Hoita kɨmaj lo Jeju Krist'n Luk ndang 6 - BIBLE MBAÏ 1980

Ngéndoog lo Jeju tetïn dø nyako ndø taakòt

¹ Go ndø taakòt mad lo juipg, Jeju a gang dø ndøø nyakot, ngéndoog loa mbã girr tet dø nyako, a dudïn kï kam jidt, a san.

² Na kïmadg ku Parisïgt anan: Kïtøði a ðan ne nya kïgoðobat al kï ndø taakò a?

³ Jeju turd an: Î oon nya'n Dabid ða lon þo õa kï deg kï în nat sia,

⁴ and kuju lo Luwah, sa bïnã kïnda nõ Luwaht, mbã deg'n în nat sia kaa ne, ad'd san ho. Nya'n hã i goðobat al kad de kï kari sa, na ngéjamosï kadkarig kïðabe tã.

⁵ Eld an: Ngon de i Bïraþe dø ndø taakòt.

Ta lo de'n jia oi njør

⁶ Ndø taakòt kïðang, Jeju and kam kuj kawnat lo Juipg, ndï ndoo deg tit. De mad ndï nõ jikõa oi njør.

⁷ Ngéndoo maktubg kï Parisïg ndan kumd kï døat kï'n oon ke þet a yoot de ye kï ndø taakò a?

⁸ Na Jeju ger tagahd þet, ad el de'n jia oi njør an: I þai dõ, i ða ne be, nõ degt tube, de'n non þai ða dõ.

⁹ Kamla Jeju eld an: M'ndïjesï, i goðobat kï ndø taakò kad de ða maj a? Ke majal a? Kad de aj ro de e? Ke tøla a?

¹⁰ Kamla nøld mbet't tube, na el de'n non an: I sira jii. Ða titbe, ad jia tel lapia.

¹¹ Wong tøld søkïrr, øjïn na ta dø nyat'n þet n'a n'ðan kï Jeju.

Jeju mbed ngéndoog lon kïkïlah gidaijoo

¹² Kam ndøgt'n non Jeju tee aw dø mbalbot kad kï n'elta kï Luwah. Ndï elta kï Luwah ndø mbã lo tia.

¹³ Lon lo ar ye, kun ngéndoog lon kï ront; mbed kïkïlah gidaijoo kudt, ndah tød ngombangkïlag.

¹⁴ Tød la ten: Simõ'n Jeju ndah tøa Pierr, kï ngonkoa Andre, kï Jak, kï Jã, kï Pilip, kï Bartelemi,

¹⁵ kï Matie, kï Tomas, kï Jak ngon Alpe, kï Simõ kï a kunïna Jelotes,

¹⁶ kï Jud ngon Jak kï Judas Iskariot în laa ji madngétaagt.

Jeju ndoo deg ta lon na yootd ho

¹⁷ Jeju ðisï sed dø mbalbot kïber ða lot mad kï todïla, koosï ngéndoog loa kaa ne, în nõ, kï koosïdeg ngãibe kokam døning Judet tube, kï kam þebo Jerusalemt, kï kam døningt kï Tir kï Sidõ.

¹⁸ Deg'n non ðen kad kï n'oon dø ta loa, kad Jeju yootd dø mõigt lod. Deg'n ndil kïyerrg dan rod ndo ye yootd ho.

¹⁹ Koosïdeg tube sahn kï n'ødïna kïta tøg ndï tee roat yootd tube.

Ta dø ronelt kï kamkil

²⁰ Kamla Jeju un kumïn kïdø ngéndoogt lon, an: Ronel i losï în ngéndog kïta kõþe lo Luwah i losï.

²¹ Ngéronelg la i îgïn þo ndï õsï tajigla ye, kïta Luwah a ad i ndanïn,

²² ngéronelg la i îgïn deg ndï øsïsïnta, ndï mbetsïn, ndï tajsïn, ndï telïn tøsï nya kïmajalt kïta Ngon de.

²³ I ðan ronel lon nyag'n non ðan nya, na i þain kï ditalg kï ronel kï dumbit kïta nyabajisï i ngãibe kam dørãt dõ. Titbe la bøwdg maði ðan ne kï ngékelta kï ta Luwaht.

²⁴ Na be to losï, în ngémajg, kïta i ngahn sølkam tajigla.

²⁵ Beto losï în deg'n i ndenïn tajigla i ndïn kï nyamajg, na ndø madt þo a õsï.

²⁶ Beto losï, lon deg tube elïn ta losï kïmaj kïta titbe la bøwdg ðan ne kï deg kï ngom, în ðan rod ngékelta kï ta Luwaht ye.

