Hoita kɨmaj lo Jeju Krist'n Luk ndang 9 - BIBLE MBAÏ 1980

Jeju la ngéndoog kïlah gidaijoo kad lan mber ta lon

¹ Jeju kun kïkïlah gidaijoo kï ðen kï nat, ad'd tøg kad õnþe dø ndilgt kïmajal tube kï yootïn rotog.

² Lad kï lan mber ta kõþe lo Luwah, kï yootïn ngérotog ho.

³ Eld an: Ot kunïn nya mad kïta ðob, ke gølkøp, ke þøl, ke nyasa, ke nar, ot kawïn kï kub joo.

⁴ Kuj kïðen'n a andïnt a ne, i ndïnt mbã i þain ne.

⁵ Îla deg kï þe madt høsïn kï rodt al a ne, lon i ndï i þãin kam þet'n non i ndan bu kïða njasït kø kïta najkïma kïdødt.

⁶ Taa ne, ngéndoog þai awïn, a lan go nganþeg, a lan mber hoita kïmaj, a yootïn deg kï go log tube.

Herod oo tit Jeju i Jã ngeða baptem

⁷ Herod kï ngekõþe dø døning Galilet oo hoi nyag'n ðan nya tube, kama daa ta paa, kïta deg madg ndï anan: Jã la þai ku ngékoit ye.

⁸ Kïmadg ndï anan: Eli la tee høi ku degt ye, kïmadg tø ndï anan: kïkïða ku ngékelta kï ta Luwaht mad la þai lo koit ye.

⁹ Na Herod el an: M'gang dø Jã kø, na de'n non i nõ m'ndï m'oo hoi nyag 'nten kï døat a? Sah kï n'ooa.

Jeju ad deg dub mi san nya

¹⁰ Ngombangkïlag telïn, ørrïn Jeju hoi nyag'n ðan nõ tube. Jeju øid, aw sed lot mad køtkokïða kad þet mad kï tøa i Besaida.

¹¹ Na lon koosïdeg gerïn nya 'nten ye, ndulon goa. Jeju hød kïront, eld ta dø kõþet lo Luwah. Îgïn ndigïn ngah lapia ye Jeju yootd ho.

¹² Na lon kàd aw kï n'ud ye, ngéndoog loa kïkïlah gidaijoo ndøtïn kï roat anan: I nya deg'n ðan, ad awïn kam nganþegt kï gawg'n gugïn dø lo 'nten kad høn lotod, kï sahn nyasad, kïta lon kï ndït nëbe ye i dïlalo.

¹³ Na Jeju turd an: În kïþeg adïnd nyasa. Ngéndoog loa elïn anan: J'aw kï bïnã kï løi mi, kïkanj joo koon. Maj a ne, j'a kï j'aw suku kï ndugo nyasa kïta deg tube'n ðan wan tã.

¹⁴ Dekïdïngãg tube asïn dub mi. Jeju el ngéndoog lon an: Adïnd ndïn ber but dømi dømi.

¹⁵ Ðan tit'n eld nõ, adïn deg tube ndïn ber.

¹⁶ Jeju øi bïnã kï løi kïmi kïkanj kï joo'n non, un kumïn kï dõ dørãt ndub Luwah, kamla hø tet, ad ngéndoog lon kïtakad ndan nõ koosigt.

¹⁷ Deg tube san, ndanïn. Ngéndoog loa øin budag kï nãi ðoosï jàng kïlah gidaijoo.

Pierr elta da'n dø Jeju an: I Krist

¹⁸ Ndø mad lon Jeju ndï elta kï Luwah kïkïðanbe, na ngéndoog loa în nat sia ye, Jeju ndïjed an: Koosïdeg ndï anan mî nõ a?

¹⁹ Turïn anan: Deg madg ndï anan: Î Jã ngeða baptem, kïmadg anan î Eli; kïmadg tø ndï anan: Î kïkïða ku ngékelta kï ta Luwaht kïmaði la þai lo koit ye.

