Jã 7 - BIBLE MBAÏ 1980

Ngankõ Jeju adïna kamd al

¹ Go nyagt 'nten Jeju a lago log kam døning Galilet, ndig lago log kï kam døning Judet al kïta juipg sahn ðob tøla.

² Nah lo juipg ad i nah kujkám i nderrbe.

³ Ngankõag elïna anan: I þai nëbe aw døning Judet kad ngéndoog loi oon kïlag'n i ndï i ða.

⁴ Kïtø de'n ndig kad deg gernïn a ne, a ða nyag kï tïga wakïsï: Tit'n i ðan nyag kï yaya 'nten ye, øj roi kï tïga, ad deg kï døningt ne oon.

⁵ Kïtø ke ngankõa kaa ne, adïna kamd al.

⁶ Jeju eld an: Kaglo lom asï al þaitø, na în taa ne, kaglo losï asï kïndøgndøg be.

⁷ Deg kï døningt ne asï køsïsïn ta al, na mî taa ndï øsïmïn ta, kïta m'ndï manaj dø kïlaðadt kïmajal.

⁸ I ndï awïn lo ða naht, na mî m'ndï m'aw al þaitø, kïta kaglo lom asï al.

⁹ Lon Jeju eld ta 'nten ye, ndï kï døning Galilet.

Jeju aw lo ða naht kam þebot kï Jerusalem

¹⁰ Na lon ngankõ Jeju awïn lo ða naht woi, kamla î kïþe aw godt ho ye. Na øj ron kï tïga al, na i gid tilt.

¹¹ Juipg sahna lo ða naht anan: I ða a?

¹² Nyur ngutngut þai ku koosïdegt kï dø Jejut; kïmadg anan i de kïmaj, kïmadg tø anan: Be al, na ndï ü koosïdeg mut ta kü.

¹³ Titbe kaa de mad kï ire kamïn elïn ta loa kïtïga wakïsï goto, kïta deg ngãi þoolïn juipg.

¹⁴ Lon ten ngawden nah kujkámt ye, Jeju aw kam kuj ndub Luwaht, ða ndoo deg.

¹⁵ Taa ya Juipg ad anan: De'n ndïn ndoo mberkïnda lo Juipg nja kïða al ye, titbãi hã ða ørrj girr mberkïndag a?

¹⁶ Jeju turd an: Nyandoo kï m'ndï m'ndoo deg ye, i lom al, na i lo Luwah kï Ngelam.

¹⁷ Îla de mad ndig ða kïgo ndigt lo Luwah a ne, a ger ke nyandoo lom'n m'ndï m'ndoo deg i kokïro Luwaht, a ke m'ndï m'un kïdøm la m'el.

¹⁸ De'n un ta el kï døn a ne, ndï sah køsïgon kï køsï døn; na de'n ndig kad ngelan ngah køsïgon a ne, i de kïro, nya mad kïdenesew al goto roat.

¹⁹ Moij adsï Mberkïnda ale? Na de kïða kusït kï tel ron go Mberkïndat goto. Kïtøði i ndï sahn ne ðob tølïm a?

²⁰ Deg koosïg turïna anan: Ndil kïmajal i kamit; nõ sah ðob tøli a?

²¹ Jeju turd an: Kïla kïkïða'n m'ða, la taa ndï yasï tube ye.

²² Gajkïja i kokïro Moij al, na i kokïro bïra bøwgt tã, na Moij ndasï mber kad i jan gaj ngan kïdïngãg kïta 'nten la i ndï i jan ne gaj ngan kïdïngãg ke kï ndø taakò ye.

²³ Îla i jan gaj de kï ndø taakò kïtakad tøi dø Mberkïnda lo Moij al a ne, kïtøði i ndï ðan ne wong dømt, kïtakad kï m'ad de lapia kïtaagbe kï ndø taakò a?

²⁴ Ot gangïn ta kïgo koo takum det, na i gangïn ta kïgoðobat, ad i ta kïgang kïdenesew.

Jeju i Krist

²⁵ Deg madg ku ngendï þebo Jerusalemt elïn anan: În ndïn i de'n sahn ðob tøla ye ale?

²⁶ Oon ndï elta kï kam kï misïmisï kï tïga wakïsï, na elïna ta mad al. Rota ngékõþeg loj gerïn kad i Krist wan?

