Hoita kɨmaj lo Jeju Krist'n Luk ndang 18 - BIBLE MBAÏ 1980

Terrta dø ngengawkoit kï ngegangta

¹ Jeju el terrta mad ngéndoog lon kï n'ndoodïn kad elïn ta kï Luwah kï ndøgbe, na kï adïn rod oi siw al.

² El an: Kam þet mad ngenganta mad ndït nõ, þool Luwah al ho, þool ndil de mad al ho.

³ Kam þeat'n non tø, dekïdë mad kï ngengawkoi ndït nõ ho. Dekïdë'n non aw ro ngegangtat kï nja natnatbe, køa kï gangta kï to kïnant kïmad kølïn.

⁴ Na kaglo ngãibe ngegangta ndig al. Kamla got gog el kamïnt an:

⁵ Kïtø dekïdë kï ngengawkoi'nðan, în ða njuþam ye, m'a m'gangta loa m'ada, na þeta ðea kïndøgndøg tamt ørr tøgïm.

⁶ Bïraþe el an: Oon dø ta'n ngegangta kï gootal ndï el nõ.

⁷ Luwah tø a gangta lo kïmbedg lon îgïn ndï kon kï døat, ndø ho kàda ho ale? A ndï køkï, na a ða sed dø nya geegt lod al?

⁸ M'elsï a gangta lod kanangbe. Titbe kaa ne, lon Ngon de a tel ðe ye, a ngah kadkam kam degt kï døningt ne a?

Terrta dø parisït kï ngetirrdønya

⁹ Jeju el terrta mad kïðang kï øj dø deg madg'n ndï þan kul rod oon anan n'în deg kïdenesew, na kidïn ndeg deg.

¹⁰ El an: Deg joo awïn kam kuj ndub Luwaht kad kï n'elïn ta kï Luwah; kïkïða i Parisï kïmad i ngetirrdønya.

¹¹ Parisï'n non ða dõ ða elta kï ron titbe. Î Luwah m'ðai mersi kïta mî m'tit ndeg deg al, mî ngetaanya deg kï lo ngetøgt al, ke ngeða nya kïgootal al, ke ngeða dekïdëg al, ke m'tit ngetirrdønya'n ðan al tø.

¹² Kam ndøgt kïtanãimïta, m'øg rom nyasa nja joo, m'ad gaj kïkïða ku kï kïlaht kam nyagt tube'n m'ngah.

¹³ Na ngetirrdønya taa ne, ða sãi, ke kuma kaa ne, ndig kun kï dõ dørãt al. Na ða nda kadïn an: Luwah oo kumtondo lom. Kïtø mî ngeðamajal.

¹⁴ Jeju el an: M'elsï, ngetirrdønya'n non aw þe lon kï ta kï kørr dønt, na parisï taa ne, ta i døat. Kïtø dekïðen'n ndï tøi ron kï dõ a ne, a sølïn døa, na de'n ndï søl døn a ne, a tøin na kï dõ.

Jeju njang dø ngan kïðoig

¹⁵ Deg madg ðen kï ngankïðoig ro Jejut kïtakad ød'd kï jin, na lon ngéndoog loa oon nya 'nten ye kølïn sed.

¹⁶ Na Jeju kund kï ront an: I nyan ngan kïðoig ad ðen romt: Ot køgïnd, kïta kõþe lo Luwah i lo deg kï tit îgïn non.

¹⁷ Rota la m'ndï m'elsï ye, dekïðen'n taa kõþe lo Luwah tit ngon kïðoi al a ne, asï kand kamt al.

Ta lo de mad kï ngenya'n sah kumkajir kï mbãkïnõt ro Jejut

¹⁸ Bïradø kuj kawna lo juipg ndïje Jeju an: Ngendoo deg kïmaj, kaa m'ða ði kad m'ngahn kumkajir kï mbãkïnõt a?

¹⁹ Jeju ela an: Kïtøði i ndï kunmïn kïmaj a? De kïmaj goto, na kïðabe dø ta, ad i Luwah.

²⁰ I ger mberkïndag: A i sah ngaw ke dekïdë al, a i tøl de al. A i þoog al. A i manaj kï ngom al. Øsïgon bøwi kï kõi.

²¹ Ngenya'n non el an: M'ngom go tag'n non tube lon mîn kï basam nu mbã tajigla.

²² Lon Jeju oo dø ta 'nten ye, ela an: Nya kïða la nali ye, i ðaw nyag tube kï jiit kø, ad nara ngéndog, na a i ngah nyamajg ko kï dõ dørãt. Kamla i ðe, i ndulo gom.

²³ Na lon oo døta 'nten ye, ða kamkil kïta nyamajg loa i ngãi.

²⁴ Lon Jeju ooa ndï ða kamkil ye, el an: Lo gang lam kad ngényag andïn kam kõþet lo Luwah.

²⁵ Ngang ngãi kad ngényamajg andïn kam kõþet lo Luwah, tøi kad lukum and bulo libirt.

²⁶ Îgïn oon dø ye, anan: Nõ asï ngah kaj a?

²⁷ Jeju el an: Nya kï dum deg, a dum Luwah al.

²⁸ Pierr el an: Oo jî kï nya nyag loj tube kø, na kï ndulo goi.

²⁹ Jeju eld an: Rota la m'ndï m'elsï ye, de'n nya kuj lon, ke nën, ke ngonkõ, ke ngékoojïn, ke nganïn kïta kõþe lo Luwah a ne,

³⁰ a ngah kïðang døt ngãibe kam kaglot 'nten, na kam kaglot kï a ðe tø, a ngah kumkajir kï mbãkïnõt.

Jeju elta dø koint kï þain lo koit þaitø

³¹ Jeju øi ngéndoog lon kïkïlah gidaijoo kïront, eld an: Oon maj. Kï ndï kï j'aw þebo Jerusalemt, nu la a tølïn ta tag tube'n ngékelta kï ta Luwaht ndangïn kam Maktubt dan ne dø Ngon de ye.

³² A lana ji girrdegt kïdangdang, a tajïna, a tiwïn horr døat,

³³ a ndana kï ndeh, a tølïna, na ndø kïkõmïta a ne, a þai lo koit.

³⁴ Na ngéndoog loa gerïn girr tag 'nten al; kïta girr tag 'nten i kïyaro ko rodt; ad oon kam tag'n Jeju el nõ al.

Jeju ad mundø mad oo lo maj

³⁵ Lon Jeju ndï ðe nderrbe kï þebo Jerikot ye, mundø mad ndï bøg ðobt, ndï kø nya.

³⁶ Lon mundo'n non oo kah koosïdeg a tøin ye, ndïje ta an: Ði ða nya a?

³⁷ Deg elïna anan: Jeju kï Najaret't la ndï tøi ye.

³⁸ Mundo un ndin kï dõ kon an: Jeju Ngon Dabid oo kumtondo lom.

³⁹ Deg'n în kete nõat ye, ndángna kad kï nya tan, na þa ko kï tøgïn kï tøi an: Ngon Dabid oo kumtondo lom.

⁴⁰ Jeju duba, elta kï ðen sia ront; na lon ðe roat nderrbe ye, Jeju ndïjea an:

⁴¹ I ndig kï m'ða ði m'adi a?

⁴² Mundo el an: Bïraþe kï m'ngah koo lo.

⁴³ Tentenbe ngah koo lo, ndulo go Jeju, a øsïgon Luwah. Deg tube'n oon nya 'nten ye ndubïn Luwah.