Hoita kɨmaj lo Jeju Krist'n Luk ndang 15 - BIBLE MBAÏ 1980

Terrta dø bat't kï nãi

¹ Ngétaa lambo kï kaya deg tube ndøtïn kï ro Jejut kad kï n'oon dø ta loa.

² Parisïg kï ngéndoo mberkïnda nyurïn ta anan: De'n ndïn hø kaya deg kï ront, ndï sanya sed nat.

³ Jeju eld terrta 'nten an:

⁴ De mad kusït ne, îla aw kï batg þu, na kïða kudt nãi a ne, a nya kïdøjikïða gidaijikïða'n non kam mut, na aw sah go bat'n nãi nõ mbã kad ngaha kamtã al a?

⁵ Lon ngah ye, a una gaa bøgïnt kï ronel.

⁶ Lon tee þe a ne, kun namïng kïmad þeng kï nat eld an: I ðan ronel sem, kïta m'ngah bat lom kan nãi nõ.

⁷ M'ndï m'elsï titbe tø la a ðan ne ronel dõ dørãt dø ngeðamajalt kïkïða'n tørr ndïn ye, tøi deg kïdenesew kï døjikïða gidaijikïða îgïn geen tørrïn ndid al.

Terrta dø gursï handt kï nãi

⁸ Ke dekïdë kïða tø îla aw kï gursï hand kïndaa kïlah, na kïkïða nãi a ne, a ndah horr lambat, a tïsa kam kuj, saht kï rotîn mbã ngah al a?

⁹ Lon ngah a ne, kun namïng kïmad þeng kï nat eld an: I ðan ronel sem kïta m'ngah nar hand lom kïndaa'n nãi nõ.

¹⁰ Titbe m'ndï m'elsï. Malaikag lo Luwah a ðan ne ronel dø ngeðamajalt kïkïða'n tørrndin.

Terrta dø ngont kï nãi

¹¹ Jeju el tø an: De mad a kï nganïn kïdïngãg joo.

¹² Kïdu el bøwïn an: Bøwm adïm gaj nyag loi în a tel nyanduba lom. Bøwd kegd nyamajg lon.

¹³ Gog go ndøt kï tëbe ngona kïdu kaw nyag lon tube kï nat, na aw mbah døþet kï sãi. Nu la tïndah nyag lon tî kø lo ða kayat ye.

¹⁴ Lon tïndah nyag tube tî kø woi ye, þoo kïbo so døningt'n non ad mba girr so kam ndot.

¹⁵ Aw nïma kï de mad kï døningt'n non, îtø laa gawgt kad ul boorg.

¹⁶ Ngon'n non nyur õa, ad nda kamïnt kï n'sa kand mat'n boorg ða san nõ, na de kï ada goto.

¹⁷ Na lon kuma gang woi ye, el an: Ngan ngékïla lo bøwïm în bãi ndïn kï nyasa kï to mbuj, na mî tã m'ad þoo ndï tølïm.

¹⁸ M'a m'þai m'aw ro bøwïmt m'ela m'an: bøwïm m'ða majal kï ndoor Luwah kï kï ndoori tø.

¹⁹ Na m'asï kad i kunïm ngoni gog al ta, kï i telïm tit kïkïða ku ngan ngékïlagt loi.

²⁰ Þai dõ aw ro bøwïnt. Na lon i sãi þaitø ye. Bøwa ooa, ta õ kama, ad la ngød ørr, aw so køat, njutaa.

²¹ Ngona ela an: Bøwm m'ða majal kï ndoor Luwah kï nõit tø; m'asï kad i kunïm ngoni gog al.

²² Na bøwa el þerg lon an: I teen kï kub kïmaj tøi, kï dõt, i lana, i lan ngon ninga jiat kï markop njat.

²³ I ðen kï ngon mang kï to mbulmbul kaa nõ, i jan køa, kï san ho, kï ðan ne ronel.

²⁴ Kïtø ngonïm'n ndïn oi, na tel kumkajir, nãi tø la m'ngaha ye. Mban girr ða ronel.

²⁵ Na ngon derra i kam ndøøt. Lon ndï ðe, nãi nderrbe kad tee þe ye, oo dø ndï kød kï kund, kï ndøm.

²⁶ Kun kïkïða ku þergt kï ront, ndïjea girr nyag'n non.

²⁷ Þer'n non ela an: Ngonkõi ðe la bøwi ja kø ngon mang kïbo mbulmbul kaa nõ, kïta ngaha kï lapia kari.

²⁸ Na ngon derra ða wong, ndig kand kuju al; bøwa tee gøra kad and.

²⁹ Na tur bøwïn an: Oo þalg ngãibe m'ndï m'ða kïla m'adi, m'tøi dø mberkïndag loi nja kïða al, na adïm ngon bîya kad m'ðan ronel kï nammg nja kïða al.

³⁰ Na lon ngoni'n ndïn în sanyamajg loi sed kaya dekïdëg ðe a ne, i ja kø ngon mang kï to mbulmbul kaa nõ ada.

³¹ Na bøwa ela an: Ngonïm, î sem nat kïndøgndøgbe, nyag lom tube în loi.

³² Na sumba kad kï ða ronel kï kamnda kïta ngonkõi'n ndïn oi, la tel kumkajir ye; nãi la kï ngaha tø ye.