²⁷ Na jî kïger lon de'n ndïn teet, na lon Krist a ðe a ne, de kï a ger koo lon a teet goto.

²⁸ Lon Jeju ndï ndoo deg kam kuj ndub Luwaht ye, ko kï ndïn kïbo an: I germïn na i gerïn ko lo'n m'teet ye ho? M'ðe kï døm al, na Ngelam i ngerota; i gerïna al.

²⁹ Mî m'gera, kïta m'tee ko roat, îla lam ye.

³⁰ Kïtø 'nten sahn ne ðob høa, na de kï nda jin døat goto, kïta døkàd loa asï al þaitø.

³¹ Na deg ngãibe ku koosïgt adïn kamd Jeju anan: Lon Krist a ðe a ne, a ða nyakøjg kï yaya tøi îgïn de'n ðan ða yo?

Parisïg lan ngéðøøg kad høn Jeju

³² Parisïg oon dø kosïdeg ndï nyurïn ta nyag'n non kï dø Jejut; ad ngéjamosïkadkari kïbog, kï Parisïg lan ngéðøøg kad høna.

³³ Kïtø 'nten Jeju elïn an: Nãi kaglo tëbe kad m'ndï nat sesï þaitø, kamla m'a m'aw ro ngelamt ye.

³⁴ A i sahmïn na a i ngahmïn al, kïta lon m'ndït ye, asïn kawt al.

³⁵ Kïtø 'nten juipg elïn na kï nadt anan: De'n ndïn a aw ða hã j'a kï ngah al a? Ke a aw ro juipgt kï tîn na ku Grekgt, kï'n ndoo Grekg e?

³⁶ Girr ta 'nten ye i ði el an: A i sahmïn, na a i ngahmïn al; lon mît, a asïn kawt al a?

Ta dø man kumkarjirt

³⁷ Ndø kï døboit, ad i ndø ða nah kujkám i ndø kïbo. Jeju þai ða dõ, ko kï ndïn kïbo an: Îla kïnda õ de mad a ne kï ðe romt kï ãi.

³⁸ De'n ndï adïm kamïn a ne, kokamat la bahg, kï man kumkajir a nunt ye tit'n ta kï kam Maktubt elïn.

³⁹ Jeju elta 'nten dan dø Ndil kïkunjðang'n ngékada kamd a ngahn; kïta ad Ndil al þaitø, kïta Jeju aw dõ ta køsïgon al þaitø ho.

Koosïdeg gangïn na joo dø tat lo Jeju

⁴⁰ Kïtø 'nten deg madg ngãibe ku koosïgt'n oon dø ta 'nten elïn anan: rota, de'n ðan i ngekelta kï ta Luwaht kaa nõ.

⁴¹ Kïmadg anan: De'n non i Krist. Krist a ðe ko døning Galilet e?

⁴² Ta kï kam Maktubt an Krist a tee kokam ngaka Dabidt kï þe Betlehem tø, ad i ngon þe kï Dabid ndït maði ye ale?

⁴³ Kïtø 'nten deg koosïg gangïn na joo dø tat loa.

⁴⁴ Kïmadg kudt ndigïn høa, na de kï nda jin døat goto.

Ngékõþeg lo juipg mbetïn kad kamd ta lo Jeju

⁴⁵ Asïgarg tel ðen ro ngejamosï kadkari kïbogt, kï Parïsg. În tø elïnd anan: Kïtøði i ðen sia al a?

⁴⁶ Asgarg turïn anan: J'oo de kï ngekelta kï titbe nja kïða al?

⁴⁷ Parisïg turïn anan: Mbã în tø i son mut e?

⁴⁸ Kïmadg ndin nõ ku ngekõþegt ke ku Parisïgt îgïn adïna kamd a?

⁴⁹ Na deg koosïg'n ndïn, ngékadakamd'n gerïn mberkïnda al ye, ndøl i dødt.

⁵⁰ Nikodem, în aw ro Jejut ndø maði i kïkïða kudt ye, eld an:

⁵¹ Mberkïnda loj ndï gangta dø det kete kanj koo ta kï taat, kanj ger nya'n ndï ða a?

⁵² Turïna anan: Î tø i de kï døning Galilet e? I ndio kam Maktub oo, ngekelta kïta Luwaht kï ðe ko døning Galilet goto.

⁵³ Nõbe dekïðen, un ðob kïþe lon.