²⁰ Eld an: Na în ye, anan mî nõ a? Pierr tur an: î la î Krist lo Luwah ye.

Jeju elta kete dø koint kï þain lo koit

²¹ Jeju eld ta kï tøgïn ndad mber kad elïn ta 'nten al.

²² Eld an: Kari na Ngon de a dai yon ngãibe. Kïbog lo juipg kï ngéjamosïkadkari kïbog kï ngéndoo maktubg a mbetïna, a tølïna, ndø kïkõmïta a ne, a þai lo koit.

²³ Kamla eld tube an: Îla de mad ndig kï'n tel ron gomt a ne, ad ørr ta ron kø ad un kag dosï lon kïndøgndøg, na kï ndulo gom.

²⁴ Kïtø dekïðen'n ndig kï n'aj ron a ne, a laa kø, na dekïðen'n la ron kø kïtatøm a ne a aja.

²⁵ Ndaa i ði kad de ngah nyag kam døningt tube, na nuj ron ke la ron køa?

²⁶ Kïtø dekïðen'n hã roa ndï søla kïtatøm, kï tag lom a ne, ro Ngon de a søla kï tatøa ho, lon a ðe kï kunj bøwïn kïðangereng sed malaikag kïjaþat.

²⁷ Na m'ndï m'elsï: Rota kïmadg ku îgtïn ðan ðan a oin al bat, mbã a oon kõþe lo Luwah kamtã.

Ro Jeju unjðang dø mbalbot

²⁸ Got lon Jeju eltag 'nten asï ndø jijoo be ye, un Pierr kï Jã kï Jak, al sed dø mbalbot mad kï n'elta kï Luwah nu.

²⁹ Ndï elta kï Luwah þaitø ye, takuma þa kï ndaa. Kubg loa ndaan ngung ndulon ngeingei.

³⁰ Tentenbe deg joo teen høi kam kunjt kïðangereng.

³¹ Ða elïn ta kï Jeju, i Moij kï Eli. Ða elïn na ta koia'n þet a koi go ndøgt kï ngãi al þebo Jerusalemt.

³² Pierr kï îgïn în nat sia ye, þi tøld søkïr, na lon ndoolïn kumd jaroi ye, oon kunja kïðangereng kï deg joo îgïn ðan nõ nat sia.

³³ Lon deg kï joo'n non þai awïn ye, Pierr el Jeju an: Bïraþe maj kad kï ndïn në be. Maj kad kï ða kuj kámg mïta. Kïkïða kïtatøi, kïkïða kïta Moij, na kïta Eli. Pierr ger go nya'n el nõ al.

³⁴ Lon ndï eltag 'nten þaitø ye kilndii mad ðe ut død kï ndilïn. Þool ðad kï kand'n andïn kam kilndiit.

³⁵ Ndita mad tee ko kam kilndiiit'n non an: În ðan i Ngonïm kïmbed lom. Oon dø ta loa.

³⁶ Lon ndita n'non elta woi ye ngahn Jeju kïkïðaabe. Ngéndoog loa ndïn tad mbo døt kam ndøgt'n non elïn de mad ta nyag'n oon kï kumd nõ al.

Ðen kï ngon kïdïngã'n ndil kïmajal i kamat ad Jeju yoota

³⁷ Loti got lon ðisïn dø mbalbot ye, koosïdeg lan ta Jeju.

³⁸ Oon de mad ku koosïgt un ndin kïdõ kon an: Ngendoo deg, m'køi kï i tel kumi oon ngonïm kïta i kïðabe jimt.

³⁹ Oo ndil mad a høa, tentenbe, a ørr køl bang, tura murr murr mbã, ad taa þa hul mbukïmbukï, tøsï ron ret kï dog, lo gang lam kamla nyàa ye.

⁴⁰ M'kø ngéndoog loi kï tuþan ndil'n non kø, na asïn tuþaa al.

