Hoita kɨmaj lo Jeju Krist'n Luk ndang 12 - BIBLE MBAÏ 1980

Jeju ndoo deg kad oon go rod maj dø ngéndokumdegt

¹ Kam ndøgt'n non, lon koosïdeg kawïn na kï nat mbã ða þan na ye, Jeju mba girr kel ngéndoog lon an: Nyakïdasa bang la ten: Oon go rosï dø berrkasït lo Parisïg ad i ndo'n ndonkum deg.

² Kïtø nya mad kï kut dø kï a unïn nyadøt al goto. Ke nya mad kiyadø kï de a ger al goto.

³ Kïtø nya kïðen'n elïn kam tilt ye, a oon dø kam kunjt, nyag'n i elïn kï mbi degt gilelot, a lan mbera dø kujgt dõ.

Maj kad de þool Luwah

⁴ În nammg, m'ndï m'elsï ot þoolïn îgïn ndï tølïn dãro de, na gog got asïn ða nya mad kï tøi al.

⁵ Na m'a m'øjsï în hã sumba kad i þoolïna; i þoolïn Luwah'n a tøl de, kamla aw kï tøg kad laa kam Jahanamat, ã m'elsï îla i þoolïna ye.

⁶ A ðawïn tîtîg mi kï gursï joo ale? Na kïkïða kudt kaa kam Luwah a oi døa al.

⁷ Na mbã kï bisï døsï tube dan kørrd. Ot þoolïn, i tøin tîtîg ngãibe.

Maj kad ngéndoog lo Jeju tøn tad nõ degt man ne naj

⁸ M'ndï m'elsï tø, dekïðen'n ndï elta lom nõ degt a ne, Ngon de tø a elta loa nõ malaikagt lo Luwah,

⁹ na de'n maj ta gerïm nõ degt a ne, Ngon de tø a maj ta gera nõ malaikagt lo Luwah ho.

¹⁰ Dekïðen kï a elta kï ndoor Ngon de tø a ne, Luwah a nyàgo majalg loa; na în ndï elta kïmal dø Ndil kïkunjðangt a ne, a nyan go majalg loa kø al bat.

¹¹ Na lon awïn sesï kad gangïn ta døsït kam kuj kawnat lo juipg kï nõ ngékõþegt, kï ngétøgg a ne, ot soolïn dø tat ke titbãi a kørrïn ne ta døsït, ke dø tat kï a kelïn.

¹² Kïtø dø kaglot'n non la Ndil kïkunjðang a ndoosï ta'n sumba kad elïn.

¹³ De mad un ndin kï dõ den koosïgt elïn Jeju an: Ngendoo deg el ngonkom ad kegïm nyandubat.

¹⁴ Na Jeju el an: Dekïdïngã, nõ ndam ngegangtat losï ke ngekegnya kusït a?

¹⁵ Kamla eld an: I ngomïn rosï maj dø kumndà; kïta ke neni nyamajg lo de ton mbuj kaa ne, a ndï kï døn dõ kïta nyag'n ton jiat al.

¹⁶ El terrta mad an: Døning lo de mad kï ngenya taa tee kï kand nya ngãi,

¹⁷ la øj ta kamïnt an: Ka m'ða ði? Kïtø m'oo lon m'a m'kaw nyandøø lom kï tit al.

¹⁸ El an: Nya'n m'a m'ða la ten; m'a m'boti damg lom, na m'a m'ða kïðangg kïbotøi; nõbe la m'a m'ü nyako lom kï nyamajg lom tube tit ye.

¹⁹ Kamla m'a m'el rom m'an: Î rom, i ndï kï nya majg ngãi kï nda kïta þalg ngãibe, i taakò, i sa, ãi, i su.

²⁰ Na Luwah ela an: Î þood de, ndø la 'nten a sahn roi roit gog. Nyag'n i mbõ kïnat ye, i kïta nõ a?

²¹ Titbe tø la de'n mbõ nyamajg kï nat kïta ron a ne, i ngenya ro Luwaht al.

Maj kad de þa kul Luwah

²² Kamla Jeju el ngéndoog lon an: Kïtø 'nten m'ndï m'elsïn: Ot soolïn kïta rosï dø nyat'n a san, ke kïta dãrosï dø nyat'n a lan rosït tø.

²³ Kïtø ro de tøi nyasa, dãro tø tøi kubg.

²⁴ I nølïn kagang køri køri, duwïn nyako al ho, jan nyako al ho, lo ndah nyako lod gotø ho, dam lod goto tø, na Luwah la ndï uld ye. I tøin yelg nja bãi a?

²⁵ Nõ kusït asï la kil ji kïða dø ndøgt kad ngalïn kïta sool lon a?

²⁶ Kïtø 'nten îla i asï ða nya kï du kïtitbe al a ne, kïtøði i ndï soolïn ne dø ndeg nyagt a?

²⁷ I nølïn hutkámg køri køri, titbãi ða tøgïn ne, þewïn kïla kub al, jon kub al tø; na m'ndï m'elsï, ke Salomõ kam nyamajgt loa tube kaa la kub kïmaj tit kïkïða kudt al.

²⁸ Luwah la ndï pare ro mu kï kam mut titbe ye. Mu'n non ða kari þone, na loti a lana kam horrt. Yela, în deg tã Luwah a oo gosï kï kub ale? Kadkam losï i tëbe.

²⁹ Na în, ot sahn nya'n a i san ke nya'n a kãin, ot kadïn kamsï dasï ta paa.

³⁰ Kïtø nyag'n non deg kï døningt ndï sahn; na Bøwsï ger i ndï gen nyag'n non ho.

