Jonas 1 - BIBLE MBAÏ 1980

Jonas sah ðob kãi sãi takum Bïraþet

¹ Ta lo Bïraþe ðe ro Jonast ngon Amïtai, an:

² I þai aw Ninib, þe kïbo ngãi'n non, i la mber ta kïdøat kïta ðagootal lo ngendït þai aw mbã tee romt.

³ Na Jonas þai ãi takum Bïraþet kïta kaw þet kï Tarsis. Aw þet kï Japo, ngah too kïbo ndï aw Tarsis, ba nara, and kamt kïtakad kï n'aw nat sed Tarsis sãi kï takum Bïraþet.

⁴ Na Bïraþe ad nél kïbo þai dø bahbot ad nélbarwãi kï tøg ngãi la dø bahbot, na too kïbo to ta nujt.

⁵ Kamla ngénel too kïbo þoolïn ad dekïðen ko kïdø Luwaht lon; øin nyagatg kï kam too kïbot kam bahbot kïtakad too kïbo lod øi ngãi al. Jonas ðisï and kam too kïbot kïkeme, to ber ad þi tøla søkirr kete lon nel la al þaitø,

⁶ Kïbo lo ngéðakïla kam toot kïbo ðe roat, ela an: Î i to i ða ði? I þai, i ko kïdø Luwaht loi, maja a gah døjt kïtakad kï nuj al.

⁷ Ngénel too kïbo elïn na ta anan: Ad kï yan yuk kïtakad kï gerïn ke kïta de kï ðah hã nya kïmajal 'nten døjt. Yan yuk, na yuk so dø Jonast.

⁸ Elïna anan: Kï køi kï elj kïtøði majal 'nten døjt. Kïla loi i ði a? I þai ko ðah a? Þe loi i ðah a? Girrdeg loi în nõg a?

⁹ Jonas eld an: Mî Hebre, mî ngeþool Bïraþe Luwah kï dørãt dõ ngeða bahbo kï døning.

¹⁰ Kamla þool tøl deg'n non søkirr ad elïna anan: I ða ði a? Deg gerïn kad Jonas ndï ãi takum Bïraþet kïta Jonas eld titbe.

¹¹ Kamla elïna anan: Kaa kï ða ði sei kïtakad bah tel to lom kïtaj a? Kïtø nélbarwãi ad bah þai kï tøgïn kïdøtdøt,

¹² Jonas eld an: Unmïn i lamïn kam bahbot. Kamla bah a tel to lom kïtasï, kïta m'ger þet i kïtø majal lom la nélbarwãi kïbo 'nten døsït ye.

¹³ Na deg nelïn too kïbo kï tøgd kïtakad telïn kïgog døningt, na asïn al kïta nélbarwãi ad bah þai kï tøgïn kïdøtdøt, ndï øsïd kïgog.

¹⁴ Kïtø 'nten kon kïdø Bïraþet, anan: Bïraþe, kï køi, ot kad kï nuj kïta ta lo de'n non. Ot la ta mosï de kï ta loa goto døjt. Kïtø î Bïraþe i ða kïgo ndigt loi.

¹⁵ Titbe tø la unïn ne Jonas lana kam bahbot, kamla bah tel to lom.

¹⁶ Deg'n non þoolïn Bïraþe ngãiþe, lan kadkari kïjakø adïn Bïraþe, na unïn kød adïna kï yokïnda.