Jã 6 - BIBLE MBAÏ 1980

Jeju ad nyasa deg ðub mi

¹ Gog go nyag 'nten Jeju þai aw gid bahbo Galilet ko mad, ad i bahbo kï a kunïna Tiberiad.

² Bahbo koosïdeg ndulon goa kï n'oon nyakøj kï ya'n hã ða yootïn mõig.

³ Jeju al dø mbalt, na ndï døt ber nat kï ngéndoog lon.

⁴ Na kaglo ða nah lo Juipg'n a kunïna Pakï ye i nderrbe.

⁵ Lon Jeju un kumïn kï dõ taa, oo bahbo koosïdeg ndï ðen kï ront ad ndïje ta Pilip an: Pilip lokïðah ja kï ndugo nyasat kï asï kad j'ad deg tube'n ðan ðan kad san a?

⁶ Jeju ndïje ta Pilip titbe kad n'oon ta ga loa ta ko, kïta ger nya'n î kïþe a ða nõ þet.

⁷ Pilip tura an: Ke neni j'aw kï nar dub kaa ne, a asï kad dekïðen kudt ngah ngon gaj nyasa sî sa al.

⁸ Ngendoo loa mad kï tøa i Andre kï ngonkõ Simõ Pierr ela an:

⁹ Basa mad i ne, kï bïnã kï løi mi ho kï ngan kanj joo jint; na i tëbe kïta koosïdeg kï kasï be.

¹⁰ Taa Jeju el ngéndoog lon an: Adïn deg ye ndïn ber dø müt kïmbool kï þa tukïtukï'n non, deg ndïn ber, kør dekïdïngãg koon i dub mi.

¹¹ Jeju øi bïnã kï løi'n non kï jint, ða mersi Luwah, kamla luþo koosïdeg'n ndin ber nõ. Luþod kanj titbe tø, ad'd kï asï tøl þo dekïðen.

¹² Lon san ad ndenïn woi ye, Jeju eld an: I kawïn bud bïnã kï løi ye kï nat lo kïða, kad tuj al.

¹³ Kawïn ndeg bïnã kï løi kïmi kïkanj kïjoo kï nat, ad ðoosï jàng kïlah gidaijoo.

¹⁴ Lon deg oon nyakøj kï ya'n Jeju ða ye, elïn anan: Kï ger jeje de'n ðan i ngekelta kï ta Luwaht kan elïn ta ðea døningt ka la ðan.

¹⁵ Jeju oo takad deg a sahn kï'n ndanïn ngart kï lo ngetøgt ye, tel al gog dø mbalt aw ndït kïkïðanbe.

Jeju ndia dø mant

¹⁶ Lokïsøle, ngéndoog loa awïn ta bahbot.

¹⁷ Þain kam toot mad kï'n gangïn bahbo kï Kapernawm. Lo diw til woi, na Jeju ðisï dø mbalt ngad al þaitø.

¹⁸ Taa nel kïbo la kï tøgïn ad man øsï pïkapïka

¹⁹ Ngéndoog nelïn too teen þul bahbot asï kïlometïr mi, lon oon Jeju a ndia dø bahbot a ðe nderrbe kï dø toot ye, þoolïn,

²⁰ na Jeju eld an ot þoolïn: I mî.

²¹ Ngéndoog loa ndigïn kuna kam toot, na tentenbe too tee takumkat kï Kapernawmt.

Bahbo koosïg sahn Jeju

²² Loti got bahbo koosïg'n naïn gid baht ko mad ye oon kad too i kïðabe la tag nõbe ye, na gerïn kad Jeju þai toot'n non nat kï ngéndoog lon al, na ngéndoog loa død la awïn ye.

²³ Na too madg ðen ko Teberiadt nderrbe kï kad lot'n Bïraþe ðat ða mersi Luwah kïta bïnã'n deg san.

²⁴ Lon bahbo koosïg oon Jeju, kï ngéndoog loa nõbe al ye, în kïþeg kï død andïn kam toogt'n non, na awïn Kapernawmt sahn go Jeju.