⁴¹ Jeju tur an: În ngékadkamsï Luwah al, ngéðanya kï dene al, m'am ndï nat sesï kaglo þãi a? Kamla el bøw ngon an: I ðe kï ngoni so.

⁴² Lon ngon ndï ðe þaitø ye, ndil kïmajal ørra laa þer tura murr murr kï tøgïn. Jeju ndáng ndil kïyerr, yoot ngon telïn ad bøwa.

⁴³ Deg oon tøg kï ngãi lo Luwah ad ta yad biw. Na lon în tube ndï yad biw dø nyagt tube'n Jeju ða þaitø ye, el ngéndoog lon an:

Jeju elta kete kel kïkõjoo dø koint kï bãin lo koit

⁴⁴ I nelïn mbisï oon ne døta'n m'ndï m'el nõ maj. Kari na a lan Ngon de ji degt.

⁴⁵ Na ngéndoog loa gerïn girr ta 'nten al, kïta ar nyang ko rodt al, ad gerïn kama al, þoolïn kad ndïjena ta dø nyat'n ndig kel.

Nõ i kïbo tøi a?

⁴⁶ Ta mad þai dan ngéndoogt lo Jeju, majïn na ta, ke nõ a i kïbo kudt a?

⁴⁷ Na lon Jeju ger tagah kï kamdt þet ye, un ngon kïdu ndaa kadïnt.

⁴⁸ Na eld an: Dekïðen'n a hø ngon kïdu'n ðan kïront kam tømt a ne, i mî la høm kï ront ye, dekïðen'n a høm kï ront a ne, a hø Ngelam kï ront ho. De'n i kïdu tøi kusït tube a ne, de'n non la i kïbo tøi ye.

De'n ndoor deg lo Luwah al a ne, i sej

⁴⁹ Jã el an: Ngendooj, j'oo de mad ndï ørr ndilg kïmajal kø kam tøit la kï j'øga dø, kïta ndulo goi sej al.

⁵⁰ Na Jeju ela an: Ot køgna dø, kïta de'n ndoorsï al a ne, i sesï.

Deg kï þe madt lo Samariag høn Jeju kïrodt al

⁵¹ Na lon kaglo kuna kï dõ dørãt asï ye, Jeju nda kamïnt kï n'aw þebo Jerusalemt.

⁵² La ngombangkïla madg kete nont, în tø aw andïn kam ngon þet mad lo Samariag kad ðan go lo adïna.

⁵³ Na deg kïþet'n non høn na kï rodt al kïta ndï aw kï þebo Jerusalemt.

⁵⁴ Lon ngéndoog loa, Jak kï Jã oon nya 'nten ye, anan: Bïraþe i ndig kad j'elta kï Luwah kad horr þai ko dørãt so dødt õd a?

⁵⁵ Na Jeju mbel kï gog ndángd.

⁵⁶ Kamla awïn ngõþet mad kïðang.

Jeju elta kï deg'n ndig ndulon goa

⁵⁷ Ndï awïn þaitø, de mad ela an: Bïraþe m'a m'ndulo goi kï lo kïðen a awt.

⁵⁸ Jeju ela an: Talg awïn kï þetod, yelg kï dõ awïn kï kuj todg, na Ngon de oo lo kï kad la dønt al.

⁵⁹ El mad an: I ndulo gom. Na de'n non tura an: Bïraþe i nyam ad m'aw m'dub bøwïm kamtã.

⁶⁰ Na Jeju ela an: I nya ngékoig ad duwïn ngékoig lod; na aw i la mber kõþe lo Luwah.

⁶¹ De mad el an: M'a m'ndulo goi Bïraþe; na i nya ta ðob ad m'aw m'ørr hoia ngékïþe lom kamtã.

⁶² Na Jeju ela an: Dekïðen nda jin dø kag køsndøø manggt, na mbel oo nyag kïgog a ne, asï ta kõþe lo Luwah al.