Hoita kɨmaj lo Jeju Krist'n Luk ndang 1 - BIBLE MBAÏ 1980

Luk ndang maktub ad namïn Teopil

¹ Deg ngãibe ndangïn hoi nyag'n ðan nya danjt kïgo tøgdt.

² Deg'n non ndangïn tag lo ngémanajg, kï ngékelta lo Luwah loyaþood kïlat lo Jeju, ad i tag'n elïn dø nyagt'n oon kï kumd.

³ Mî tø m'nderr girr nyag'n non loyaþoodt mbã døboit. Kïtø 'nten m'oo maj kad m'ndang ta dødt kïgoagoa m'adi î Teopil ngemaj kï tøi.

⁴ M'ndï m'ða titbe kïtakad i gerïn rota dø nyagt tube'n deg'n non ndooin.

Malaika elta kete dø kooj Jãt kï ngeða baptem

⁵ Kaglot'n Herod în ngar kam døning Judet ye, ngejamosï kadkari mad ndï nõ tøa i Jakari, i kïkïða ku þut ngéjamosïkadkarigt kï bïra bøwd i Abia. Nëa i kïkïða ku ngan kïdëgt kï girrkooj Aarõ, tøa i Elijabet.

⁶ În tujoo în deg kïdenesew nõ Luwaht, telïn rod go mberkïndagt lo Bïraþe kï tag loa kï tee, kïkanj ta dødt.

⁷ Na oojïn ngon al, kïta Elijabet i kuj, în tujoo în deg kï telïn bïga bugum.

⁸ Ndø mad Jakari ndï ta kïla jamosïkadkarit nõ Luwaht, kïta i kaglo lo ngékïþe lo Abia kad ðan kïla'n non.

⁹ Kïgo nyabelþet lo ngéjamosïkadkari, yan yuk, na yuk'n non so dø Jakarit kad and lot kïjaþat lo Bïraþe kad la horr mbikamt kï kootmbî.

¹⁰ Deg koosïg tube ðan tïga, ða elïn ta kï Luwah dø kàd la horr mbikamt kï kootmbî.

¹¹ Malaika lo Bïraþe mad tee høi kïro Jakarit, ða kad dïngïr la horr mbikam kï kootmbî ko kõt.

¹² Lon Jakari ooa ye, kama gang man ngalang ad þool ðaa tø.

¹³ Malaika ela an: Jakari. Ot þool kïta Luwah oo dø kø loi, þet nëi Elijabet a ooj ngon adi, na a i ndah tøa Jã.

¹⁴ A i ða ronel døat kï kamnda; deg ngãibe tø a ðan ronel dø koojat.

¹⁵ A i de kïbo nõ Bïraþet, a ãi kasïnduu, ke kasï mad kï ngang al bat, a i kï Ndil kïkunjðang ndø koojat mbã tøgïn.

¹⁶ A tel kï deg ngãibe ku Israelagt kï ro Bïraþe Luwaht lod,

¹⁷ a ða kïlaþer lon nõ Luwaht kï ndil Eli. Kï tøg kï tit lo Eli, ngoni a tel ngarkam bøwg kï ro ngandgt, a ad ngételro gotat al telïn kï kam ðob terrt lo deg kïdenesew, a ðago deg lo Bïraþe kad ðan go rod kïtaa.

¹⁸ Jakari el Malaika an: Kï ði m'a m'gerïn kad ta 'nten i rota a? Kïtø mî bïga, nëm tø tel bïga bugum.

¹⁹ Malaika tura an: Mî Gabriel m'ða nõ Luwaht. Kïtø ða kïlaþer loa. Luwah lam kad m'eli ta ho, kï m'ørri hoita kïmaj 'nten.

²⁰ Oo maj þet a i tel mbo, a asï kelta al mbã ndøt'n nyag 'nten a ðan nya kamtã; kïta i taa ta lom al. A tølïn køntag dø kàdat.

²¹ Deg ndï ngoon Jakari, ta yad kïta nãia kï nãi køkï kam lot kïjaþat.

