

²⁹ Jeju eld an: Mî kaa ne, m'am ndïjesï ta mad ho, maj kad i turmïn kamla þet m'a m'elsï tø de'n adïm tøg kad m'ðan nyag'n non ye.

³⁰ Baptem'n Jã ða deg ye, þai ko dõ dørãt e? Ke þai ko ro degt a? I turmïn ad m'oo.

³¹ Na deg'n non øjïn na ta kïnadt anan: Îla kï tur j'an: I Luwah la la sia a ne, Jeju a el an: Kïtøði kï taa ta'n Jã el nõ al a?

³² Na îla kï tur j'an: Baptem þai ko ro degt a ne, kï ndï kï þool koosïdeg; kïta deg tube oon Jã tit ngekelta kï ta Luwaht jeje.

³³ Kïtø 'nten turïn Jeju anan: Kï ger al. Jeju kaa turd an: Mî tø, m'a m'elsï kï tøg kï titbãi m'ndï ðan nyag'n non al.