Hoita kɨmaj lo Jeju Krist'n Luk ndang 2 - BIBLE MBAÏ 1980

Kooj Jeju

¹ Kam ndøgt'n non mber tee kokïro Sejar Ogust't, kï ndahn tø deg ngéndï døningt tube kam maktub dakør degt.

² Ndah tø deg kam maktub dakør degt kï dasabang 'nten i kam kaglot'n Kirinius i ngekõþe dø døning Sirit.

³ Deg tube awïn kad kï ndahn tød maktub dakør degt, dekïðen aw þe koojïnt.

⁴ Jojep kaa, þai þe Najaret't kï døning Galilet, aw þe lo Dabid ho, þe nõ tøa i Betlehem, kam døning Judet, kïta Jojep i de kï girrkooj Dabidt.

⁵ Aw kïtakad'n ndah tøn kam maktub dakør degt nat kï Mari'n hø døa, ndan ngon kama tøg.

⁶ Lon în nu ye, ndø Mari asï kad ooj ngon,

⁷ la ooj ngonderïn, þira kï kub, laa kam sundï sanya mangt, kïta lo ndïd goto kam kuj þi mbahgt.

Ta lo ngékulbatg kï malaikag

⁸ Ngéngombetg ndïn døningt kï nderrbe kï kad lot'n non, ton tïga kam gawgt, to ngomïn þut batg lod ndø.

⁹ Oon Malaika lo Bïraþe tee høi kï rodt. Kunj Bïraþe kï ðangereng øsï gug død, þool tøld søkïrr.

¹⁰ Na Malaika eld an: Ot þoolïn, oon. M'ðe kï hoita kïmaj, kï ronel m'adsï, kï a ad deg ngãibe ronel ho.

¹¹ Þone, kam þet lo Dabid, dekïdë ooj ngekaj adsï, î la i Krist kï Bïraþe ye.

¹² Nyakøj mad kad i gerïn ne la ten: A i ngahn ngon kï kasï mad kï þir kï kub, kï to kam sundï sanya mangt mad.

¹³ Tentenbe koosï Malaikag kï dørãt dõ teen høi nat kï Malaika'n non, ða ndubïn Luwah anan:

¹⁴ Køsïgon kï dø Luwaht kam logt kï dõ. Kamkïsokïber kï dø døningt ku degt ngeða nyag'n nelïna.

Ngéngombetg awïn Betlehemt

¹⁵ Lon Malaikag nyand, na tel awïn dõ dørãt gog ye, ngéngombatg elïn na anan: Ad kï j'awïn Betlehemt kad j'oo nyan ða nya nõ, în Bïraþe ad kï ger.

¹⁶ Taa ne, awïn kanangbe, ngahn Mari kï Jojep kï ngon kï kasï'n non to kam sundï sanya mangt,

¹⁷ lon oona woi ye, ørrïn hoita'n elïnd dan ne dø ngon kï kasï'n non.

¹⁸ Deg tube'n oon dø ye, ta yad dø nyagt'n ngéngombatg elïnd.

¹⁹ Na Mari ngom nyag 'nten kamïnt, ga kamïn døt.

²⁰ Ngéngombetg tel awïn gog, a øsïngon Luwah, a ndubïna kïta nyag tube'n oon dø kï îgïn oon kï kumd tit'n elïnd ne nõ.

Ndahn tø Jeju

²¹ Lon ndø jijoo asï woi kad jana gaj ye, ndahn tøa Jeju ad i tø kï Malaika ooj kete lon kõa ndana al þaitø.

Jojep kï Mari awïn kï Jeju kam kuj ndub Luwaht

²² Lon ndø asï kad telïn ngon kï kart kïgo mberkïndat lo Moij ye, Jojep kï Mari awïn sia þebot kï Jerusalem kï'n dana Bïraþe.

²³ Ndangïn titbe kam tat lo Bïraþe ke ngonderr kïdïngã kïðen kï tee kam kõnt dasa a ne, a kunïna nya kï ndah køtko kïða kïta Bïraþe.

²⁴ Awïn kïtakad lan kadkari kïjakø, ad i derrngøt joo, ke derrkul joo, kïgo tat'n elïn kam tat lo Bïraþe.

²⁵ De mad ndï þebo Jerusalemt, tøa i Simeõ. De'n non i de kïdenesew, nyaðaa i kïgo lo Luwaht, ndï ngoo ngeða kï girrdeg kï Israel keðengë; Ndil Kïkunjðang i døat ho.