²² Lon tee tïga ye, asï kad elta al. Deg gerïn ta kad Jakari oo nyakookamndilt kam kuj ndub Luwaht. Î tø mbøjd kï jin, na ndï tan mbo.

²³ Lon ndø ða kïla ndub Luwah loa asï woi ye, Jakari aw þe lon.

²⁴ Go ndøgt 'nten ye, nëa Elijabet ndan ngon, na tee tïga kam kujt lon al asï nah mi, an:

²⁵ 'Nten la i maj'n Bïraþe ða sem ye, dø ndøt'n oo kumtondo lom kad m'ørrïn rosøl dømt dan degt.

Malaika Gabriel elta Mari kete dø kooj Jejut

²⁶ Kam naht kïkïbojidet go naht'n Elijabet ndan ngon ye, Luwah la Malaika Gabriel þet mad kï døning Galilet, tøa i Najaret.

²⁷ Laa kï ro ngon kï mandt kï ger ngaw al, în de mad kï girrkooj Dabidt kï tøa i Jojep, hø døa. Tø ngon kïmand'n non i Mari.

²⁸ Malaika and goat, an: Lapia. Î ngemajkurrr, Bïraþe i nat sei.

²⁹ Ta lo malaika ad kam Mari gang ngalang; øj ta kamïnt, ke girr lapia loa i ði a?

³⁰ Malaika ela an: Ot þool, Mari, i ngah maj nõ Luwaht.

³¹ Oo maj a i ndan ngon, a ooj kïdïngã, a i ndah tøa Jeju.

³² Îla i kïbo ye, a kunïna ngon Ngetøitøi, Bïraþe Luwah tø a ada pong kõþe lo bøwa Dabid.

³³ A õþe dø ngékï þet lo Jakob mbãkïnõt, kõþe loa døboia goto.

³⁴ Mari el Malaika an: Mî'n m'ger ngaw al ye, titbãi nya 'nten a ða nya?

³⁵ Malaika tura an: Ndil kïkunjðang a ðe døit, tøg Luwah Ngetøitøi a uti kï Ndilïn. Kïtø 'nten ngon kïkunjðang'n a ooja, a kunïna ngon Luwah.

³⁶ Oo tø, nooji Elijabet ndan ngon dø bïgant, în deg a kunïna kuj ye, ndan ngon asï nah kïkïbojidet.

³⁷ Kïtø nya mad kï dum Luwah goto.

³⁸ Mari el an: Oo mî ber kïdë lo Bïraþe, kï ða sem kïgo tat loi. Malaika þai, na nyàa.

Mari aw oo Elijabet

³⁹ Kam ndøt'n non Mari þai kanangbe aw døning mbalbot, þet mad kï døning Judet,

⁴⁰ and kuju lo Jakari, ða lapia Elijabet.

⁴¹ Lon Elijabet oo dø lapia lo Mari ye, ngon kï kamat þa ruru. Elijabet ðoosï kï Ndil kïkunjðang.

⁴² Ko kï ndïn kïbobe an: Ila î ngemajkurr ku dekïdëgt ye, ngon kooji tø a i ngemajkurr.

⁴³ Titbãi m'ngahn maj titbe mbã kõ Bïraþe lom ðen romt a?

⁴⁴ Kïtø oo. Lon lapia loi so mbimt ye, tentenbe ngon kï kammt roa nela, ad þa ruru.

⁴⁵ Î ngeronel tø, în ad kami: Nyag'n eli'n kokïro Bïraþet, a ðan nya.

Pa lo Mari

⁴⁶ Mari el an: Rom ndï øsïgon Bïraþe.

⁴⁷ M'ða ronel kam ndilïmt dø Luwaht kï ngekajïm.

⁴⁸ Kïtø oo kumtondo lo þer lon kïdë. Oo, nëbe kï nõt ngakaa deg tube a kunmïn ngeronel.

⁴⁹ Kïtø Luwah kï Ngetøg tube ða sem nyag kïbobo, tøa i kïkunjðang.

