Jã 5 - BIBLE MBAÏ 1980

Jeju yoot de kï ngerokoinjør

¹ Go nyagt'n non, juipg awïn þebo Jerusalemt kï n'ðan nah lod mad. Jeju awt ho.

² Kam þebo Jerusalemt, nderrbe kï tabit batgt, mankaar mad kï tøa i Betesda kï ta Hebre to tit; kuj girr gang mi ðan tit nõ.

³ Girr kujgt'n non, ngémõig ngãi be ton tit, ta mankaart: Mundog, mootg, kï ngérokoinjørg to ngoon yee man.

⁴ Kïtø malaika lo Bïraþe mad, kaglo mad a ðisï, and kam mankaart, bur mana. Ngemõi'n a ud kam mant'n non dasa go yeeat a ne, a yoot; ke neni în mõi kï titbãi.

⁵ Ku ngémõigt'n ton ta mankaart nõ ye, de mad kï mõi ðaa þal dømïta gidaijijoo tot nõ.

⁶ Lon Jeju ooa to ber kï køtïn, na ger kad mõi ðaa kaglo ngãibe ye, ndïjea an: I ndig kad i yoot e?

⁷ Ngemõi tura an: Bïraþe, de lom kï kad un lam kam mankaart lon man yeen goto na lon m'ndï m'ag þaitø a ne, de mad and nõmt.

⁸ Jeju ela an: I þai dõ un nyatoi, na i þaning.

⁹ Kïtajigt, de'n non yoot, ad þai dõ un nyaton, na þaning. Na tit kan hã nya'n non ða nya kï ndø taakò ye,

¹⁰ kïbog lo juipg elïn de'n Jeju yoota anan: Ndø 'nten i ndø taakò, i goðobat al kad un nyatoi.

¹¹ De'n non turd an: De'n yootïm nõ la elïm an: Un nyatoi, na i þaning.

¹² Deg'n non ndïjena anan: De'n eli an: Un nyatoi na i þaning ye, i nõ a?

¹³ Na de'n yoot ye, ger de'n yootïn nõ al, kïta Jeju tee kø ku degt'n ðan lot'n non.

¹⁴ Ndø madt, Jeju ndøda kam kuj ndub Luwaht, na ela an: Oo dø maj. Tajigla î kï yoot, ot ða majal gog ta, na þeta kõ kï tøi în ðai ye, tel ðai gog tø.

¹⁵ De'n non aw el kïbog lo juipg kad i Jeju la yootïn ye.

¹⁶ Kïtø 'nten, kïbog lo juipg awïn ne kï ta kï Jeju, kïta yoot de'n non kï ndøø taakò.

¹⁷ Na Jeju turd an: Bøwm ndï ða kïla mbã tajigla, mî kaa m'ndï m'ða kïla ho.

¹⁸ Lon juipg oon dø ta 'nten ye, kïbog lod sahn ðob tøla, i kïta tøi'n tøi dø ndøø taakò hã kïðabe al, na i kïta kel'n ndï el an: Luwah i Bøw koojïn, ho oo ron asï na derir kï Luwah.

Tøg Ngon Luwah

¹⁹ Jeju tee tan eldïn ta 'nten an: M'elsï kï tïga wakïsï i rota. Ngon asï ða nya mad kï døn al. Na a ða nya'n oo Bøwïn lo ðat tã, nyag tube'n Bøw ndï ða ye, Ngon kaa ne, ða titbe ho.

²⁰ Kïtø Bøw tar ngon, ad øja nyag tube'n ndï ða; a øja kïlag kïbobo'n oo nõ, kad ða. Na ta a yasï biw.

²¹ Tit'n Bøw ndï ad ngékoig bain lo koit, na ad'd kumkajir ye, titbe tø ho la Ngon ndï adïn kumkajir îgïn hã ndig kad'd ho ye.

²² Bøw ndï gangta dø det mad al, na la takïgang tube ji Ngont.

²³ Kïtøkad deg tube øsïngon Ngon, tit'n ndï øsïn ne gon Bøw ye be. Bøw la, la Ngon ye, de'n ndï øsïgon Ngon al a ne, ndï øsïgon Bøw kï Ngelaa al tø.