Jeju i nyasa'n a ad kumkajir

²⁵ Lon ngahna gid bahbot ye, elïna anan: Ngendoo deg, ðingãt hã i ðe nëbe a?

²⁶ Jeju turd an: Rota rota la m'ndï m'elsï ye, i ða i sahmïn kïta koon oon nyakøjg kï yaya'n m'ða nõ al, na kïta bïnã'n i san ndensï.

²⁷ Ot ðan kïla kïta nyasa kï a ndum, na i ðan kïla kïta nyasa kï a tokïnõt na a ad kumkajir kï mbãkïnõt, nyasa'n non Ngon de la a adsï ye, kïta îla Luwah kï bøw ja kïrra tøgïn roat ye.

²⁸ Taa deg ndïjena anan: Ði ka kï ða kad kï tølïn kon kïlag'n Luwah ndig a?

²⁹ Jeju turd an: Kïla'n Luwah gee ko rosït la ten: Kï adïn kamsï ngona'n laa kï rosït.

³⁰ Tel elïna anan: Nyakøj kï ði kï ya hã a i ða ad j'oo kad j'adïn kamj a? Ði i ndï i ða?

³¹ Kaajg san nyasa kï tøa i mane kam dïlalot tit'n ndangïn kam maktubt anan: Ad'd nyasa kï ðe ko dõ dørãt.

³² Jeju turd an: M'elsï kï tïga wakïsï i rota. Moij hã adsï nyasa kï ðisï ko dørãt al, na i Bøwm la adsï nyasa kï jeje kï ðisï ko dørãt ye.

³³ Kïtø nyasa'n Luwah ad, i nyasa kï ðisï ko dørãt, na ad kumkajir deg kï døningt.

³⁴ Kïtø 'nten elïna anan: Bïraþe adj nyasa'n non kïndøgndøg.

³⁵ Jeju eld an: Mî la mî nyasa kï ngekad kumkajir deg. De'n ndï ðe romt þo a õa gog al bat, na de'n ndï adïm kamïn tø a ne, kïnda a õa gog al bat tø.

³⁶ Na m'elsï, ke oomïn kaa ne, admïn kamsï al.

³⁷ Deg tube'n Bøwm lad jimt a ðen romt, na de'n ndï ðe romt a ne, m'a m'laa kø al.

³⁸ Kïtø m'ðisï ko dørãt kad m'ða ndig lom al, na kad m'ða ndig lo ngelam tã.

³⁹ 'Nten la i ndig lo Ngelam, kad kïkïða ku îgt'n adïmd tee jimt so al, na kï m'ada þai lo koit ndøt kïdøboit.

⁴⁰ Titbe la i ndig lo Bøwm ye, kï deg tube'n oon Ngon, na adïna kamd ye, a ngahn kumkajir kï mbãkïnõt, na m'a m'ad'd þain lo koit ndø kï døboit.

⁴¹ Kïtajigt, juipg nyurïn kïta kelïn Jeju el an: Mî nyasa kï ðisï ko dørãt nõ.

⁴² Elïn tø anan i Jeju ngon Jojep'n hã kï ger bøwa kï kõa ye ale? Titbãi hã tajigla ndï el an: M'ðisï ko dørãt a?

⁴³ Jeju turd an: Ot nyurïn ta kïnasït.

⁴⁴ De kï asï ðe romt kï døn goto, na îla Bøwm kï ngelam laa kï romt tã, na mî m'a m'ada þai lo koit ndø kï døboit.

⁴⁵ Ngékelta kï ta Luwaht ndangïn anan: Deg tube a în ngéndoo nya ro Luwaht, dekïðen nel mbin kï ro Bøwt, na taa nyandoo loa a ne, ndï ðe romt.

⁴⁶ De mad kï oo Bøw kï kumïn be goto, na în hã þai ko ro Luwaht kïðabe la oo Bøw kï kumïn ye.

⁴⁷ M'tø tamt wakïsï kï tïga m'an de'n adïm kamïn a ne, ngah kumkajir kï mbãkïnõt.