⁵⁰ Oo kumtondo lo ngeþoolag kï dø ngakaat kï ngakaa.

⁵¹ Øj deg tøg jin, tïnda îgïn ndïn kï tagahg kï go lo døsïrt ngarkamdt tî kø.

⁵² Ørr ngékõþeg kø dø pong kõþegt lod, na tøi de kï sølg kï dõ.

⁵³ Ad deg'n þo ðad ndanïn kï nyag kïmaj, na ad ngénya awïn jid kari.

⁵⁴ Ða kï þer lon Israel, kïta gah dø kookumtondot lon,

⁵⁵ tit'n elïn bøwjg kïdø Abrahamt kï ngakaa mbãkïnõt.

⁵⁶ Mari ndï kï Elijabet asï nah mïta kamla tel kï þe lon.

Kooj Jã ngeða baptem

⁵⁷ Lon ndø kooj ngon asï ye, Elijabet ooj ngon kïdïngã.

⁵⁸ Madþeag kï noojag oon hoi maj kï Bïraþe ða sia, na ðan sia ronel tø.

⁵⁹ Dø ndøt kï kõ jijoo, ðen kad kï n'jan gaj ngon kï kasï, ða kï'n ndahn tøa Jakari go tø Bøwat.

⁶⁰ Na kõa tur an: I be al; na a ndahn tøa Jã.

⁶¹ Elïna anan: De mad kï tøa i titbe ku noojgt goto.

⁶² Mbøjïn bøwa kï jid kad ad'd gerïn tø'n ndig kad ndah.

⁶³ Jakari kø bar mad, ndang nya tit an: Tøa i Jã. Taa ya deg tube.

⁶⁴ Tentenbe ta Jakari tee, ndõa tut, ad elta ndubïn Luwah.

⁶⁵ Þool ða madþeag tube, hoita nyag'n non tî kï log kï døning mbalbot tube kam døning Judet.

⁶⁶ Deg tube, îgïn oon hoi nyag'n non ye, gaan døt anan: Ngon 'nten ye, a tel ði a? Kïtø tøg ji Bïraþe î nat sia.

Pa lo Jakari dø nyagt kï a ðen

⁶⁷ Bøwa Jakari ðoosï kï Ndil kïkunjðang ad ndø ndil an:

⁶⁸ Ad kï ndubïn Bïraþe Luwah lo Israelag kïta ðe gen deg lon, na badød.

⁶⁹ Þai kï Ngekaj kï ngetøg kïtatøj ku degt kï girrkooj Dabidt.

⁷⁰ Luwah elta titbe kïta deg lon kïjaþat ngékelta kï tant, maði nu an:

⁷¹ N'a n'aj'j ji madngétajgt kï ji degt tube'n ndï øsïjïn ta ho.

⁷² N'a n'oo kumtondo lo Bøwjg, n'an ga kamïn dø kunkøt lon kïkunjðang.

⁷³ Un køn kï yokïnda ad Bøwj Abraham an:

⁷⁴ N'a n'aj'j ji madngétajgt kad kï ða kïla kï nduban kïkanj þool.

⁷⁵ Kam nyaðat kïgo lo Luwaht kï kïdenesew nõat kï ndøjg tube.

⁷⁶ Na î, ngon a kunin ngekelta kï ta Ngetøitøit kïta a aw kete nõ Bïraþet kad i ðago ðobg loa.

⁷⁷ Nya'n a i lambera ad girrdeg loa laten: Luwah ndï aj deg kïta ndï nyàgo majalg lod kø.

⁷⁸ Kïtø õ kam Luwah loj ad oo kumtondo loj. Kaj a ðe rojt kokïdõ tit kï kunj bijalo kï þa,

⁷⁹ a øsï dø degt ngéndï kam ðob lapiat.

⁸⁰ Ngon tøg, ngang kam ndilïnt. Ndï kam dïlambot mbã ndøt'n tee høi ku Israelagt.