²⁴ M'ndï m'elsï kï tïga wakïsï, rota, de'n ndï oo dø ta lom, na ndï adkamïn ngelam a ne, ngah kumkajir kï mbãkïnõt; a gangïn ta døat al, na tee ta koit kï kumkajirt.

²⁵ M'elsï kï tïga wakïsï i rota, dø kàd a ðe nõ, na tajigla ðe woi, ngékoig a oon dø ndï Ngon Luwah, na îgïn oon dø ndïa ye, a þain ndïn kï død dõ.

²⁶ Tit kan Bøw în kï tøg kad deg kumkajir ye, titbe tø la ad ngonïn tøg kad deg kumkajir ho ye,

²⁷ na ad ngonïn tøg gangta dø degt kïta i ngon de.

²⁸ Adïn nyag 'nten yasï al, kïta kaglo ndï ðe nõ, lon ngékoig'n dubïnd a oon dø ndia,

²⁹ a teen kam døþadgt, îgïn ðan maj a þain lo koit kïta kumkajir, na îgïn ðan majal ye, a þain lo koit kad gangïn ta dødt.

Deg man naj kïmaj dø Jejut

³⁰ Jeju el tø an: Mî m'asï ða nya mad kï døm al, m'ndï m'gangta kïgo tat'n m'oo dø ta Bøwt, na ta kï m'gang i goðobat, kïta m'ndï m'ða kïgo ndigt lom al, na kïgo ndigt lo ngelam tã.

³¹ Îla m'ndï m'manaj dø romt mî kïþe a ne, titbãi deg a gerïn kad ta lom i rota a?

³² Na de mad i nõ, ndï manaj dømt, na m'ger manaj loa kï ma dømt i rota.

³³ Na în, i lan deg ro Jãt, na Jã manaj dø rotat.

³⁴ Na mî taa ne, m'sah kad de tã mam naj al, na m'ndï m'elta titbe kad i ngahn ne kaj.

³⁵ Jã i tit horr døg kï unj njoinjoi, na i ndigïn ða ronel dø kunjat kaglot kï sîbe.

³⁶ Na mî taa, m'ndï kï naj kï mã kïbo tøi lo Jã'n mã dømt kïta kïlag'n m'ða, Bøwm la adïm tøg kad m'ðadïn ye, kad deg gerïn kad i Bøw la lam ye.

³⁷ Bøw, în hã lam, mamnaj tø, i în oon dø ndia nja kïða al ho, oon takuma nja kïða al ho.

³⁸ I ngomïn tag loa kamsït al, kïta adïn kamsï ngona'n la nõ al.

³⁹ I ndï oon tag kïndang lo Luwah kïta oo anan a i ngahn kumkajir kï mbãkïnõt kamt. Na i rotag kï ndang lo Luwah'n non la ndï mamïn naj ye.

⁴⁰ Be kaa ne, i ndigïn ðe romt kad i ngahn kumkajir kï jeje al.

⁴¹ M'ndï m'sah køsïgon kokïro degt al.

⁴² Na m'gersï, tar Luwah goto kamsït.

⁴³ M'ðe kam tø Bøwmt, na i hømïn kï rosït al, na îla de mad kïðang ðe kam tønt kï køsïdøn a ne, a i høna kï rosït,

⁴⁴ Titbãi a asïn kad kamsï Luwah îgïn i ndï ndigïn ngah køsïgon kokïro degt, na i sahn køsïgon kï þai kokïro Luwaht kïðabe al a?

⁴⁵ Ot gaan kan, mî m'a m'lata døsït nõ Bøwmt. Na i Moij în i ndan kamsï døat nõ la a la ta døsït ye,

⁴⁶ Ni adïn kamsï Moij jeje a ne, ni a admïn kamsï ho, kïta Moij ndangta kam maktubt dan døm.

⁴⁷ Na tit kan i taan tag kï ndang lo Moij al ye, titbe ho la, i taan tag lom al ho ye.