³¹ Na i sahn kõþe loa, na nyag'n non tube tø a adsïn kï døt.

Nyandoo lo Jeju dø nyamajgt kï kam dørãt dõ

³² În þut kï tëbe ot þoolïn kïta nel Bøwsï dum kï n'adsï kõþe.

³³ I ndugon nyag losï kø adïn nara ngéndog kadkarit. Urïn ngong narg kïtasï kï a tel køkï al bat. I mbon nyamajg kï kam dørãt dõ, a tujïn al, boogg a teen kadt al, kïðukïs a tujïnd nu al tø.

³⁴ Kïtø lon nyamajg losï în tit a ne, lo'n non la kamsï a i døt ye.

Maj kad þerg lo Bïraþe ndïn døgt

³⁵ I ndïn kï þosï kï dø kïta ða kïla, na adïn lambag losï ndïn kï horr kï ndøgbe.

³⁶ Kï în tit þerkïlag kï ndï ngoon tel bïraþe lod lo mburr namt keðengë kad 'nten ta ðob adïna lon gan tabit.

³⁷ Ngéronel la în þerg'n non, îgïn hã Bïraþe lod tel ðe a ne, a ngahd ndïn døgt. Rota la m'ndï m'elsï ye, î kïþe kï døn a dø þon, na a ndad ta nyasat, a aw rodt, na a oo god kï nyasa.

³⁸ Ke ðe danlot ke kï kàd kï tøi, îla ngah þerg lon ndïn døgt a ne, þerg'n non a în ngéronel.

³⁹ Na kï i gerïn nya 'nten maj; îla ngeþe ger døkàd lon ngeþoog a ðet a ne, ni a ndï døgt, na a nya ad mbutïn kuj loa al.

⁴⁰ În tø i ðan go rosï, kïta Ngon de a ðe dø kaglot'n a i ndan kamsï døt al.

Ta lo þer kï ngeðanya kïro kï þer kï ngeða nya kïro al

⁴¹ Pierr el an: Bïraþe terrta 'nten ye, jî la i ndï elj yo? Ke deg tube a?

⁴² Bïraþe el an: Nõ i ngørøkïla kïro kï ngekumtøg a? I þer'n ngea ndaa dø ngan'gt kï þe lon, kad kï ad'd nyasa døkàdat.

⁴³ Na lon ngea ðe ngaha ndï ða titbe ye, þer'n non i þer kï ngeronel.

⁴⁴ Rota la m'ndï m'elsï ye, a ndaa dø nyagt lon tube.

⁴⁵ Na îla þer'n non el kamïnt an: Ngeem a tel ðe kanang al, na mba girr tïnda namïng kïdïngãg kï kïdëg, sanya ho, ãi ho ad kasï ðaa tø a ne,

⁴⁶ ngeþer'n non a ðe døkàdt'n nda kamïn døt al, kï døkàd'n ger al tø, a gangta døat, a laa lot lo ngékadkamd Luwah al.

⁴⁷ Þer'n ger nya kï ngeen ndig kad ða, na ða nya'n non al, ðago ndigt lo ngeen al tø a ne, a ndana ngãi.

⁴⁸ Na þer'n ger nya kï ngeen ndig al, na ða nyag kïmajal asï ta nda ngãi a ne, ndana ngãi. Na de'n adïna nya ngãi a ndïjena ngãi tø, na de'n lan jiat ngãi tø a ne, a ndïjena kï tøi tø ho.

Jeju ðe nda lapia dan degt al, na ndoorna tã

⁴⁹ M'ðe kïta la horr dø degt kï døningt; na m'ndig jeje kad horr'n non kï õ woi.

⁵⁰ Na baptem mad to nõ kari na kï m'ða baptem'n non. Kam ndï osïm ngãibe mbã kad m'tïga'n.

⁵¹ Ot koo kanan: m'ðe kïtakad lapia to dan degt kï døningt ne. M'ðe kï gang na tã.

⁵² Kïtø labekïnõt, deg mi kam kujt kïkïðat a în kï gang na, kïmïta a ndoorïn kïjoo, kïjoo a ndoorïn kïmïta.

⁵³ A gangïn na, bøw a ndoor ngonïn kïdïngã, ngon kïdïngã a ndoor bøwïn; kõ ngon a ndoor ngonïn kïdë, ngon kïdë a ndoor kon; mum kïdë a ndoor mumïn; î tø a ndoor mumïn.

Jeju ndáng deg'n gerïn go kaglo'n non al

⁵⁴ Jeju el koosïdeg an: Lon kilndii mad þãi ko lo kudkàdt a ne, tentenbe i ndï anan: Ndii ndï ðe; ðaa titbe tø.

⁵⁵ Lon oon nel ndii la kï døø a ne, i ndï anan: Lo a tïnga ngãi; ðaan titbe tø.

⁵⁶ În ngéndokumdeg i gerïn køj takum døning kï dørã; na titbãi i gerïn ne køj kaglo 'nten al a?

Maj kad de sah ðob tee ji mad kølïnt lon i ne ðobo þaitø

⁵⁷ Kïtøði în kïþeg kïdøsï i gangïn ta nya în i goðobat al a?

⁵⁸ Lon i ndï awïn kïmadkøli kïro ngegangtat þaitø a ne, i ða tootbe kad i la nooj nat sia dø ðobt, na þet a ørri aw sei ro ngegangtat, ngegangta tø a lai ji asïgart, na asïgar tø a taa lai dangãit.

⁵⁹ Rota la m'ndï m'elsï ye, a i teet al bat, na a i ba ndø mbã kï døboi sile.