Hoita kɨmaj lo Jeju Krist'n Luk ndang 17 - BIBLE MBAÏ 1980

Terrta dø ða majalt

¹ Jeju el ngéndoog lon an: Nyag kïkad deg son kam majalt a nalïn ðe al, na beto lo de'n ðe kï nyag'n non.

² I sooat kad lan mbal kusï nya kïbobe køat, lana ne þul bahbot tøi kad ða nya mad kï a ad kïkïða ku ngan kïdugt'n ðan son kam majalt.

³ Oon go rosï maj. Îla ngonkõi ða majal a ne, i ndánga, na îla tørr ndïn a ne, i nyàgo majal loa kø.

⁴ Îla ða sei majal nja tanãimïta kam ndø kïkïðat, na nja tanãimïta tø tel kïroit an: M'tørrndim a ne, kari na a i nyàgo majalg loa kø.

Ta dø kadkamt

⁵ Ngombangkïlag elïn Bïraþe anan: I laj kadkam dø madt.

⁶ Bïraþe el an: Îla awïn kï kadkam kï asï kï kum mutard a ne, a elïn kag þøl'n ðan anan: ørr kï ngïraig be, i ða kam bahbot a ne, î tø a tel ron go tat losï.

Kari na kï þer tel ron go tat lo ngeen

⁷ Nõ kusït la hã þer loa a ndøø, ke a ul batg, na lon tel kør ðe þe a ne, a ela an: I ðe tajigla i ndï ta tablet a?

⁸ A ela titbe al, na a ela kï ðago nyasa adïn, kamla kï la kub kïmaj ront, na kï dø þon, kï oo go lo ndïn ta tablet ad maj, kamla a ada nyasa kï man kãi. Got kamla, a sanya lon ho, a ãi man ho ye.

⁹ A ða mersi þer'n non kïta ða nya'n ela nõ a?

¹⁰ Titbe tø la în, lon i ðan nyag tube'n ndasïn mbera a ne, maj kad elïn anan: Jî þerg kïmaj loj goto kïta kï ða nya kï sumba kad kï ða koon.

Ngébanjg kïlah yootïn, na kïkïða kudt tel ða mersi Luwah

¹¹ Lon Jeju ndï aw kï þebo Jerusalemt þaitø ye, a nda kam døning Samari kï døning Galile gang.

¹² Ndï and ngon þet mad, ngébanjg kïlah ndødïna. Ngébanjg'n non duba ðan sãi:

¹³ Unïn ndid kïdõ kon ne anan: Jeju Ngendoo deg, oo kumtondo loj.

¹⁴ Jeju ood na eld an: Awïn i dan rosï ngéjamosï kadkarig. Lon ndï awïn þaitø ye arïn ad banj lod goto.

¹⁵ Kï kïða kudt, lon oo kad ni kï yoot ye, tel ndub tø Luwah kï ndïn kïbobe.

¹⁶ So kï nja Jejut kï takumïn ningt tø ðaa mersi. De'n non i de kï Samarit.

¹⁷ Jeju un tan an: Ngebanjg kïlah arïn ale? Kï jikïðag ye în ða a?

¹⁸ Îgïn non tø asïn tel kad ðe ndubïn Luwah al, na mbah'n ndïn tã a?

¹⁹ Kamla ela an: Î þai dõ, aw, kadkam loi aji.

Ðe kõþe lo Luwah

²⁰ Parisïg ndïjen Jeju ke kõþe lo Luwah a ðe ndø kïðat a? Jeju turd an: Kõþe lo Luwah ndï ðe kï lo koot kï kum al.

²¹ Deg a anan oo. I nëbe, ke i nube al, kïta kõþe lo Luwah i kusït.

²² El ngéndoog lon an: Ndø madg a ðen nõ lon a i ndigïn koo ndø kïkïða kam ndøgt lo Ngon de, na a oon al.

²³ A elsïn anan: Oona nube, oona nëbe, ot kawïn, ot ndulon god.

²⁴ Kïtø tit'n telndii a tel yolong, na nyër kunja a unj køt ko dørãt mad mbã kï køt ko dørãt mad ye, titbe la Ngon de a în kam ndøt lon ho ye.

²⁵ Na kari na a dai yon kï kõ ngãibe kamtã, deg kï kaglot'nðan tø a mbetïna.

²⁶ Tit'n nya ðan nya kaglot lo Noe, titbe tø la a ðan nya kaglot lo Ngon de ye.

²⁷ Deg ndï san nya, ndï ãin, ndï taan na, ndï adïn ngandg ðanþe mbã ndøt'n Noe and kam toot kïbo, ad man mbøkï ðe tøl deg tube.

²⁸ A i titbe tø tit'n ðan nya kaglot lo Lot, deg ndï san nya, ndï ãin, ndï ndugon nya, ndï ðawïn nya, ndï duwïn nya kam ndøøgt, ndï ðan kujg,

²⁹ na ndøt'n Lot tee þebo Sodomt kø ye, horr kï kõ giling giling kï supïr tuson ko dõ dørãt tølïn deg tube.

³⁰ Ndø'n Ngon de a tee høi a ne, nyag'n ðan nya kaglot'n non ye, a ðan nya þaitø.

³¹ Ndøt'n non de'n ndï dø kujt, na nyag loa ton kam kujt a ne, ot ðisï kand kam kujt lon kïta kun nya mad. Titbe tø de'n i kam ndøøt a ne, ot kad tel kï þe.

³² I gan kamsï dø në Lot't.

³³ Dekïðen'n sa kï n'aj ron a ne, a laa kø, na dekïðen'n la ron kø a ne, a ngaha gog.

³⁴ M'ndï m'elsï: Kam ndøt'n non deg joo kï ton tïrat kïða, a unïn de kïða, na a nyan kïmad.

³⁵ Dekïdëg joo ða urrïn nya natlot kïkïða a ne, a unïn kïða, na a nyan kïmad.

³⁶ Deg joo a ndïn kam ndøøt kïkïða a ne, a unïn kïða, na a nyan kïmad.

³⁷ Ngéndoog loa ndïjena anan: Bïraþe nya 'nten a ða nya lo kïðat a? Jeju turd an: Lon nîn tot a ne, nõbe la malg a kawïn na kïtit ho ye.