⁴⁸ Mî nyasa kï kad kumkajir.

⁴⁹ Kaasïg san nyasa kï tøa i ma ne, kam dïlalot, be kaa ne oin.

⁵⁰ Nyasa kï ðisï ko kï dørãt ye, de'n a sa a ne, a oi al.

⁵¹ Mî la mî nyasa kumkajir kï ðisï ko dørãt ye. Îla de mad sa nyasa'n non a ne, a ndï kï døn dõ mbãkïnõt, na nyasa'n m'a m'ad deg i dãrom'n m'a m'ad deg kï døningt kad ngahn ne kumkajir.

⁵² Kïtø ta'n el ten la juipg majïn ne ta kïnadt ngãi anan: Titbãi hã de'n ðan a adj dãron kad kï sa a?

⁵³ Jeju eld an: M'elsï kï tïga wakïsï, i rota, îla i san dãro Ngon de, na ãin mosa al tø a ne, kumkajir goto kamsït.

⁵⁴ De'n sa dãrom, na ãi mosïm tø a ne, ngah kumkajir kï mbãkïnõt, na m'a m'ada þai lo koit ndø kï døboit.

⁵⁵ Kïtø dãrom i nyasa kï jeje, na mosïm i nyakãi kï jeje tø.

⁵⁶ De'n sa dãrom, na ãi mosïm tø a ne, ndï kï kammt, na mî m'ndï kï kamat ho.

⁵⁷ Tit'n Bøwm kï ngelam i kumkajir, na m'ndï kï døm dõ kïtakula ye, titbe tø la de'n sa dãrom a ne, a ndï kï døn dõ kïtakulïm ho ye.

⁵⁸ 'Nten i nyasa kï ðisï ko dørãt i tit nyasa'n kaasïg san, na oin al, de'n sanya 'nten a ne, a ndi kï kumkajir kï mbãkïnõt.

⁵⁹ Jeju eltag 'nten lon ða ndoon deg kam kuj kawnat lo juipg kam þebot kï Kapernawm.

Tag kï ad de kumkajir

⁶⁰ Lon oon dø ta 'nten ye, ngéndoog loa ngãibe anan: ta ði kïngang titbe a? Nõ asï nel mbin koon dø a?

⁶¹ Jeju ger kamïnt kad ngéndoog lon ndï nyurïn dø tat lon ad eld an: Ta'n m'el ye, gasï gigt e?

⁶² Na îla oon Ngon de tel aw gog dõ lon ndït kete dørãt ye, ka a anan ði?

⁶³ I Ndil Luwah la ndï ad kumkajir ye, na dãro asï ða nya mad al. Tag'n m'elsï i Ndil, na i kumkajir ho.

⁶⁴ Na deg madg kusït adïn kamd al, lo mbagirrat nu, Jeju elta titbe kïta ger îgïn adïn kamd al, kï de'n þet a laa ji madngétaagt.

⁶⁵ El tø an: Kïtø 'nten la m'elsïn m'an: De kï asï ðe romt goto, na de'n Luwah ada ta ðob tã.

⁶⁶ Dø ndøt'n non, ngéndoog loa ngãibe tørrïn rod kï gog, na nyan ta ndulo goa.

⁶⁷ Taa Jeju el ngéndoog lon kïkïlah gidaijoo an: Na îng ye, i ndigïn kaw al nyasï e?

⁶⁸ Simõ Pierr tura an: Bïraþe kaa j'aw ða a? Î la i ndï kï tag kï kad deg kumkajir kï mbãkïnõt ye.

⁶⁹ Na j'adi kamj kïta kï ger kad î la î Krist, kïjaþat lo Luwah.

⁷⁰ Jeju turd an: În kïkïlah gidaijoo, i mî hã m'køtsï ale? Na kïkïða kusït i ngon ngekïla lo Sitan.

⁷¹ Elta øjïn dø Judas ngon Simõ, de kï Iskariot't. Kïtø îla a la Jeju ji madngétaagt, na i kïkïða ku ngendoogt loa kïkïlah gidaijoo.