Ta nyandoo lo Jeju dø tar madngétajgt

²⁷ Na în, kï ngékoo dø ta lom, m'ndï m'elsï; i tarïn madngétasïg, i ðan maj kï ngékøsïsï ta.

²⁸ I njangïn dø ngéndølsï. Elïn ta kï Luwah kïta ngéda kumsï ndo.

²⁹ Îla de nda køti ko kïða a ne, i tel ko mad ada ho. Îla de mad taai kubkul a ne, ot køga ngamaj loi.

³⁰ Ad nya dekïðen kï ngekøi nya. Îla de taai nyamajg loi a ne, ot tel ndïjea.

³¹ Tit'n i ndigïn kad deg ðan ne sesï ye, i ðan sed titbe ho.

³² Îla i tarïn ngétarsï koon a ne, kïta ði i ndigïn kad deg ðasïn mersi a? Ngéðamajalg kaa ne, ndï tarïn ngétardg ho.

³³ Îla i ndï i ðan maj kï ngéðasï maj a ne, ke ði i losï a? Ngéðamajalg ndï ðan titbe ho.

³⁴ Îla i ndï adïn gïrra îgïn i ndï ndan kamsï dødt kï i ngahn rodt a ne, mersi kï ði i losï a? Ngéðamajalg ndï adïn gïrra ngéðamajalg kïtakad ngahn titbe ho.

³⁵ Be al, maj kad i tarïn madngétasïg. I ðand maj. Adïn gïra deg, na ot ndan kumsï got. Nyabajisï a i ngãibe, a în ngan Ngetøitøi kïrota, kïta Ngetøitøi i ngeða maj kï deg ngeðaa mersi al kï ngeðaa majal tu.

³⁶ Kïtø 'nten kï în ngékookumtondo lo deg tit'n bøwsï în ngekookumtondo lo deg.

Ta nyandoo lo Jeju dø takïgangt'n deg ndï gangïn dønat

³⁷ Ot gangïn ta dø degt. Kamla Luwah a gangta døsït al. Ot lan ta dø degt. Luwah a høsï kï ta al ho. I nyan go majal lo deg kø. Luwah a nyàgo majal losï kø ho.

³⁸ Adïn kamla Luwah a adsï ho ye, kï ngotørrnya kïbo kï kïre nda ndekïndekï mbã ü kø; a adsïn ne kï gusit. Kï ngotørrnya'n i ndï tørrïn ne la Luwah a tørrïn adsï ho ye.

³⁹ Jeju eld terrta 'nten tø: Mundo a asï kørrta ðob mundo oo? Îla i be a ne, în tujoo a son hoolþet ale?

⁴⁰ Ngendoo nya ro det a tøi de kï ngendoon nya al, na lon ndoo nya ad asïnatap ye, a i tit ngendooa nyat be ho.

⁴¹ Kïtøði i ndï nulïn bul mu kï kum ngonkõit, na kagdaw'n to kumit ye, oo al a?

⁴² Titbãi asï kel ngonkõi kan ngonkom ad m'ørr yel'n hã i kumit, na i kïþe kï døi ye, oo kagdaw'n hã to kumit ye al a? Î ngendokumdeg, ørr kagdaw'n hã to kumit nõ kete kamtã; kamla a oo lo ar nyang kad ørrïn yel'n hã i kum ngonkõit ye.

Ta nyandoo lo Jeju dø kagt kï kanda

⁴³ Kag kïmaj kï tee kï kandïn kïmajal goto. Na kag kïmajal kï a tee kï kandïn kïmaj gotø ho.

⁴⁴ Deg gerïn kag kïðen kïta kanda. A jan kand mbaiþood ro kon'gt al, a jan kand nduu dø ngarrgt al ho.

⁴⁵ De kïmaj ndï tee kï nyamajg ko kam nyaþøt lon kïmaj kï kamat; na de kïmajal ndï tee kï nyag kïmajal kokam nya kïþøt lon kïmajal, kïta ta de ndï elta nya'n hã to ngarkamat mbuj.

Terrta dø kujgt kïjoo

⁴⁶ Kïtøði i ndï kunmïn ne Bïraþe, Bïraþe; na i ðan nyag'n hã m'el ye al a?

⁴⁷ Dekïðen'n hã ndï ðe romt, ndï oo dø tag lom, ndï ða got a ne, m'a m'dasï kï în hã taan na sia.

⁴⁸ I tit de'n ða kuj, urr þe mbã ad wo, ndah girra dø mbangt, na lon man la ye õ nda kuj'n non, na asï yeea al, kïta ðana maj.

⁴⁹ Na de'n hã oo dø, na ðagoot al a ne, taan na kï de'n hã ða kuj døningt kari kanj kurr þe; na lon man õ ndaa ye, tentenbe tee so tet kuj'n non i kïbobe.