²⁶ Ndil Luwah øja ada ger kad a oi al, mbã kad a oo Krist'n i Bïraþe loa kamtã la a oi ye.

²⁷ Ndil Kïkunjðang øsa ad and kam kunj ndub Luwaht. Lon ngékooj Jeju ðen sia kam kuj ndub Luwaht kï n'ðan nyabelþe kïgo mberkïndat ye,

²⁸ Simeõ taa ngon kï jint, ndub Luwah an:

²⁹ Tajigla, ad þer loi aw kï kamkïsokïber kïgo tat loi,

³⁰ kïta kum oo kaj loi,

³¹ kï i ðago woi, nõ girrdegt tube,

³² ad i kunj kï unj dø girrdegt kïdangdang, i nyakøsïgon lo deg loi Israel tø.

Simeõ elta kï ta Luwaht da'n dø Jeju

³³ Ta'n Simeõ el dø Jejut ya bøwa kï kõa biw.

³⁴ Simeõ njang død; el kõa Mari an: Luwah køt ngon'n ðan kad i ngekad deg ngãibe son, kï i ngekad deg ngãibe þain dõ dan Israelgt. A i nyakøj lo Luwah, na deg a ndoorïna.

³⁵ Luwah køta kïtakad i ngekïja tagah kï ngarkam degt ngãibe kï tïga ho. Na î, Mari, kamkil a øsï roi mbut tit ninga be.

Ngekelta kï ta Luwaht Ane

³⁶ Dekïdë mad ngekelta kï ta Luwaht ndï nõ ho, tøa i Ane ngon Panuel, kï girrkooj Asert, tel bïga bugum. Ndï nat kï ngawn þal tanãimïta go þa mandat.

³⁷ Kamla i buwa, asï þal døjijoo gidaisøø. Ane'n non nya kuj ndub Luwah al bat, ndï ða kïla ndub Luwah ndø ho kada ho, ndï øg ron nyasa, na ndï elta kï Luwah,

³⁸ î kaa ðe døkàdt kïkïða'n non, a ndub Luwah, a elta lo ngon'n non mbi degt tube, îgïn ndï ngoon kad Luwah aj þebo Jerusalem.

Tel awïn gog þe lod Najaret

³⁹ Lon tølïn kon nyag tube kïgo Mberkïndat lo Bïraþe ye, Jojep kï Mari telïn kï døning Galilet gog awïn þe lod Najaret.

⁴⁰ Ngon asï kï dõ, ðoosï kï terr, majkurr lo Luwah i døat.

Jeju i kam kuj ndub Luwaht lon þala i kïlah gidaijoo

⁴¹ Þal kïðen kaa bøwa kï kõa a awïn þebo Jerusalemt kï ndø ða nah Pakï.

⁴² Lon þal Jeju i kïlah gidaijoo ye, awïn Jerusalemt kïgo nyabelþet lo juipg kïta ða nah Pakï.

⁴³ Lon ndøg tïgan woi, ad ngékooj Jeju ndï telïn gog kï þe ye, ngond Jeju nãi gog kam þebot kï Jerusalem. Na bøwa kï kõa gerïn al.

⁴⁴ Oon anan i kïna þut degt lod, ad sahna ndø kïða ro noojdgt.

⁴⁵ Lon ngahna al ye, tel awïn þebo Jerusalemt gog, a sahna.

⁴⁶ Lon ðan ndø mïta woi ye, ngahna kam kuj ndub Luwaht ndï ber dan ngéndoo degt, ndï oo dø ta lod, ndï ndïjed tag ho.

⁴⁷ Deg tube'n oon dø ta loa ye, ta yad dø goosït loa, kï tag'n ndï turd.

⁴⁸ Lon bøwa kï kõa oona ye, ta yad biw ad kõa ela an: Ngonïm, kïtøði i ðan sej titbe a? Oo, bowi kï mî kï sahi kï kamkil.

⁴⁹ Eld an: Kïtøði a i sahmïn ne a? I gerïn maj kad m'oo go nyag lo Bøwm ale?

⁵⁰ Na ngékoojag gerïn girr ta'n eld nõ al.

⁵¹ Kamla þai so godt, aw Najaret, a tel ron go tat lod. Kõa tø ngom nyag 'nten tube ngarkamïnt.

⁵² Na Jeju tøg, terr loa to kï tïga ad nel Luwah ho, nel deg ho.